مەنني پاكياو
ەممانۋەل داپيدران «مەنني» پاكياو (58-6-2, 38 KO) جايلى بىلمەيتىن ادام كەمدە كەم. ول 1978 جىلى 17 جەلتوقساندا ءفيليپپيننىڭ كيباۆە قالاسىندا تۋعان. ومىرىندە بولعان قيىندىقتارعا قاراماستان شارشى الاڭدا ۇلكەن جەتىستىكتەرگە جەتكەن. العاش رەت كاسىپقوي بوكسقا 1995 جىلى قاڭتار ايىندا ەڭ مينيمالدى سالماق دارەجەسىندە شىققان. العاشقى جىلدىڭ وزىندە-اق 11 قارسىلاسىن جەڭگەننەن كەيىن سالماعىن ەكى دارەجەگە كوتەردى. بارلىعى سەگىز سالماق دارەجەسىندە الەم چەمپيونى اتانعان ءبىرىنشى ءارى قازىرگى ۋاقىتتاعى جالعىز بوكسشى. ول اسا جەڭىل سالماقتا (WBC, 1998-1999), ەكىنشى جەڭىل سالماقتا (IBF, 2001-2003), جارتىلاي جەڭىل سالماقتا (The Ring, 2003-2005), ەكىنشى جارتىلاي جەڭىل سالماقتا (WBC, 2008; The Ring, 2008), جەڭىل سالماقتا (WBC, 2008-2009), ءبىرىنشى جارتىلاي ورتا سالماقتا (The Ring; IBO 2009-2010), جارتىلاي ورتا سالماقتا (WBO, 2009-2012, 2014-2015, 2016 قازىرگى ۋاقىتتا) جانە ءبىرىنشى ورتا سالماقتا (WBC, 2010-2011) الەمنىڭ ءبىرىنشى بوكسشىسى اتانعان. سونىمەن قاتار, پاكياو بوكستاعى كارەراسىن باستاعاننان بۇگىنگە دەيىن بارلىعى 12 سالماق دارەجەسىندە جەكپە-جەك وتكىزگەن. وتكەن جىلدىڭ 9 ساۋىرىندە تيموتي برەدليمەن جۇدىرىقتاسقاننان كەيىن بوكستان كەتەتىنىن مالىمدەگەن بولاتىن. الايدا, سول جىلدىڭ تامىز ايىندا قايتا ورالعانىن حابارلاپ, 5 قاراشادا شارشى الاڭعا شىقتى. بۇل كۇنى ول WBO نۇسقاسىنىڭ الەم چەمپيونى اتاعى ءۇشىن دجەسسي ۆارگاسپەن ايقاسىپ, جەڭىسكە جەتتى. فيليپپين سپورتشىسىنىڭ مانسابىنداعى ەڭ ايتۋلى كەزدەسۋلەردىڭ ءبىرى كىشى فلويد مەيۋەزەرگە قارسى 2015 جىلدىڭ 2 مامىرىندا ءوتتى. الەمدىك باق بەتتەرى مۇنى ءتىپتى, عاسىر جەكپە-جەگى دەپ تە جاريالاپ جاتتى. ءبىر ايتا كەتەرلىگى, پاكياو بۇل كەزدەسۋدە جەڭىلگەنىنە قاراماستان 120 ميلليون دوللار اقشا الدى. پاكياو جايلى بەلگىلى تۇلعالاردىڭ پىكىرى دە از ەمەس. سولاردىڭ ءبىرى, كوپشىلىكتىڭ ىستىق ىقىلاسىنا بولەنگەن ايگىلى مايك تايسون كىشى فلويدپەن وتكەن كەزدەسۋى جايلى ءوز ويىمەن بولىسكەن: «پاكياو ىلعي دا ءبىرىنشى شابۋىلداعاندى جاقسى كورەدى. سوققىسى – مىعىم, قورعانىسى – بەرىك. قانداي جاعداي بولماسىن فلويد بۇرىن-سوڭدى بولماعان اۋىر سوققىلار الادى. ءوز باسىم مەننيگە جانكۇيەرلىك ەتەمىن», – دەگەن ەدى.دەنني گارسيا
دەنني گارسيا (32-0, 18 KO) – ورتا سالماقتاعى ءالى جەڭىلىپ كورمەگەن جۇلدىزداردىڭ ءبىرى جانە بىرەگەيى دەۋگە بولادى. 1988 جىلى 20 ناۋرىزدا اقش-تىڭ پەنسيلۆانيا شتاتىنداعى فيلادەلفيا قالاسىندا تۋعان. ول ءبىرىنشى جارتىلاي ورتا سالماقتا جانە جارتىلاي ورتا سالماقتا بوكستاسادى. ءبىرىنشى جارتىلاي ورتا سالماقتا WBC (2012-2015) جانە WBA (2012-2015) تۇجىرىمدارى بويىنشا الەم چەمپيونى اتانعان. سونداي-اق, جارتىلاي ورتا سالماقتا WBC نۇسقاسىنىڭ قازىرگى الەم چەمپيونى. كاسىپقوي رينگكە العاش رەت 2007 جىلدىڭ قاراشا ايىندا جارتىلاي ورتا سالماقتا شىققان. مانسابىنداعى ايتۋلى جەكپە-جەكتىڭ ءبىرى 2011 جىلدىڭ ءساۋىر ايىندا نەيت كەمپبەلگە قارسى ءوتتى. امەريكالىق جىلدامدىعى مەن تەحنيكاسىنىڭ مىقتىلىعىنان كەمپبەلدى 100-90, 99-91 جانە 98-91 ەسەبىمەن جەڭدى. 2012 جىلدىڭ ناۋرىز ايىندا ول ءتورت سالماق دارەجەسىندە الەم چەمپيونى بولعان ايگىلى ەريك مورالەسپەن جۇدىرىقتاسىپ, تورەشىلەردىڭ شەشىمىمەن جەڭىسكە جەتتى. وسىلايشا, WBC تۇجىرىمى بويىنشا جاڭا الەم چەمپيونى اتاندى. ءدال سول جىلدىڭ شىلدە ايىندا ءبىرىنشى ورتا سالماقتا WBA نۇسقاسى بويىنشا «سۋپەرچەمپيون» امير حانمەن بىرىككەن جەكپە-جەك وتكىزدى. ءتورتىنشى راۋندتا ونى ەكى رەت نوكداۋنعا جىبەرىپ, ەشكىم كۇتپەگەن جەڭىسكە جەتتى. وسىلايشا, تيتۋلدارىنىڭ باسىن بىرىكتىردى. رەسەيدىڭ بەلگىلى ساراپشىسى الەكساندر بەلەنكي ونىڭ تالانتىنا جوعارى باعا بەرىپ, جىلى لەبىزدەرىمەن ءبولىستى: «گارسيا – مىقتى بوكسشىلاردىڭ ءبىرى. كوپشىلىگى ونى جوعارى باعالايدى. ونىڭ كەمشىن تۇستارىن اتاپ ايتۋ قيىنداۋ. قاي قىرىنان الىپ قاراساق تا مىقتى. ساۋاتتى قورعانا بىلەدى, ال سوققىلارى ءدال تيەر بولسا, ەسەڭگىرەتىپ جىبەرۋى مۇمكىن. ايگىلى امير حاندى جەڭگەننەن كەيىن ونىڭ اتاعى كۇن ساناپ ارتا بەردى. كوپشىلىكتىڭ الدىندا بەلگىلى ادامداردى جەڭىپ, تانىلا باستادى. ماسەلەن, لۋكاس ماتتيسكە قارسى كەزدەسۋدە وعان ەشكىم سەنىم ارتپاعان ەدى. بىراق ول ودان دا باسىم ءتۇستى. ءبىر سوزبەن ايتقاندا گارسيا ۇزدىكتەردىڭ ءبىرى», – دەدى بوكس ساراپشىسى.كىشى كيت تۋرمان
كىشى كيت تۋرمان (27-0, 22 KO) 1988 جىلى 23 قاراشادا اقش-تىڭ فلوريدا شتاتىنداعى كليرۋوتەر قالاسىندا تۋعان. 2015 جىلدان بەرى WBA (Regular) بەلبەۋىنىڭ يەگەرى. ول كاسىپقوي بوكستا العاش رەت 2007 جىلدىڭ قاراشا ايىندا ءبىرىنشى ورتا سالماق دارەجەسىندە شىققان. 2008 جىلى ءوزىنىڭ جەتىنشى جەكپە-جەگىندە بۇعان دەيىن جەڭىلىس كورمەگەن ومار بەلدى ءبىرىنشى راۋندتا-اق سۇلاتىپ سالدى. 2009 جىلدىڭ ءساۋىر ايىندا قىزىق جايت بولدى. مەكسيكالىق فرانسيسكو گارسيامەن ايقاسى كەزىندە ءبىرىنشى راۋدتا ءبىر-بىرىمەن باستارىن سوعىپ الدى. ناتيجەسىندە كەزدەسۋ سول جەردەن اياقتالىپ, ۇيىمداستىرىلماعان جەكپە-جەك رەتىندە شەشىم قابىلداندى. تۋرمان مانسابىندا كوپتەگەن جەڭىستەرگە جەتكەن. «اندەردوگ» (جەڭىستەن ءۇمىتى از سپورتشى) رەتىندە قاتىسىپ, تالاي چەمپيوندى جاسقاندىرعان. ماسەلەن, 2010 جىلى سولتۇستىك امەريكانىڭ جانە اقش-تىڭ چەمپيونى فاۆيو مەدينانى ۇتسا, 2012 جىلى بۇرىنعى اقش چەمپيونى ورلاندو لورانى, سونداي-اق جەڭىلىپ كورمەگەن برەندون حوسكينستى نوكاۋتقا تۇسىرگەن. سول جىلدىڭ 24 قاراشاسىندا بۇرىنعى الەم چەمپيونى كارلوس كينتارونى ءتورتىنشى راۋندتا-اق سۇلاتىپ تۇسىرگەن. وسى جەڭىلىستەن كەيىن كينتارو مانسابىن اياقتاعانىن جاريالادى. 2013 جىلى ول تاعى ءبىر جەڭىلمەگەن سپورتشىنى نوكاۋتقا جىبەرگەن. ورتا سالماقتا وتكەن جەكپە-جەكتە 27 شىلدە كۇنى ارگەنتينالىق ديەگو گابريەل چاۆەستى جەڭىپ, WBA تۇجىرىمى بويىنشا ۋاقىتشا الەم چەمپيونى اتاندى. ال 2013 جىلدىڭ سوڭىندا مەكسيكالىق حەسۋس سوتو كاراستى ەسىنەن تاندىرىپ, بەلبەۋىن قورعاپ قالدى. سونىمەن قاتار, بۇرىنعى الەم چەمپيونى حۋليو دياستى 2014 جىلدىڭ 26 ساۋىرىندە مەرزىمىنەن بۇرىن جەڭدى. ءدال وسى جىلدىڭ جەلتوقسان ايىندا ەشكىمگە ەسە جىبەرمەگەن يتاليالىق لەورناردو ءبۋندۋدى (31-0-2) ۇپاي بويىنشا ۇتقان.كەلل برۋك
كەلل برۋك (37-1, 25 KO) 1986 جىلى 3 مامىردا ۇلىبريتانيانىڭ شەففيلد قالاسىندا تۋعان. ءوز ەلىنىڭ BBBofC نۇسقاسى بويىنشا جارتىلاي جەڭىل سالماقتا (2009-2010), سونداي-اق IBF (2014-2016) نۇسقاسى بويىنشا الەم چەمپيونى اتانعان. كاسىپقوي بوكستا رەيتينگى تومەن 16 جەكپە-جەك وتكىزگەن. 2008 جىلى وتانداسى بارري دجونستى 7-راۋندتا جەڭىپ, ۇلىبريتانيا چەمپيونى اتاندى. 2010 جىلدىڭ 12 ناۋرىزىندا پولشالىق كشيشتوف بيەنياستى (39-3) 6-راۋندتا نوكاۋتپەن جەڭىپ, جارتىلاي جەڭىل سالماقتا WBO نۇسقاسى بويىنشا قۇرلىقارالىق الەم چەمپيونى بولدى. ال 2012 جىلدىڭ ناۋرىز ايىندا بريتانيالىق مەتتيۋ حاتتوندى ۇپاي بويىنشا جەڭىپ, ءبىرىنشى ورتا سالماقتا IBF نۇسقاسى بويىنشا ينتەرناتسيونالدىق تيتۋلىنا قول جەتكىزدى. برۋك تالاي جەتىستىكتەرگە جەتكەن. 2013 جىلدىڭ 26 قازانىندا بۇرىنعى الەم چەمپيونى ۆياچەسلاۆ سەنچەنكونى نوكاۋتپەن ۇتىپ, IBF تيتۋلىنا مىندەتتى ۇمىتكەر اتاندى. ال 2014 جىلدىڭ 16 تامىزىندا بۇعان دەيىن جەڭىلىپ كورمەگەن شون پورتەرمەن كەزدەسىپ, اتالمىش تيتۋلدى تارتىپ الدى. ايتا كەتەيىك, ونىڭ ەسىمى قازاق جانكۇيەرلەرى ءۇشىن گولوۆكين ارقىلى جاقسى تانىس. وعان دەيىن ەشكىمگە ەسە بەرمەگەن برۋك وتكەن جىلدىڭ قىركۇيەك ايىندا ورتا سالماقتا قازاقستاندىق بوكسشىدان وڭباي ۇتىلدى. كەزدەسۋدىڭ 5-راۋندىندا تەحنيكالىق نوكاۋتقا تۇسكەن بولاتىن. ءبىر ەسكەرە كەتەرلىگى, العاشقى ءتورت راۋندتا ءۇش تورەشى جەڭىسكە بريتانيالىق لايىق دەگەن شەشىم قابىلداعان.تيموتي برەدلي
تيموتي برەدلي (33-2-1, 13 KO) 1983 جىلى 29 تامىزدا اقش-تا تۋعان. ءبىرىنشى ورتا سالماقتا (WBC, 2008-2009, 2011; WBO, 2009-2012), جارتىلاي ورتا سالماقتا (WBO, 2012-2014, 2015-قازىرگى ۋاقىتتا) الەم چەمپيونى. بۇگىنگى كۇننىڭ ۇزدىك سپورتشىلارىنىڭ ءبىرى. 2010-2016 جىلدارى الەمنىڭ مىقتى بوكسشىلارىنىڭ تىزىمىنە تۇراقتى تۇردە كىرىپ تۇرعان. ال رۋسلان پروۆودنيكوۆقا قارسى كەزدەسۋى جىلدىڭ ۇزدىك جەكپە-جەگى اتاندى. بۇعان دەيىن 12 مارتە تيتۋلدى ايقاس وتكىزگەن. ونىڭ 11-ىندە جەڭىسكە جەتىپ, بىرەۋىندە ەسە جىبەرگەن. مانسابىندا 11 الەم چەمپيونىمەن كەزدەسىپ, جەڭىسكە جەتسە, تەك مەنني پاكياوعا ەكى رەت ۇتىلعان. Pound for Pound رەيتينگىندە 3-ورىنعا (2013-2014) دەيىن كوتەرىلگەن. جارتىلاي ورتا سالماقتا شارشى الاڭعا العاش رەت 2004 جىلدىڭ تامىز ايىندا شىققان. 2005 جىلدىڭ 23 قىركۇيەگىندە كاسىبي بوكستاعى جەكپە-جەگىندە مەكسيكالىق فرانسيسكو ريكونانى ۇپاي بويىنشا ۇتىپ, WBC تۇجىرىمى بويىنشا جاستار اراسىندا الەم چەمپيونى اتانعان. 2009 جىلدىڭ 4 ساۋىرىندە تيموتي WBO چەمپيونى وتانداسى كەندالل حولتپەن بىرىككەن جەكپە-جەك وتكىزدى. العاشقى راۋندتا حولت وعان سول قولىمەن تۋرا سوققى باعىتتاپ, كاسىبي مانسابىندا العاش رەت نوكداۋنعا جىبەردى. دەگەنمەن, مىقتىنىڭ اتى مىقتى. دەر كەزىندە ەسىن جيىپ, لايىقتى قارسىلاسا ءبىلدى. تورەشىلەردىڭ شەشىمىمەن ۇپاي بويىنشا جەڭىپ, WBC جانە WBO تيتۋلدارىنىڭ باسىن بىرىكتىردى. دايىنداعان ايان ءابدۋالي