ەلوردادا ءماجىلىس دەپۋتاتتارى سوت-ساراپتاما ورتالىعىندا بولىپ, اتالعان ينستيتۋت باسشىلىعىمەن جانە ساراپشىلارمەن كەزدەسۋ بارىسىندا سالانىڭ وزەكتى ماسەلەلەرى ءسوز ەتىلدى. جانە دە پارلامەنت قابىلداعان جاڭا زاڭنامالىق اكتىلەردىڭ ەرەجەلەرى ءتۇسىندىرىلىپ, ونىڭ ورىندالۋ بارىسى تالقىعا ءتۇستى.
ءماجىلىستىڭ زاڭناما جانە سوت-قۇقىقتىق رەفورما كوميتەتىنىڭ حاتشىسى سۆەتلانا بىچكوۆا قازىرگى تاڭدا پارلامەنتتە قارالىپ جاتقان «قازاقستان رەسپۋبليكاسىنداعى سوت-ساراپتاما قىزمەتى تۋرالى» زاڭ جوباسىنىڭ باسىمدىقتارىنا كەڭىنەن توقتالدى. ەلدەگى ساراپشىلىق فۋنكتسيالاردى ءبىر مەملەكەتتىك ورگاننىڭ ىشىندە ورتالىقتاندىرۋ نورمالارى زاڭدىق قۇجاتتىڭ نەگىزگى جاڭاشىلدىعى ەكەندىگى دە ەرەكشە اتالدى. زاڭ جوباسىمەن ەلىمىزدە جەكەمەنشىك سوت ساراپشىلارى ينستيتۋتىن دامىتۋعا جانە سوت ساراپشىلارى پالاتاسىن قۇرۋعا ەرەكشە دەن قويىلعان. بۇل رەتتە, جاڭا زاڭ جوباسىنىڭ ەرەجەلەرى بىرقاتار كودەكس نورمالارىمەن سايكەستەندىرىلگەندىگىن ايتا كەتۋ كەرەك. تاعى ءبىر بەلگىلىسى, زاڭ جوباسىندا سوت-ساراپتاما قىزمەتى ايتارلىقتاي كەڭەيتىلىپ, جاڭا ۇعىمدارمەن تولىقتىرىلىپ وتىر.
ال ادىلەت مينيسترلىگى سوت-ساراپتاما ورتالىعىنىڭ ديرەكتورى يسيدور بورچاشۆيلي, ءوز كەزەگىندە, ەلىمىزدىڭ سوت-ساراپتاما ماماندارى شىعارعان شەشىمدەرى الەمنىڭ 90-نان استام مەملەكەتىندە مويىندالاتىندىعىن جەتكىزدى.
«حالىقارالىق دەڭگەيگە شىعۋ ءۇشىن اككرەديتتەۋدەن ءوتۋىمىز كەرەك. ەلىمىزدە مىقتى مامانداردىڭ بارلىعىن دالەلدەۋگە ءتيىسپىز. استاناداعى سوت-ساراپتاما ورتالىعى بىلتىر اككرەديتتەۋدەن ءساتتى ءوتىپ, بيىل كەڭەيۋدە. جالپى, قازاقستاننىڭ سوت-ساراپتاما ماماندارىنىڭ شىعارعان شەشىمدەرى دالەل رەتىندە الەمنىڭ 90-نان استام مەملەكەتىندە مويىندالادى», دەدى ي.بورچاشۆيلي.
بيىلعى جىلدىڭ ءبىرىنشى توقسانىنا دەيىن ورتالىق سوت-ساراپتاما ينستيتۋتىنىڭ اككرەديتتەۋ اۋقىمى كەڭەيتىلەدى دەپ كۇتىلۋدە, سونداي-اق, اقمولا, الماتى, شىعىس قازاقستان جانە قاراعاندى وبلىستارىندا ورنالاسقان زەرتxانالارعا ساپا ستاندارتتارىن ەنگىزۋ جوسپارلانعان.