«سالاماتتى ءومىر سالتىن ۇستان, سپورتپەن شۇعىلدان» دەپ ايتۋ, ناسيحاتتاۋ وڭاي. ال وعان جاعداي تۋعىزۋ بولەك اڭگىمە. وبلىستاعى باس وقۋ ورنى بولىپ سانالاتىن قورقىت اتا اتىنداعى قىزىلوردا مەملەكەتتىك ۋنيۆەرسيتەتى ءوز ستۋدەنتتەرى ءۇشىن ارنايى «سەيحۋن» سپورتتىق-ساۋىقتىرۋ كەشەنىن سالدى. جالپى اۋماعى 3294,86 شارشى مەتردى قۇرايتىن ساۋىقتىرۋ كەشەنىنىڭ قۇرىلىسى 2009 جىلى باستالعان بولاتىن. ال وعان 194 ميلليون تەڭگە بولىنگەن ەدى.
«سەيحۋن» سپورتتىق-ساۋىقتىرۋ كەشەنىندە سپورتتىڭ قاي تۇرىمەن دە اينالىسۋعا بولادى. ميني-فۋتبول, باسكەتبول, ۆولەيبول, گاندبول, كوركەم جانە ريتمدىك گيمناستيكامەن اينالىساتىن زالدار بار. وندا ءبىر اۋىسىمدا 40 ادامعا دەيىن جاتتىعۋ جاساۋعا بولادى. سونداي-اق تەرەڭدىگى 2 مەترگە جەتەتىن ءجۇزۋ باسسەينى دە سالىنعان. باسسەيندە ءبىر مەزەتتە 32 ادامعا دەيىن جۇزە الادى. ستۋدەنتتەرگە ىڭعايلى بولۋ ءۇشىن وندا ارنايى نۇسقاۋشىلار جۇمىس ىستەيدى. سونىمەن قاتار, سۋدىڭ قۇرامىن زەرتتەپ, ۇنەمى نازاردا ۇستاپ وتىراتىن ساراپشى ماماندار دا بار.
قورقىت اتا اتىنداعى قىزىلوردا مەملەكەتتىك ۋنيۆەرسيتەتى ەل سپورتىنا ەلەۋلى ۇلەس قوسىپ كەلەدى. اتالعان وقۋ ورنى تاربيەلەگەن يليا يلين تالاي باسەكەدە توپ جارىپ ءجۇر. الداعى لوندون وليمپياداسىندا دا التىن ءجۇلدەدەن ءۇمىتتى سپورتشىلاردىڭ ءبىرى وسى يلين.
ەرجان بايتىلەس, قىزىلوردا.