ەكى عاسىرعا سوزىلعان قازاق-جوڭعار سوعىسىنا 1757 جىلى اياگوز وڭىرىندەگى مامىرسۋ دەگەن جەردە نۇكتە قويىلعانى تاريحتان بەلگىلى. قيىن دا قىستالاڭ شاقتا حالقىمىزدىڭ باسىن بىرىكتىرە بىلگەن ابىلاي حان وسى جەردە قىتاي ءامىرشىلەرىمەن كەلىسىمگە كەلىپ, شەكارامىزدى بەكىتىپ الۋعا قول جەتكىزگەن. ەكى ەل اراسىنداعى بۇل ۋاعدالاستىق قاندىجاپ شارتى, ياكي مامىرسۋ كەلىسىمى دەگەن اتپەن تاريحتا قالعان. سول تۇستا وسى وڭىردەن الدىمەن قۋ داۋىستى قۇتتىباي, سوڭىنان ونىڭ ۇرپاعى اقتايلاق بي قازاق ەلىنىڭ ەلشىسى رەتىندە قىتايدىڭ استاناسى بەيجىڭگە دەيىن بارىپ قايتقان. ال سونىڭ ءبارى ەلدىگىمىزدى كورسەتسە كەرەك.
وسىدان ءۇش-ءتورت جىل بۇرىن وسى ماڭىزدى وقيعانىڭ 250 جىلدىعىنا وراي جەرگىلىكتى ازاماتتاردىڭ باستاماسىمەن بىرقاتار يگىلىكتى شارالار ءجۇزەگە اسىرىلعان ەدى. ەڭ الدىمەن, كەزىندە ورىستار سالدىرعان سەرگيوپول بەكىنىسىنىڭ اتى مامىرسۋ بولىپ وزگەرتىلگەن. سەرگيوپول دەمەكشى, ەندى ەلدىگىمىزگە ورىستار تاراپىنان قاۋىپ تونە باستاعاندا جوعارىدا ەسىمى اتالعان اقتايلاق بي مۇندا مەشىت ءۇيىن سالدىرسا, «تاۋريح-حامسا» اتتى تاريحي كىتاپتىڭ اۆتورى قۇربانعالي حاليت وسى وڭىردەگى العاشقى ءبىلىم ورداسى – مەدرەسەنى ىسكە قوسادى. ال سول سەرگيوپولىڭىزدە مەكتەپ سالىنعانىنا دا 150 جىلعا جاقىنداپ قالدى. مامىرسۋ كەلىسىمىنىڭ 250 جىلدىعىنا ارنالعان عىلىمي-تەوريالىق كونفەرەنتسيا سول ءبىلىم ورداسىندا وتكىزىلگەن-ءدى.
كونفەرەنتسيا سوڭىندا ەكى ەل اراسىنداعى كەلىسىمگە قول قويىلعان مامىرسۋ جەرىنە بەلگى تاس ورناتىلىپ, الدا سول جەرگە ۇلكەن مونۋمەنت تۇرعىزۋ ءجونىندە ءبىراۋىزدى شەشىم قابىلدانعان ەدى. وكىنىشكە قاراي, سودان بەرى ءتورت جىل وتسە دە بۇل ماسەلەدە ەشقانداي قوزعالىس بايقالمايدى. سول شاقتاعى يگىلىكتى شارالاردىڭ باسى-قاسىندا جۇرگەن مامىرسۋ اۋىلىنىڭ اكىمى امانجول ارعىنگەلدين مۇنى جۇزەگە اسىرۋعا ءبىر اۋىل, ءبىر اۋداننىڭ مۇمكىندىگى جەتپەيتىنىن ايتا كەلىپ, وعان وبلىس, رەسپۋبليكا ۇكىمەتى تاراپىنان كوڭىل بولىنسە دەگەن تىلەك بىلدىرگەن ەدى.
بۇل, شىن مانىندە ورىندى ءتىلەك پە دەيمىز. ال سول ورىندى تىلەك ەل تاۋەلسىزدىگىنىڭ جيىرما جىلدىق مەرەكەسى تۇسىندا جۇزەگە اسىرىلىپ جاتسا, كانەكي! مۇنداي شارانىڭ تاريح ءۇشىن, جاس ۇرپاق ءۇشىن قاجەتتىلىگى ايتپاسا دا تۇسىنىكتى!
داۋلەت سەيسەن ۇلى, سەمەي.