قازاقستاننىڭ حالىق جازۋشىسى, مەملەكەتتىك سىيلىقتىڭ لاۋرەاتى, اسا كورنەكتى اقىن قادىر مىرزا ءالىنىڭ ومىردەن وزۋى قازاقتىڭ ادەبيەتى مەن مادەنيەتى ءۇشىن, جالپى ەل ءۇشىن ورنى تولماس اۋىر قازا بولدى. الاش ءۇشىن ازالى وسىناۋ كۇندەردە التاي مەن اتىراۋ, جەتىساي مەن قىزىلجار اراسىنداعى قارىنداس قاۋىم «قازاقتىڭ قادىرى» اتانعان ارداگەر اقىنىن كۇيزەلە جوقتاۋدا.
ەكى كۇن الاي-دۇلەي اق قار قارلاتا بۇرقانىپ, كەشە كوكالا بۇلتتان ءسوگىلىپ اشىلعانداي الماتى ارداقتى اقىنعا سوڭعى قۇرمەت-قوشەمەتىن كورسەتتى. مارقۇممەن قوشتاسۋ ءراسىمى وتكەن م.اۋەزوۆ اتىنداعى اكادەميالىق دراما تەاترى عيماراتىنىڭ ماڭايى دا, ءىشى دە قاراقۇرىم حالىق. ءيا, قادەكەڭ ءوزى ايتقانداي, «ءسوز سىيلايتىن حالقى امان تۇرعاندا» اقىنىن ولىمگە بەرمەيتىنىن ايعاقتايتىن كورىنىس ەدى بۇل.
قازاقستان جازۋشىلار وداعى باسقارماسىنىڭ توراعاسى نۇرلان ورازالين قارالى ميتينگىنى اقىن رۋحىن اسقاقتاتار تەبىرەنىستى لەبىزبەن اشا كەلە, مەملەكەت باسشىسى نۇرسۇلتان نازارباەۆتىڭ وكىنىشتى قازاعا بايلانىستى جولداعان كوڭىل ايتۋ جەدەلحاتىن وقىپ بەردى. قايعىعا ورتاقتاسقان مۇنداي جەدەلحاتتار سەنات ءتوراعاسى ق.توقاەۆتان, باسقا دا ءبىرقاتار لاۋازىمدى, بەلگىلى ادامداردان كەلگەن ەكەن. پرەزيدەنت اكىمشىلىگى ىشكى ساياسات ءبولىمىنىڭ مەڭگەرۋشىسى دارحان مىڭباي اقىننىڭ ولمەس تۋىندىلارى ونىڭ ەكىنشى ءومىرىن باستاعاندىعىن اتاپ كورسەتتى.
ۇلكەن دەلەگاتسيانى باستاپ كەلگەن باتىس قازاقستان وبلىسىنىڭ اكىمى باقتىقوجا ءىزمۇحامبەتوۆ تۋعان ەلى مەن جەرىنىڭ الىپ پەرزەنتىنە دەگەن ىستىق ءسۇيىسپەنشىلىگى مەن سوڭعى قوش-قوشىن جەتكىزدى. بۇدان كەيىن ءسوز العان قادەكەڭنىڭ قالامداس تا قاناتتاس ءھام مۇراتتاس اعا-ىنىلەرى مەن دوستارى شەريازدان ەلەۋكەنوۆ, تۇمانباي مولداعاليەۆ, ءاسانالى ءاشىموۆ, بەكسۇلتان نۇرجەكەەۆ, اقۇشتاپ باقتىگەرەەۆا ەلىنە كەنىشتى جىر, كەنەن سىر تولعاپ ءوتكەن ازامات اقىن جايىندا جۇرەكجاردى سوزدەرىن تولعادى. «قازاق باردا قادىر بار, حالقى باردا قادىر اقىن ولمەيدى», دەدى ولار. اسىرەسە, تۇماعاڭنىڭ قيماس اسىل دوسقا ارناعان اق ادال جىرى كوڭىلدەردى ەلجىرەتە ەگىلتتى. ءبىرتۋار ازاماتپەن قوشتاسۋعا قىزىلوردا وبلىسى ارنايى دەلەگاتسيا جىبەرىپتى. الماتى قالاسى اكىمىنىڭ ورىنباسارى سەرىك سەيدۋمانوۆ اقىن ەسىمىن ەستە قالدىرۋعا بايلانىستى شارالار ويلاستىراتىنىن ايتىپ جاتىر.
جارتى عاسىردان استام «جىر كەمەسىن كوك داۋىلمەن جاعالاستىرعان» دانا شايىردىڭ ءمايىتىن اقىرىندا, ءوزى ايتقانداي, كەڭسايداعى «قابىرستان قۇشاعىمەن قاۋسىردى». قازاقتىڭ تاعى ءبىر ۇلى اقىنىنىڭ ارۋاعىنا باعىشتالىپ قۇران وقىلىپ, اسى بەرىلدى.
قورعانبەك امانجول.