«ادىلدىك سوتتاردا عانا سالتانات قۇرۋى ءتيىس» دەگەن ەلباسىنىڭ ءسوزى سوڭعى كەزدەرى شىندىققا ۇلاسا باستاعانى ايقىن اڭعارىلىپ وتىر. الايدا سوتتاردىڭ دا سوتى بار دەمەكشى, ەلىمىزدىڭ جوعارعى سوتى بولماسا, ادىلدىكتىڭ اۋىلى ءالى دە الىستاي بەرەر مە ەدى, كىم بىلەدى. بۇعان دالەلدەر دە تابىلىپ جاتىر. ماسەلەن, جوعارعى سوتتىڭ ءباسپاسوز قىزمەتى حابارلاعانداي, ەلىمىزدىڭ جوعارعى سوتى استانا قالاسى, الماتى جانە اقتوبە وبلىسى سوتتارىنىڭ بۇرىنىراقتا شىعارعان ءۇش سوت اكتىسىنىڭ كۇشىن جويىپ, «مەترو كەش ەند كەرري» جشس-ءنىڭ تالاپ ارىزىن قاناعاتتاندىردى. مىنە, وسىلايشا, جالپى سوماسى 107 488 739 تەڭگە قۇرايتىن يمپورتتىق كەدەن الىمىن, قوسىمشا قۇن سالىعى مەن ۇستەمەاقىنى قوسۋ تۋرالى كەدەن ورگاندارىنىڭ حابارلاماسى زاڭسىز دەپ تانىلىپ, كۇشى جويىلدى. ايتپەسە, جاعداي مۇلدە باسقاشا ءوربيتىن ەدى.
ال اتالعان داۋدىڭ بايىبىنا كەلەر بولساق, «مەترو كەش ەند كەرري» جشس 2012 جىلعى 6 قاڭتارداعى كەشەندى كاسىپكەرلىك ليتسەنزيا (فرانچايزينگ شارتى) بويىنشا قازاقستاندا قىزمەت ەتە ءجۇرىپ, 2011-2014 جىلدارى سىرتتان اكەلىنگەن تاۋارلارعا تولەم جاساۋ كەزىندە 724 032 040 تەڭگە كولەمىندە كەدەندىك قۇندى قوسپاعان. بۇل جاعداي الماتى قالاسى بويىنشا كەدەندىك باقىلاۋ دەپارتامەنتى جۇرگىزگەن تەكسەرىس ناتيجەسىندە انىقتالىپ, يمپورتتالاتىن تاۋارلاردىڭ كەدەندىك قۇنى تۇسىرىلگەن دەگەن قورىتىندى جاساعان. بۇل, ءوز كەزەگىندە, استانا قالاسى, اقتوبە جانە الماتى وبلىستارى بويىنشا 107 488 739 تەڭگە كولەمىندە كەدەندىك تولەمدەر, سالىقتار مەن وزگە دە ۇستەمەاقىلارعا قوسىمشا اقىنىڭ قوسىلۋىنا الىپ كەلگەن.
دەي تۇرعانمەن, كەدەن وداعىنىڭ كەدەن شەكاراسى ارقىلى تاسىمالداناتىن تاۋارلاردىڭ كەدەندىك قۇنىن انىقتاۋ تۋرالى 2008 جىلعى 25 قاڭتارداعى كەلىسىمنىڭ 5-بابىنىڭ 1-تارماعىنىڭ 7-تارماقشاسىنا سايكەس سىرتتان اكەلىنەتىن تاۋارلاردىڭ كەدەندىك قۇنىنا ليتسەنزيالىق تولەمدەردى قوسۋ شارتتارىنا ولاردىڭ سىرتتان اكەلىنەتىن تاۋارلار بولىپ تابىلاتىندىعى جانە باعالاناتىن تاۋارلاردى ساتۋ شارتى رەتىندە تىكەلەي نەمەسە جاناما بۇل تولەمدەردى تولەۋ نەمەسە تولەۋ قاجەتتىلىگى جاتادى.
سونداي-اق, «مەترو كەش ەند كەرري» جشس-ءنىڭ سىرتتان اكەلەتىن تاۋارلاردىڭ كەدەندىك قۇنىنا تولەمدەردى جۇرگىزۋ شارتىنىڭ جوقتىعى ءىستى قاراۋ بارىسىندا انىقتالىپ, ءتيىستى ماتەريالدارمەن راستالعان. ونىڭ ۇستىنە دەربەس تاۋارلىق بەلگىلەردى قولدانعانى ءۇشىن ليتسەنزيالىق تولەمدەر اۋدارىلماعان جانە اتالعان سەرىكتەستىك تاراپىنان ناقتى تولەنبەگەن كورىنەدى.
الەكساندر تاسبولاتوۆ,
«ەگەمەن قازاقستان».