ءبىلىم گرانتىنا يە بولمايدى
اتا-انانىڭ ۇكىلەگەن ۇلى مەن قىزىنان كۇتەر ءۇمىتى – ۇلتتىق بىرىڭعاي تەستىلەۋدە جاقسى ناتيجەگە قول جەتكىزىپ, ءبىلىم گرانتىن جەڭىپ الۋ. بيىلعى جىلى تەستىلەۋ 2-15 ماۋسىم ارالىعىندا وتەدى. سۇرىنگەن جاعدايدا قايتا تاپسىرۋعا مۇمكىندىك بار. الايدا, سىناقتان ەكىنشى مارتە وتكەندەر ءبىلىم گرانتىنا يە بولا المايدى.
– تەستىنى قايتا تاپسىرۋ 25 تامىزدان باستالادى. ەرەجەسى تالاپكەرلەردىڭ كەشەندى تەستىلەۋ ەمتيحانىنا تولىق سايكەس كەلەدى, – دەيدى ءبىلىم جانە عىلىم مينيسترلىگى ۇلتتىق تەستىلەۋ ورتالىعىنىڭ ديرەكتورى قالي ابديەۆ.
ۇلتتىق بىرىڭعاي تەستىلەۋگە بايلانىستى پسيحولوگ ماماندار دا ءوز ويلارىن ايتىپ جاتىر. ولاردىڭ پىكىرىنشە, مەكتەپ تۇلەگىنىڭ تەستىلەۋدە جاقسى ناتيجەگە قول جەتكىزۋى تىكەلەي اتا-اناعا دا بايلانىستى.
– تەستىلەۋگە دايىندىق بارىسىندا بارلىق اتا-انا بالامەن دوستىق قارىم-قاتىناستا بولۋى ءتيىس. سەنىمسىزدىك تانىتۋ بالانىڭ بويىندا ۇرەيدىڭ پايدا بولۋىنا اكەلەدى, – دەيدى پسيحولوگ نازىم ۇيسەنبەكقىزى.
ايتا كەتەيىك, العاشقى تەستىلەۋدەن وتە الماي قالعاندار ەكىنشى مارتە تاپسىرۋ ءۇشىن مەملەكەت بەلگىلەگەن قارجىنى تولەۋى ءتيىس. ول شامامەن 2000 تەڭگە كولەمىندە.
تورەبەك تۇرمانوۆ.