استانا. 12 ءساۋىر. قازاقستان پرەزيدەنتى نۇرسۇلتان نازارباەۆ يراندا حولدينگ جانە كومپانيا باسشىلارىمەن كەزدەستى. بۇل تۋرالى akorda.kz-كە سىلتەمە جاساعان egemen.kz ءتىلشىسى حابارلادى.
كەزدەسۋگە ءتۇرلى سالالاردا, سونىڭ ىشىندە ەنەرگەتيكا, اۋىل شارۋاشىلىعى, قۇرىلىس, تاۋ-كەن ءوندىرۋ سالالارىندا جۇمىس ىستەيتىن Imidro, Ghadir Investments Group, Sunir Group, IRISL, Jahad-eSabz سياقتى 20-دان استام يران كومپانيالارىنىڭ باسشىلارى قاتىستى. كومپانيا باسشىلارى قازاقستانمەن ارادا بىرقاتار يگەرىلگەن جانە جاڭا باعىتتار بويىنشا ىنتىماقتاستىقتىڭ الەۋەتى زور ەكەنىن اتاپ ءوتتى. سوعان وراي ولار جۇزەگە اسىرىلىپ جاتقان بىرلەسكەن جوبالار تۋرالى ايتا كەلىپ, بايلانىستاردى جولعا قويۋ ماسەلەسىنە زور قىزىعۋشىلىق تانىتتى.
قازاقستان پرەزيدەنتى دە بىرقاتار باعىتتار بويىنشا ىنتىماقتاستىقتى جانداندىرۋعا مۇددەلىلىك بار ەكەنىن ءبىلدىردى. بۇل ورايدا نۇرسۇلتان نازارباەۆ يران كومپانيالارىن «قازاقستان-تۇرىكمەنستان-يران» تەمىرجولىنىڭ الەۋەتىن بەلسەنە پايدالانۋعا شاقىردى.
مەملەكەت باسشىسى ءبىزدىڭ ەلمەن ءوزارا ءىس-قيمىلدىڭ ارتىقشىلىقتارى تۋرالى ەگجەي-تەگجەيلى باياندادى. قازاقستاننىڭ ەۋرازيالىق ەكونوميكالىق وداققا مۇشە بولىپ تابىلۋى يران كومپانيالارىنا وداقتىڭ وزگە ەلدەرىمەن كەدەندىك باج سالىعىنسىز ساۋدا جاساۋىنا مۇمكىندىك بەرەدى. بۇعان قوسا, ءبىزدىڭ ەل تاياۋدا دۇنيەجۇزىلىك ساۋدا ۇيىمىنا قوسىلدى, ەۋروپالىق وداقپەن كەڭەيتىلگەن سەرىكتەستىك تۋرالى كەلىسىمگە قول قويدى, سونداي-اق, وڭىردە ينۆەستيتسيالىق احۋال ەڭ ۇزدىك كورسەتكىشتەرگە يە بولىپ وتىر.
نۇرسۇلتان نازارباەۆ ەلىمىز ينۆەستورلار ءۇشىن ينۆەستيتسيالىق سۋبسيديالاردى, زاڭناما تۇراقتىلىعىن, سالىق جەڭىلدىكتەرىن قاراستىراتىن اۋقىمدى ارتىقشىلىقتار توپتاماسىن ۇسىنا الاتىنىن ايتتى. بۇعان قوسىمشا, «100 ناقتى قادام» ۇلت جوسپارى اياسىندا ينۆەستيتسيالىق احۋالدى جاقسارتۋ جونىندە بىرقاتار رەفورما جۇزەگە اسىرىلۋدا. سونداي-اق, ەلدە اۋقىمدى جەكەشەلەندىرۋ جۇرگىزىلۋدە. حالىقارالىق قارجى ورتالىعى جۇمىسىن باستايدى.
قازاقستان پرەزيدەنتى كەلەسى جىلى ەلىمىزدە «بولاشاقتىڭ ەنەرگياسى» تاقىرىبىمەن «ەكسپو-2017» حالىقارالىق مامانداندىرىلعان كورمەسى وتەتىنىن ەسكە سالدى جانە سوعان بايلانىستى بالاما ەنەرگەتيكا سالاسىنداعى وزىق تەحنولوگيالارعا قىزىعۋشىلىق بار ەكەنىن ايتتى.
مەملەكەت باسشىسى قازىرگى كەزدە قازاقستاندا باسىمدىلىعى بار بىرقاتار مەملەكەتتىك باعدارلامالار جۇزەگە اسىرىلىپ جاتقانىن, ولارعا يران كومپانيالارى قاتىسا الاتىنىن اتاپ ءوتتى. بۇلار – ينفراقۇرىلىمدى دامىتۋعا ارنالعان «نۇرلى جول» باعدارلاماسى, يندۋستريالاندىرۋ باعدارلاماسىنىڭ ەكىنشى كەزەڭى جانە اۋىل شارۋاشىلىعىن دامىتۋ باعدارلاماسى.
سونىمەن قاتار, قازاقستان يرانمەن مەديتسينا, بيوتەحنولوگيا, اگروتەحنولوگيا, عارىش تەحنولوگياسى سياقتى سالالاردا ىنتىماقتاستىقتى دامىتۋعا مۇددەلى. سونداي-اق ءوزارا ءىس-قيمىل قازىرگى كەزدە ەلىمىزدە دامىتىلىپ جاتقان يننوۆاتسيالىق كلاستەرلەر نەگىزىندە جۇزەگە اسىرىلۋى مۇمكىن.
سوڭىندا نۇرسۇلتان نازارباەۆ يران كومپانيالارىنىڭ سىندارلى ىنتىماقتاستىققا دەگەن نيەتىن قازاقستان جوعارى باعالايتىنىنا نازار اۋدارىپ, ولارعا جۇمىستارىنىڭ جەمىستى بولۋىنا تىلەكتەستىگىن ءبىلدىردى.
تالعات رايىمبەك.
دەرەك, فوتو: egemen.kz.