استانا. 11 ءساۋىر. قازاقستان مەن يران پرەزيدەنتتەرىنىڭ كەزدەسۋ قورىتىندىسىنا ارنالعان بىرلەسكەن بريفينگى ءوتتى. بۇل تۋرالى akorda.kz-كە سىلتەمە جاساعان egemen.kz ءتىلشىسى حابارلادى.
بريفينگ بارىسىندا كەلىسسوزدەردە ساۋدا قاتىناستارىن دامىتۋ ءۇشىن بيزنەسمەندەرگە ۆيزا بەرۋ ۇدەرىسىن جەڭىلدەتۋ ماسەلەلەرى تالقىلانعانى اتاپ ءوتىلدى. سونداي-اق اۋىل شارۋاشىلىعى, عىلىم, تەحنولوگيا جانە مادەنيەت سالالارىنداعى ىنتىماقتاستىقتىڭ اياسىن كەڭەيتۋ جايى ايتىلدى.
تاراپتار كولىك-لوگيستيكا, سونداي-اق, ەكولوگيانى قورعاۋ, كاسپيدە كەمە قاتىناسى مەن ءتۋريزمدى دامىتۋ سالالارىنداعى جانە كاسپي تەڭىزىنىڭ قۇقىقتىق مارتەبەسى جونىندەگى قۇجاتتارعا قول قويۋ بارىسىنداعى ءوزارا ءىس-قيمىلدى نىعايتۋدىڭ ماڭىزدىلىعىن اتاپ ءوتتى. مەملەكەتتەر باسشىلارى ەكسترەميزممەن جانە تەرروريزممەن كۇرەسۋ, يراك, اۋعانستان, سيريا اۋماعىنداعى تۇراقتىلىقتى قامتاماسىز ەتۋ, سونداي-اق, يەمەندەگى قاقتىعىستى ساياسي شەشىمدەر نەگىزىندە توقتاتۋ قاجەتتىگىن ايتتى.
نۇرسۇلتان نازارباەۆ حاسان ءرۋحانيدى جانە بۇكىل يران حالقىن يادرولىق ماسەلەنى شەشۋدەگى قول جەتكەن تابىستارىمەن, ەلدىڭ الدىنان زور مۇمكىندىكتەر اشاتىن سانكتسيالاردىڭ الىنۋىمەن قۇتتىقتادى.
ەلباسى قالىپتاسقان جاعدايعا قاراماستان ءبىزدىڭ ەلدىڭ يرانمەن جوعارى دەڭگەيدەگى قارىم-قاتىناستا بولعانىن ايتتى.
مەملەكەت باسشىسى وسى ساپار اياسىندا مەتاللۋرگيا, تاۋ-كەن, اۋىل شارۋاشىلىعى, كولىك-لوگيستيكا, تۋريزم, عىلىم جانە ءبىلىم, مەديتسينا سالالارىندا جالپى قۇنى 2 ميلليارد دوللار بولاتىن 66 ەكىجاقتى قۇجاتقا قول قويىلعانىنا نازار اۋداردى.
نۇرسۇلتان نازارباەۆ حاسان ءرۋحانيدىڭ تىكەلەي اتسالىسۋىمەن قازاقستان-تۇرىكمەنستان-يران تەمىرجول قۇرىلىسىنىڭ جوباسى جۇزەگە اسىرىلعانىن ايتتى.
«العاشقى كونتەينەرلىك پويىز شىعىس قىتايدان يرانعا 12 كۇندە كەلدى. تەڭىز ارقىلى تاسىمال ەكى ەسە ۋاقىت الار ەدى», – دەدى قازاقستان پرەزيدەنتى.
نۇرسۇلتان نازارباەۆ يران مەن ساۋد ارابياسى اراسىنداعى قارىم-قاتىناستى كەلىسسوز ارقىلى جولعا قويۋدىڭ ماڭىزدىلىعىن ايتتى.
مەملەكەت باسشىسى ەلدەرىمىزدىڭ اراسىن قازىرگى ۋاقىتتا ءۇش بىردەي كولىك باعىتى – تەمىرجول, اۆتوموبيل جولى جانە كاسپي تەڭىزى جالعاپ جاتقانىن, مۇنىڭ قارىم-قاتىناستى بۇدان ارى دامىتۋعا وڭ ىقپالىن تيگىزەتىنىن اتاپ ءوتتى.
سوڭىندا قازاقستان پرەزيدەنتى كەزدەسۋدى جوعارى دەڭگەيدە ۇيىمداستىرعانى ءۇشىن العىس ايتىپ, حاسان ءرۋحانيدى ەلىمىزگە رەسمي ساپارمەن كەلۋگە شاقىردى.
يران پرەزيدەنتى قازاقستان تاۋەلسىزدىك العان ۋاقىتتان بەرى دوستاس ەل بولىپ كەلە جاتقانىنا توقتالدى.
«قازاقستان ءاردايىم بىزگە جاقىن بولدى, يراننىڭ «التىلىقپەن» يادرولىق كەلىسسوزدەرىنىڭ ەكى راۋندىن وتكىزۋگە كومەكتەستى. ەندى بىرلەسكەن جالپىعا ورتاق ءىس-قيمىل جوسپارى اياسىندا قول ۇشىن سوزۋدا», – دەدى حاسان رۋحاني.
يران پرەزيدەنتى ەكى ەل اراسىندا ەركىن ساۋدا اينالىمىنا مۇمكىندىك اشاتىن جاڭا قۇجاتتاردى راتيفيكاتسيالاۋدىڭ جانە يران مەن ەۋرازيالىق ەكونوميكالىق وداق اراسىندا باسىمدىعى بار تاريفتەر قالىپتاستىرۋدىڭ ماڭىزدىلىعىن ايتتى.
تالعات رايىمبەك.
دەرەك, فوتو: akorda.kz.