جاڭعىرتۋ جوبالارىنىڭ جەمىسى
وڭىرلىك كوممۋنيكاتسيا قىزمەتىندە شىعىس قازاقستان وبلىسىنىڭ اكىمى دانيال احمەتوۆ «100 ناقتى قادام» ۇلت جوسپارىنىڭ جۇزەگە اسىرىلۋ بارىسى تۋرالى ءباسپاسوز ءماسليحاتىن وتكىزدى. رەسپۋبليكالىق, وبلىستىق, قالالىق جانە اۋداندىق باق وكىلدەرى قاتىسقان جيىندا ءمالىم بولعانداي, ءوڭىر ەكونوميكاسىنىڭ جالپى كورسەتكىشتەرىندە ءوسىم بار. بيىلعى ءى توقساننىڭ قورىتىندىلارى بويىنشا جالپى وڭىرلىك ءونىم كولەمى 500 ملرد. تەڭگەدەن اسىپ, 102 پايىز ءوسىمدى قۇرادى.
ۇلت جوسپارىندا كورسەتىلگەن 5 رەفورما اياسىندا اتقارىلعان جۇمىستارعا جەكەلەپ توقتالعان وبلىس باسشىسى العاشقى ءسوزدى كاسىبي مەملەكەتتىك اپپارات قۇرۋ شەڭبەرىندە جەرگىلىكتى اتقارۋشى ورگاندارعا مەملەكەتتىك اپپارات تيىمدىلىگىن ارتتىرۋ, ماماندار ءبىلىكتىلىگىن جوعارىلاتۋ, بيلىك ورگاندارىنداعى ادامداردىڭ ادالدىعى مەن تازالىعىن ساقتاۋعا ەرەكشە كوڭىل بولىنگەنىنەن باستادى.
ەڭ باستى ماسەلە – كادر. بىلىكتى مامان بارلىق ماسەلەنىڭ ءتۇيىنىن شەشەدى, دەگەن وبلىس باسشىسى كۇرشىم, ۇلان, كاتونقاراعاي, بەسقاراعاي اۋداندارىنىڭ جاڭادان تاعايىندالعان اكىمدەرى «ا» توبىنىڭ تالاپتارىنان تابىلعانىن, مەملەكەتتىك قىزمەتكە ءبىلىكتى مامانداردىڭ كەلۋىنە جاڭا رەفورمانىڭ جول اشقانىن جەتكىزدى.
زاڭ ۇستەمدىگىن قامتاماسىز ەتۋ شارالارىنا توقتالۋ بارىسىندا سوت جۇيەسى مەن قۇقىق قورعاۋ ورگاندارىنىڭ جۇمىسىن جاڭعىرتۋ شەڭبەرىندە قۇرىلعان جەرگىلىكتى پوليتسيا قىزمەتىنىڭ جەدەل ءارى دەر كەزىندە قيمىلداۋى ءۇشىن ۋچاسكەلىك ينسپەكتورلارعا 100 اۆتوكولىك ساتىپ الىناتىنىن جەتكىزدى. بۇل ماقساتقا وبلىس بيۋدجەتىنەن 285 ميلليون تەڭگە ءبولىندى. مەملەكەت باسشىسىنىڭ تاپسىرماسىنا سايكەس, جەرگىلىكتى پوليتسيا قىزمەتىن قوعام تاراپىنان باقىلاۋ مەن ونىڭ اشىقتىعىن قامتاماسىز ەتۋ ءۇشىن وبلىس ورتالىعى مەن مونوقالالاردا «قىلمىستىق قۇقىقبۇزۋشىلىق كارتاسى» ازىرلەندى. وبلىس اكىمىنىڭ ايتۋىنشا, بۇل كارتانى كەز كەلگەن ينتەرنەت قولدانۋشى جەكە باسىنىڭ قاۋىپسىزدىگىن ايقىنداۋ ماقساتىنا پايدالانا الادى. اتالعان كارتا قازىرگى كەزدە ريددەر مەن كۋرچاتوۆ قالالارىندا قولدانىسقا ەنگىزىلدى.
وبلىس ەكونوميكاسىنىڭ ءورىسى كەلەشەكتە دە ونەركاسىپتىڭ دامۋىمەن تىعىز بايلانىستى بولماق. سوندىقتان يندۋستريالاندىرۋ كارتاسىنىڭ جوبالارى نەگىزگى تىرەك ىسپەتتى. وبلىستا 890 ميلليارد تەڭگەگە 76 جوبا جۇزەگە اسىرىلۋدا. وسى جىلعا دەيىن 225,7 ميلليارد تەڭگەگە 48 جوبا ىسكە قوسىلسا, اعىمداعى جىلى 9,7 ميلليارد تەڭگەگە 10 جوبا جۇزەگە اسىرىلادى. ونىڭ ىشىندە ەكسپورتتىق نارىققا ءونىم شىعارۋعا ارنالعان اقتوعاي كەن بايىتۋ كەشەنى جانە وسكەمەن تولىق تسيكلدى اۆتوزاۋىتى مەن اۆتوبولشەكتەر تەحنوپاركىنىڭ قۇرىلىسىن ەرەكشە اتاپ وتۋگە بولادى. سونداي-اق, 2017-2018 جىلدارى قولدانىسقا بەرىلەتىن جارما اۋدانىنداعى باقىرشىق كەن بايىتۋ كەشەنى, بەسقاراعاي اۋدانىنداعى كوبالت-نيكەل ونىمدەرىن الۋ زاۋىتى, زىريان اۋدانىنداعى تۇرعىسىن گيدروەلەكتر ستانساسىنىڭ قۇرىلىستارى دا ماڭىزدى جوبالار قاتارىندا.
قازاقستان الەمنىڭ دامىعان 30 ەلىنىڭ قاتارىنا كىرۋى ءۇشىن شىعىس وڭىرىندە عىلىمعا نەگىزدەلگەن ەكونوميكا قۇرۋ قادامدارى قولعا الىندى. قازىرگى كەزدە تەحنولوگيالىق ۇدەرىستەردى وڭتايلاندىرۋ جانە ەكونوميكانىڭ ءتيىمدى جاڭا باعىتتارىن دامىتۋ ماقساتىندا 5,4 ميلليارد تەڭگەنى قۇرايتىن 10 ماڭىزدى عىلىمي-زەرتتەۋ جانە تاجىريبەلىك-كونسترۋكتورلىق جۇمىستار اتقارىلىپ جاتىر. ءبىلىم جانە عىلىم مينيسترلىگى تاراپىنان بۇل جوبانى قارجىلاندىرۋ باعدارلاماسى ازىرلەنۋدە.
ماقساتىمىز – ءوندىرىستى ءارتاراپتاندىرۋمەن بىرگە, يننوۆاتسيالىق تۇرعىدان جاساقتاۋ بولۋى ءتيىس. ەلباسى تاپسىرماسى بويىنشا, ءبىز عىلىمدى قاجەت ەتەتىن ەكونوميكا قۇرۋ جولىنا تۇستىك. وسى باعىتتا ءوڭىردىڭ الەۋەتىن تولىق دەڭگەيدە پايدالانۋدى كوزدەپ وتىرمىز. شەتەلدەردىڭ عىلىمي جەتىستىكتەرىنە شاتتانا بەرمەۋىمىز كەرەك. بىزدە عاجاپ ادامدار, دارىندى عالىمدار, ءبىلىمنىڭ مول قورى بار, دەگەن ءوڭىر باسشىسى الەمدە 5 تانتال وندىرەتىن زاۋىت بار ەكەنىن, ونىڭ ءبىرى وسكەمەندە ورنالاسقانىن, سونداي-اق, تيتاننىڭ ءتىس ەمدەۋ ەمحانالارىندا كەڭىنەن قولدانىسقا يە ەكەنىن, ونىڭ وڭدەلگەن ماتەريالىن 10 ەسە قىمباتقا ساتىپ العانشا, وزىمىزدە ءوندىرۋدىڭ الدەقايدا ءتيىمدى ەكەنىن ايتتى.
ماسەلەن, توموگرافيالىق قۇرىلعىلاردى تولىق جاساماي, ونىڭ ءبىر بولشەگىن ءوندىرۋدىڭ ءوزى ءونىمدى الەمدىك نارىققا شىعارۋعا جول اشادى. وڭىردە قولعا الىنعان جوبالار مەديتسينا, مۇناي-گاز سالاسىنىڭ دامۋىنا ءجانە ءوندىرىستىڭ تەحنولوگيالىق قالدىقتارىن وڭدەۋگە جانە ءتيىمدىلىگى تومەن كەندەردەن قۇندى مەتالل الۋعا باعىتتالىپ وتىر. دانيال احمەتوۆتىڭ ايتۋىنشا, بۇل جوبالار ءوڭىر كاسىپورىندارىنا ەنگىزىلگەن سوڭ ەل ەكونوميكاسىمەن بىرگە, تۇرعىنداردىڭ ءومىر ءسۇرۋ دەڭگەيىنە دە وڭ اسەر ەتەتىن بولادى. جاڭا ءوندىرىس تاجىريبەسى پايدا بولىپ, جۇمىس ورىندارى اشىلادى, جۇزدەگەن ميلليارد تەڭگەنىڭ جوعارى تەحنولوگيالىق ءونىمى الىنادى, ءوڭىردىڭ ەكولوگيالىق احۋالى دا جاقسارادى.
ايماق باسشىسى مەملەكەتتىك رەسۋرستاردىڭ قاجەتتى ينفراقۇرىلىمعا جۇمسالاتىن شىعىندارىن ازايتۋ ماقساتىندا مەملەكەت-جەكەمەنشىك ارىپتەستىگى باعدارلاماسىن جۇزەگە اسىرۋعا دەن قويىلىپ وتىرعانىن جەتكىزدى. ناتيجەسىندە, بيىل وبلىستىڭ مەملەكەتتىك ينۆەستيتسيالارعا شاققانداعى دامۋ بيۋدجەتى 2015 جىلمەن سالىستىرعاندا 38 ميلليارد تەڭگەگە تومەندەدى. بۇل ورايدا ەۋروپا قايتا قۇرۋ جانە دامۋ بانكى, حالىقارالىق دامۋ ينستيتۋتتارىنان قارجى تارتۋ مىندەتى قويىلدى. سوڭعى 3-4 ايدىڭ ىشىندە وبلىستاعى ينجەنەرلىك ينفراقۇرىلىمدى دامىتۋ بويىنشا ەۋروپا قايتا قۇرۋ جانە دامۋ بانكىمەن 22 ميلليارد تەڭگەنى قۇرايتىن كەلىسىمدەرگە قول قويىلدى.
وبلىستا 135 ميلليارد تەڭگەنى قۇرايتىن 23 كونتسەسسيالىق جوبا اياقتالۋعا جاقىن. وسى نەگىزدە وسكەمەن مەن سەمەي قالالارىنىڭ وزىندە 11 بالاباقشا قۇرىلىسى جوسپارلانىپ وتىر. قازىرگى تاڭدا مەملەكەت-جەكەمەنشىك ارىپتەستىگى اياسىندا جەكەمەنشىك بالاباقشالاردى اشۋ ءۇردىسى بايقالۋدا. ماسەلەن, وتكەن جىلى 2645 ورىنعا ارنالعان 28 جەكەمەنشىك بالاباقشا اشىلدى. وسى باعدارلاما نەگىزىندە سوڭعى شيرەك عاسىر بويى كوتەرىلىپ كەلە جاتقان بۇقتىرما سۋ قويماسى ارقىلى وتەتىن كوپىر قۇرىلىسىن سالۋ جوسپارلانىپ وتىر. وبلىس اكىمى كوپتەگەن ينۆەستورلار قىزىعۋشىلىق تانىتىپ وتىرعان الەۋمەتتىك ماڭىزى جوعارى ءىرى نىساننىڭ قۇرىلىسى جاقىن ارادا باستالاتىنىنا سەنىم ءبىلدىردى.
ۇلت جوسپارىنا سايكەس, قۇرىلىس سالاسىندا دا تىڭ وزگەرىستەر بايقالۋدا. رۇقسات الۋ قۇجاتتارىن ۇسىنۋ 15 جۇمىس كۇنىنە دەيىن قىسقاردى. نەگىزگى نازار جالدامالى جانە نەسيەلىك تۇرعىن ءۇي قۇرىلىسىنا ارنالىپ وتىر. اعىمداعى جىلى 322,5 مىڭ شارشى مەتر تۇرعىن ءۇي قولدانىسقا بەرىلمەك, ونىڭ ىشىندە تۇرعىن ءۇي قۇرىلىس جيناق جۇيەسى ارقىلى 126 مىڭ شارشى مەتر باسپانا پايدالانۋعا بەرىلەدى.
جولدار – قاي ەلدىڭ بولماسىن ءومىر ءسۇرۋ ساپاسىنىڭ ماڭىزدى كورسەتكىشى. 58 قادامعا سايكەس, اعىمداعى جىلى ءبىز تولىق جوندەۋ جۇمىستارىنا كەتەتىن شىعىندى ورتاشا جوندەۋ جۇمىستارىنا اۋىستىردىق. بۇل 10,6 ملرد. تەڭگەگە 387 شاقىرىم جولدى قالپىنا كەلتىرۋگە مۇمكىندىك بەرەدى. سونداي-اق, دەمالىس بازالارىنا باراتىن باعىتتار بويىنشا سىبە كولدەرى, الاكول, بۇقتىرما سۋ قويماسى, «كوگىلدىر بۇعاز» اۋماعى, سونىمەن قاتار, وسكەمەن مەن سەمەي, اياگوز بەن اقسۋات ارالارىنداعى جولدار جوندەلەدى, دەدى وبلىس اكىمى.
«قازاۆتوجول» استانا – ءوسكەمەن باعىتىنداعى ورتالىق – شىعىس حالىقارالىق كولىك ءدالىزىن, سونداي-اق, «نۇرلى جول» باعدارلاماسى بويىنشا رەسپۋبليكالىق الماتى – وسكەمەن اۆتوجولىن قايتا جوندەۋدەن وتكىزۋدى قىتايدىڭ ەكسيم بانكىنەن نەسيە الۋ ارقىلى جالعاستىرۋ ءماسەلەسىن قاراستىرۋدا.
ءباسپاسوز ءماسليحاتىندا وبلىس اكىمى ەكى ساعاتقا جۋىق ۋاقىت ءوڭىردىڭ ەكونوميكالىق-الەۋمەتتىك دامۋىنا تىڭ سەرپىن بەرەتىن باعدارلامالار مەن جوبالاردىڭ, ونىڭ ىشىندە شىعىس قازاقستان وبلىسىندا العاش رەت جۇزەگە اسىرىلىپ جاتقان قاناتقاقتى جوبالار تۋرالى كەڭىنەن اڭگىمەلەپ, ءتىلشىلەردىڭ ساۋالدارىنا جاۋاپ بەردى.
وسكەمەندىك اۆتوكولىك ءوندىرىسى وتكىزۋ نارىعىن كەڭەيتۋدە
ەلىمىزدىڭ ەكسپورتتىق الەۋەتىن كوتەرۋ ماقساتىندا شىعىس وڭىرىندە جۇزەگە اسىرىلىپ جاتقان ماڭىزدى يندۋستريالىق جوبالاردىڭ ءبىرى تولىق تسيكلدى اۆتوزاۋىت جانە اۆتوبولشەكتەر ءوندىرىسى بويىنشا تەحنوپارك قۇرىلىسى بولىپ وتىر. قۇنى 112,8 ميلليارد تەڭگەگە باعالانعان جوبا ارقىلى 4 مىڭ جۇمىس ورنىن قۇرۋ كوزدەلگەن. بۇگىندە مەملەكەتتىك ينۆەستيتسيا ەسەبىنەن 6 ميلليارد تەڭگەگە جۋىق قارجىعا ينفراقۇرىلىم قۇرىلىسى جۇرگىزىلۋدە. قازىر اتالعان قارجىنىڭ 1,4 ميلليارد تەڭگەسى يگەرىلدى, ال بيىل 2,5 ميلليارد تەڭگە بولىنبەك. بۇل جوبا اۆتوكولىك كلاستەرىن قۇرۋ شەڭبەرىندە ىسكە اسىرىلىپ جاتىر. قازىر قازاقستاندىق اۆتوونەركاسىپ ءۇشىن وتە كۇردەلى كەزەڭ. باعا اراسىنداعى ينتەرۆەنتسياعا وراي, ەلىمىزگە سوڭعى ەكى جىلدا رەسەيدەن 300 مىڭعا جۋىق اۆتوكولىك كەلدى. بۇل وتكەن جىلى «ازيا اۆتو» اق اۆتوكولىك ءوندىرىسىن 80 پايىزعا دەيىن تومەندەتىپ, اتالعان سالادا ونەركاسىپتىك ونىمدەر كولەمى 85 ميلليارد تەڭگە جوعالتتى.
وسىعان وراي, جەرگىلىكتى اۆتوكولىك ءوندىرىسىنىڭ تۇتىنۋ نارىعىن ساقتاۋ ءارى كەڭەيتۋ ماقساتىندا وبلىس اكىمى دانيال احمەتوۆ ازەربايجان, تاجىكستان, قىرعىزستان جانە موڭعوليا ەلدەرىنىڭ ۇكىمەت جەتەكشىلەرىمەن كەزدەسۋلەر وتكىزدى. اتاپ ايتقاندا, ازەربايجان رەسپۋبليكاسىنىڭ پرەمەر-ءمينيسترى ارتۋر راسي-زادەمەن, قىرعىز رەسپۋبليكاسى پرەمەر-ءمينيسترىنىڭ ورىنباسارى ولەگ پانكراتوۆپەن, تاجىكستان رەسپۋبليكاسى پرەمەر-ءمينيسترىنىڭ ورىنباسارى ازيم يبراحيممەن, موڭعوليا پرەمەر-ءمينيسترىنىڭ ورىنباسارى تسەرەنداشين ويۋنبااتارمەن جۇزدەستى. وسى ساپارلار اياسىنداعى كەزدەسۋلەر بارىسىندا تاراپتار كولىك جانە اۆتوكولىك ونەركاسىبى سالاسىنداعى ەكىجاقتى ارىپتەستىكتى دامىتۋ ماسەلەلەرىن تالقىلادى. ونىڭ ىشىندە اتالعان ەلدەردىڭ نارىعىنا «بيپەك اۆتو-ازيا اۆتو» حولدينگى ونىمدەرىن تاسىمالداۋ ماسەلەسى قاراستىرىلدى. سونداي-اق, كولىك جانە اۆتوكولىك ونەركاسىبى سالاسىنداعى الەۋەتتى كاسىپكەرلەرمەن, سەرىكتەستەرمەن كەزدەسۋ ۇيىمداستىرىلىپ, وسكەمەندىك اۆتوزاۋىت جانە اۆتوبولشەكتەر ءوندىرىسىنىڭ جوباسى تانىستىرىلدى.
وڭىردەگى اۆتوونەركاسىپ ورىندارى 2016 جىلدىڭ العاشقى جارتىجىلدىعىندا LADA ونىمدەرىنىڭ 3121, Granta, Kalina, Priora, ال ەكىنشى جارتىجىلدىقتا Vesta, X-RAY, Largus سىندى جاڭا ءتۇرلەرىن شىعارۋدى جوسپارلاپ وتىر.
ايتا كەتكەن ابزال, 2015 جىلدىڭ قازان ايىندا ورتالىق ازيا ەلدەرىندەگى Lada اۆتوكولىكتەرىنىڭ ديستريبۋتسيا قۇقىعىنا «بيپەك اۆتو-ازيا اۆتو» حولدينگى يە بولعان ەدى. قازاقستان رەسپۋبليكاسى مەن رەسەي فەدەراتسياسى پرەزيدەنتتەرىنىڭ كەزدەسۋى شەڭبەرىندە قازاقستاندىق «بيپەك اۆتو-ازيا اۆتو» كومپانيالار توبى مەن رەسەيلىك «اۆتوۆاز» ااق باسشىلارى بىرىككەن ءىس-قيمىل تۋرالى كەلىسىمگە قول قويعان. ارىپتەستەر قىرعىزستان, وزبەكستان, تۇرىكمەنستان, تاجىكستان جانە موڭعوليا ەلدەرىنىڭ نارىعىنا تاۋار جەتكىزۋشى ينفراقۇرىلىمدى ءوزارا بىرىگە وتىرىپ, دامىتۋعا كەلىسكەن بولاتىن. بۇدان بۇرىن وسى ىسپەتتى كەلىسىم رەسەيدىڭ ءسىبىر جانە ورال فەدەرالدى وكرۋگتەرىنىڭ نارىعىنا قاتىستى قابىلدانعان ەدى. وسىلايشا, «بيپەك اۆتو-ازيا اۆتو» ەۋرازيالىق ەكونوميكالىق وداقتىڭ اۆتوكولىك نارىعىنا شىعۋ جوباسىن ساتىمەن جۇزەگە اسىرا باستاعان العاشقى قازاقستاندىق كومپانيا بولىپ وتىر. 2015 جىلى قازاقستاندىق حولدينگ رەسەيدىڭ 11 قالاسىنان 15 جەكەمەنشىك اۆتوورتالىق اشىپ, ساتۋ جەلىسىن قۇردى.
وسكەمەن.
ەت وندىرۋگە ەكپىن بەرىلەدى
شىعىس وڭىرىندە «100 ناقتى قادام» ۇلت جوسپارىنىڭ 60-61 قادامدارى اياسىندا اۋقىمدى جۇمىستار اتقارىلۋدا. مەملەكەت باسشىسىنىڭ ءسۇت جانە ءسۇت ءونىمدەرىن شىعارۋدى دامىتۋ ءۇشىن ستراتەگيالىق ينۆەستورلاردى تارتۋ ءجونىندەگى تاپسىرمالارىن ورىنداۋ ماقساتىندا تاۋارلى ءسۇت فەرمالارى مەن ءسۇت قابىلداۋ پۋنكتتەرىن قۇرۋ بويىنشا كەشەندى باعدارلاما قابىلدانعان بولاتىن. وسى ورايدا وبلىس كولەمىندە 37 تاۋارلى ءسۇت فەرماسىن قۇرۋ جوسپارلانعان بولاتىن. بىلتىر سونىڭ 13-ءى ءوز جۇمىسىن باستاپ كەتتى. ال بيىل 24 تاۋارلى ءسۇت فەرماسى مەن 12 ءسۇت قابىلداۋ پۋنكتىن ۇيىمداستىرۋ كوزدەلىپ وتىر. شىعىس قازاقستان رەسپۋبليكادا ءسۇت وندىرۋدەن العاشقى ۇشتىكتە تۇرسا دا, ءسۇت وڭدەۋ كاسىپورىندارىنىڭ 35 پايىزدىق قۋاتى عانا يگەرىلگەن. جوعارىداعى جوبالار ساتىمەن جۇزەگە اسار بولسا, ياعني ءسۇت ءوندىرىسىنە تۇرعىندار اراسىنداعى جەكە شارۋاشىلىقتاردىڭ الەۋەتىن قوسۋ ارقىلى ونى 52 پايىزعا دەيىن ارتتىرۋعا بولادى.
ەڭ باستىسى, 61-قادامدى ءجۇزەگە اسىرۋ شەڭبەرىندە وڭىردە ەت باعىتىنداعى مال باسىن كوبەيتۋ, تۇقىمدى تۇرلەندىرۋ جانە بورداقىلاۋ الاڭدارىن سالۋ جۇمىستارى جۇرگىزىلىپ جاتىر. وڭىرلىك كوممۋنيكاتسيا قىزمەتىندە وتكەن ءباسپاسوز ءماسليحاتى بارىسىندا وبلىس اكىمى دانيال احمەتوۆ مال شارۋاشىلىعىنىڭ ەت ءوندىرۋ الەۋەتىنە ەرەكشە نازار اۋدارىلىپ وتىرعانىن جەتكىزدى. وبلىس باسشىسىنىڭ ايتۋىنشا, نەگىزگى ءمىندەت – مال شارۋاشىلىعى ءونىمدەرىندەگى يمپورتتىق ۇلەستى ازايتۋ. سوندىقتان, ەت باعىتىنداعى شارۋاشىلىقتاردى ودان ءارى دامىتۋ ءۇشىن وڭىردە كەشەندى شارالار لەگى قابىلداندى. مال باسىن كوبەيتۋ, بورداقىلاۋ الاڭدارىن سالۋ, جەمشوپ بازاسىن پايدالانىلماي قالعان تەلىمدەردى اينالىمعا ەنگىزۋ ەسەبىنەن نىعايتۋ, ۆەتەرينارلىق احۋالدى وڭالتۋ سىندى جۇمىستار قولعا الىندى.
اگرارلىق سەكتور – ەكونوميكانىڭ دامۋىنا ايتارلىقتاي اسەر ەتەتىن سالالاردىڭ ءبىرى. بۇل رەتتە وبلىس ەكونوميكاسىنا ايتارلىقتاي سەرپىن بەرمەك جوبالاردىڭ ءبىرى – 3 مىڭ ءىرى قاراعا ارنالعان بورداقىلاۋ الاڭى مەن ەت وڭدەۋ كەشەنى العاش رەت كوكپەكتى اۋدانىندا ىسكە قوسىلاتىنىن ايتۋعا بولادى. بۇل كەشەندى بيىل ىسكە قوسۋ جوسپارلانىپ وتىر. جاڭا كاسىپورىننىڭ وندىرىستىك قۋاتى جىلىنا 6 مىڭ توننا سيىر ەتىن وندىرۋگە جەتەدى.
بۇدان وزگە, اياگوز اۋدانىندا جىلىنا 11,5 مىڭ توننا ەت ءوندىرۋ قۋاتىنا يە مال سويۋ تسەحى مەن ءبىر مەرزىمدە 1 مىڭ باس ءىرى قارا مەن 50 مىڭ قويعا ارنالعان بورداقىلاۋ الاڭىنىڭ قۇرىلىسىنا «ەۆرازيا اگرو حولدينگ» كومپانياسىمەن نەسيەلىك كەلىسىمگە قول قويىلدى. ال ءۇشىنشى جوبانى جۇزەگە اسىرۋ 2018 جىلعا جوسپارلانىپ وتىر. ءۇرجار اۋدانىندا ورنالاساتىن اۋقىمدى قۇس فابريكاسى جىلىنا 30 مىڭ توننا ەت وندىرمەك.
بەتتى دايىنداعان «ەگەمەن قازاقستان» گازەتىنىڭ
شىعىس قازاقستان وبلىسىنداعى مەنشىكتى ءتىلشىسى دۋمان اناش.