پارلامەنت سەناتى الەۋمەتتىك-مادەني دامۋ جانە عىلىم كوميتەتىنىڭ توراعاسى اقان بيجانوۆ بىشكەك قالاسىندا وتكەن ەۋرازيالىق ەكونوميكالىق وداقتى دامىتۋدىڭ كەلەشەگىنە ارنالعان فورۋمعا قاتىستى, دەپ حابارلادى قازاقستان رەسپۋبليكاسى پارلامەنتى سەناتىنىڭ ءباسپاسوز قىزمەتى.
سەناتور ءوز سوزىندە ەاەو-عا قاتىسۋشى ەلدەر ءۇشىن ىقپالداستىقتىڭ باسىمدىعىن اتاپ ءوتىپ, بۇل ايماقتىق بىرلەستىكتىڭ ەلەۋلى ەكونوميكالىق الەۋەتى بار ەكەنىنە نازار اۋداردى.
ا.بيجانوۆ قازىرگى كەزدە وسى ىقپالداستىق جوباسىنىڭ قىزمەت ەتۋى ءۇشىن سالماقتى قۇقىقتىق بازا قالىپتاسقانىن اتاپ ءوتتى. ونىڭ نەگىزىن ەۋرازيالىق ەكونوميكالىق وداق تۋرالى, قىرعىز رەسپۋبليكاسى مەن ارمەنيا رەسپۋبليكاسىنىڭ ەاەو تۋرالى شارتقا قوسىلۋى تۋرالى جانە باسقا دا شارتتار قۇرايدى. سەناتوردىڭ ايتۋىنشا, 2015 جىلدىڭ باسىنان بەرى 600-گە جۋىق قۇجات قابىلداندى, ولاردىڭ باسىم كوپشىلىگى ونەركاسىپ, ەنەرگەتيكا, كولىك جانە باسقا دا سالالاردى قامتيدى.
مۇنداي ىقپالداستىق, قازىرگى كەزدەگى جاعدايعا جاۋاپ بەرەتىنى داۋسىز جانە ۋاقىتتىڭ تالابىنا جاۋاپ بولىپ تابىلادى, تاراپتاردان ەاەو اياسىندا دا, ودان تىس تا ەكونوميكالىق ىنتىماقتاستىقتى ودان سايىن ۇدەتۋدى تالاپ ەتەدى, دەدى ا.بيجانوۆ.
سەناتور ەاەو-نىڭ ەۋروپا مەن ازياداعى مەملەكەتتەرمەن جانە ءتۇرلى ىقپالداستىق بىرلەستىكتەرىمەن, ونىڭ ىشىندە شىۇ-مەن ەركىن ساۋدا ايماعىن قۇرۋ تۋرالى ماسەلەدە ىنتىماقتاستىقتى دامىتۋدىڭ تارتىمدى كەلەشەگى تۋرالى ايتتى. ولارعا دا شەكارالىق ايماقتاعى ىنتىماقتاستىقتى ودان ءارى دامىتۋ جانە ەاەو-عا مۇشە مەملەكەتتەردىڭ ءوزارا پارلامەنتارالىق ءىس-قيمىلىن تەرەڭدەتۋ قاجەتتىگى دە اتاپ ءوتىلدى.