وبلىسقا ەكى كۇندىك ساپارمەن كەلگەن عارىشكەر, حالىق قاھارمانى ايدىن ايىمبەتوۆ ت.بيگەلدينوۆ اتىنداعى اۋە قارۋلى كۇشتەرى اسكەري ينستيتۋتىندا, فيزيكا-ماتەماتيكا باعىتىنداعى نازارباەۆ زياتكەرلىك مەكتەبىندە بولىپ, وقىپ جاتقان جاستارمەن بىرنەشە كەزدەسۋ وتكىزدى. سونىمەن بىرگە, ۇشقىش-عارىشكەر العا اۋدانىنىڭ جاستارىمەن دە كەزدەستى. نازارباەۆ زياتكەرلىك مەكتەبىندە قۇرمەتتى قوناققا وقۋ بولمەلەرىنە ەكسكۋرسيا ۇيىمداستىرىلدى, ونى شىعارماشىلىق جانە عىلىمي-زەرتتەۋ جۇمىستار كورمەسىمەن تانىستىردى.
ۇشقىش-عارىشكەردى سەگىزىنشى سىنىپ وقۋشىسى ءلاززات داناەۆا ازىرلەگەن ەلەكتروماگنيتتى تولقىننىڭ كومەگىمەن عارىش اپپاراتتارىن ۇشىرۋ جونىندەگى جوبالار قىزىقتىردى. مەكتەپ وقۋشىسىنىڭ ايتۋىنشا, مۇنداي تەحنولوگيالاردىڭ بولاشاعى زور, ەلەكتروماگنيتتى تولقىندارعا قاتىستى جوبالار ەكونوميكالىق تۇرعىدان عانا ءتيىمدى ەمەس, سونىمەن قاتار, ەكولوگيالىق جاعىنان قاۋىپسىز. نازارباەۆ زياتكەرلىك مەكتەبى وقۋشىلارىنىڭ عىلىمي جوبالارىمەن تانىسقان ايدىن ايىمبەتوۆ ولاردىڭ ءبىلىمى مەن وقۋعا دەگەن قۇلشىنىسىنا ريزاشىلىعىن ءبىلدىردى.
– عارىش سالاسىنىڭ مۇمكىندىگى زور. سوڭعى ۋاقىتتا جەر وربيتاسى ماڭىندا ءتۇرلى تاجىريبەلەر جۇرگىزىپ قانا قويماي, تاياۋداعى 15-20 جىلدا ايعا عارىشتىق ساپاردى جانداندىرۋ, پلانەتالار اراسىندا ۇشۋ سەكىلدى ماسەلەلەر كوتەرىلە باستادى, – دەپ اتاپ ءوتتى قازاقستاندىق جاستاردىڭ تالانتى مەن ءبىلىمى قازاقستانداعى كوسموناۆتيكانىڭ دامۋىنىڭ نەگىزگى قۇرامداسى بولۋى كەرەكتىگىن جەتكىزگەن ايدىن ايىمبەتوۆ.
بۇدان كەيىن ايدىن ايىمبەتوۆ ادام بالاسىنىڭ عارىشتى باعىندىرۋىنا 55 جىل تولۋىنا وراي ۇيىمداستىرىلعان عارىش اپتالىعىنىڭ اشىلۋ سالتاناتىنا قاتىستى. شارا ت.احتانوۆ اتىنداعى وبلىستىق دراما تەاترىندا ءوتتى. قازاق عارىشكەرىنىڭ پىكىرىنشە, مۇنداي شارالار زاماناۋي كوسموناۆتيكانىڭ جەتىستىكتەرىن پاش ەتۋ ءۇشىن, دەمەك, وسى سالانىڭ ودان ءارى دامۋى ءۇشىن قاجەت.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.