جاڭا قىلمىستىق, قىلمىستىق-اتقارۋ كودەكستەرى قارالدى
وسكەمەندە پارلامەنت سەناتى كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنىڭ كوشپەلى وتىرىسى ءوتتى.
«التاي» تەحنوپاركىندە وتكەن جيىنعا ەلىمىز باس پروكۋرورىنىڭ ءبىرىنشى ورىنباسارى ي.مەركەل, ۇلتتىق قاۋىپسىزدىك كوميتەتى توراعاسىنىڭ ءبىرىنشى ورىنباسارى س.ءابىش, ىشكى ىستەر ءمينيسترىنىڭ ورىنباسارى ر.جاقىپوۆ, ادىلەت ءمينيسترىنىڭ ورىنباسارى ز.بايمولدينا جانە باسقا دا مەملەكەتتىك ورگانداردىڭ وكىلدەرى, شەتەلدىك ارىپتەستەر رەتىندە IRZ جوبالارىنىڭ مەنەدجەرى ا.ۆۋكەر مەن گەرمانيانىڭ درەزدەن جانە گامبۋرگ قالالارى پروكۋراتۋرالارىنىڭ قىزمەتكەرلەرى قاتىستى.
القالى جيىندا جاڭا قىلمىستىق, قىلمىستىق-اتقارۋ كودەكستەرىن قولدانۋ ماسەلەلەرى قارالدى. وتىرىستى اشقان كوميتەت توراعاسى سەرىك اقىلباي 2014 جىلى قابىلدانعان جاڭا كودەكستەر جەكە ادام قۇقىقتارىن قورعاۋدىڭ كونستيتۋتسيالىق كەپىلدىكتەرىن كۇشەيتۋ, ادىلەتتى سوت ءوندىرىسى مەن قۇقىقتىق جاۋاپتىلىق شارالارىن قامتاماسىز ەتۋ ماقساتىندا ازىرلەنگەنىن اتاپ ءوتتى. اتالعان كودەكستەر ارقىلى قىلمىستىق جازانى تاعايىنداۋ بارىسىنداعى قادامدار وزگەرتىلىپ, ءبىتىستىرۋ راسىمدەرى, جولىن كەسۋدىڭ بالاما شارالارىن قولدانۋ مۇمكىندىگى قاراستىرىلدى. سونداي-اق, قىلمىستىق ءىستى قوزعاۋ ساتىسىنان باستاپ ادام قۇقىقتارىن قورعاۋ ۇدەرىسىندە وزىق تەتىكتەر ەنگىزىلدى. جاڭا قىلمىستىق-اتقارۋ كودەكسىمەن سوتتالعانداردى تۇزەلۋ دارەجەسىنە بايلانىستى ۇستاۋ جاعدايىن ناقتى جىكتەۋ بەلگىلەندى. سوتتالعانداردىڭ نەگىزگى قۇقىقتارى مەن مەكەمە اكىمشىلىگىنىڭ مىندەتتەرى العاش رەت كودەكس دەڭگەيىندە بەكىتىلدى, دەدى س.اقىلباي.
سونداي-اق, ول باستالعان رەفورمالاردىڭ ءىس جۇزىندە دۇرىستىعىن اتاپ ءوتتى. جاڭارعان قىلمىستىق زاڭناما جاعدايىندا تەرگەۋ جانە سوت ورگاندارىنا اۋىرتپالىقتى ەلەۋلى تۇردە ازايتاتىن, پروتسەسكە قاتىسۋشىلاردىڭ قۇقىقتارى مەن مۇددەلەرىن قورعاۋ كەپىلدىكتەرىن قامتاماسىز ەتۋگە مۇمكىندىك بەرەتىن جاڭا قۇقىقتىق جانە پروتسەستىك ينستيتۋتتار ناتيجەلى جۇمىس ىستەپ كەلەدى. ياعني, قابىلدانعان وزگەرىستەر دەموكراتيالىق, قۇقىقتىق مەملەكەتتەر سيپاتتارىنا جاۋاپ بەرەتىن قىلمىستىق جۇيەنى قالىپتاستىرۋعا باعىتتالعان, دەدى سەناتور.
جيىندا باس پروكۋروردىڭ ءبىرىنشى ورىنباسارى يوگان مەركەل, ىشكى ىستەر ءمينيسترىنىڭ ورىنباسارى راشيد جاقىپوۆ, وبلىستىق سوت توراعاسى دوسجان ءامىروۆ, وبلىس پروكۋرورى باعبان تايىمبەتوۆ, وبلىستىق ىشكى ىستەر دەپارتامەنتىنىڭ باسشىسى جاناربەك باقتىباەۆ بايانداما جاسادى. ولار قىلمىستىق سوت ءوندىرىسى, پروتسەستىك كەلىسىم, بەس بۋىندى سوت جۇيەسىنەن ءۇش بۋىنعا كوشۋ اياسىندا جانە باسقا ماسەلەلەر جونىندەگى تەرگەۋ سۋدياسىنىڭ, پروتسەسس پروكۋرورىنىڭ ءرولىن تالقىلاۋعا نازار اۋداردى. سونداي-اق, اتالعان سالالار بويىنشا زاڭنامانى ودان ءارى جەتىلدىرۋگە باعىتتالعان بىرقاتار ۇسىنىستار ورتاعا سالىندى.
ارينە, جاڭادان ەنگىزىلگەن جاڭالىقتاردى بىرلەسە تالقىلاۋ قۇقىق قورعاۋ تاجىريبەسىندە جيناقتالعان ناتيجەلەردى شىنايى تالداۋعا, قىلمىستىق زاڭنامانى ودان ءارى جەتىلدىرۋدىڭ نەگىزگى باعىتتارىن ايقىنداۋعا, سوتقا دەيىنگى ءوندىرىستى وڭتايلاندىرۋعا, ونىڭ قۇقىق قورعاۋ الەۋەتىن كۇشەيتۋگە مۇمكىندىك بەرەدى.
دۋمان اناش,
«ەگەمەن قازاقستان».
وسكەمەن.