الەم-جالەم الەم
شوتلانديادان اعىلشىننىڭ ۇلى دراماتۋرگى ۋيليام شەكسپيردىڭ 1623 جىلى جارىق كورگەن العاشقى پەسالار جيناعىنىڭ ءبىر داناسى تابىلدى.
وكسفورد ۋنيۆەرسيتەتىنىڭ ماماندارى جادىگەر ىسپەتتەس فوليانتقا بيۋت ارالىندا كەزدەسكەن. جيناققا 36 پەسا توپتاستىرىلىپتى. بۇلاردىڭ تەڭ جارتىسى, ياعني 18-ءى بۇرىن ەش جەردە جاريالانباعان تۋىندىلار ەكەن.
گاننيبالدىڭ قۇپياسىن كونە كوڭ اشىپ بەردى
عالىمدار ەجەلگى الەمنىڭ تاعى ءبىر قۇپياسىن اشتى. ولار گاننيبال مەن ونىڭ ارمياسىنىڭ ءالپى اسۋىنان وتكەن كەزىندە اتتاردان قالعان قيدىڭ قۇرامىن زەرتتەدى.
وقىمىستىلاردىڭ حالىقارالىق كومانداسى قۇرامىندا كلوستوريدي ەلەمەنتى كوپ قيدى كول دە لا تراۆەرسەت تاۋلى اسۋىنان تاپقان. ولارداعى بىرنەشە مىڭداعان جىلدار ءتىرى جاتا بەرەتىن ميكروبتار ءبىزدىڭ داۋىرىمىزگە دەيىنگى 218-201 جىلدارعى ەكىنشى پۋني سوعىسىنىڭ دەرەكتەرىنە دالدىك قوسىپ, كارفاگەن قولباسشىسى جاۋىنگەرلەرىنىڭ اسۋ بويلاپ جۇرگەن جولدارىن تۋرا سىزىپ شىعۋعا مۇمكىندىك بەردى.
قىتاي يمپەراتورىنىڭ ءمورى – $11,8 ميلليون
Sotheby’s اۋكتسيونىندا ساتىلىمعا شىعارىلعان تسين اۋلەتى كانسي يمپەراتورىنىڭ ءمورى 11,8 ميلليون دوللارعا ساۋدالاندى.
ەجەلگى زامانعى پاتشانىڭ ءمورىن ازيالىق ءبىر كوللەكتسيونەر جوعارىداعىداي باعاعا ساتىپ الدى. بۇل – وسى كەزگە دەيىن اۋكتسيوندا ساتىلعان يمپەراتورلار مورلەرى ىشىندەگى ءۇشىنشى كورسەتكىش. ءمور ساندال اعاشىنان جاسالعان. ونىڭ بەتىنە: «كوككە تابىنىپ, ادامعا قىزمەت ەت» دەگەن جازۋ جازىلىپتى. ال كانسي قىتايدى 1661-1722 جىلدار ارالىعىندا 61 جىل باسقارىپ, بيلىك باسىنداعى ۋاقىتى جاعىنان رەكورد جاساعان ەكەن.
كاراۆادجونىڭ جوعالعان كارتيناسى تابىلعان سياقتى
الدىن الا بولجام بويىنشا, فرانتسيادا يتالياننىڭ اتاقتى سۋرەتشىسى ميكەلاندجەلو دە كاراۆادجونىڭ بۇرىن قولدى بولدى دەپ ەسەپتەلىپ كەلگەن «يۋديف پەن ولوفەرن» دەگەن كارتيناسى تابىلعانعا ۇقسايدى.
بىرقاتار ماماندار قازىر جەكە كوللەكتسيادان كەزدەسكەن كەسكىندەمە تۋىندىسىن بەلگىلى قىلقالام شەبەرىنىڭ اتاقتى كارتيناسى بولۋى كەرەك, دەگەن بايلامعا توقتالعان. بىراق ونىڭ قانشالىقتى شىندىققا جاناساتىنىن يتاليان مامانى دجۋزەپپە پورتسيو عانا مۇقيات تەكسەرىپ شىققاننان كەيىن انىقتاپ بەرە الادى ەكەن.
تورنادونى ءتۇسىرىپ ءجۇرىپ, ايەلىنەن كوز جازدى
امەريكانىڭ يللينويس شتاتىندا ءبىر ەر كىسى قۇيعىتىپ كەلە جاتقان تورنادونى ۆيدەوعا ءتۇسىرىپ الىپتى. ءسويتىپ ءجۇرىپ, سول قۇيىننىڭ ءيىرىمى ءوزىنىڭ ايەلىن جۇتىپ كەتكەنىن بايقاماي قالىپتى.
سينوپتيكتەردىڭ ەسكەرتۋلەرىنە قۇلاق اسپاعان كلارەنس شۋلتس ەسىمدى 85 جاستاعى قاريا ويعا العانىن جۇزەگە اسىرۋ ءۇشىن سول كۇنى ءوز ءۇيىنىڭ شاتىرىنا شىعىپ كەتكەن. سوندا وتىرىپ, الاپات قارا داۋىلدى تۇسىرە بەرىپتى. ءبىر كەزدە ءۇي جەرگە وپىرىلىپ قۇلاعان. زايىبى سونىڭ استىندا قازاعا ۇشىراعان. قىزىققۇمار شال كەزدەيسوق امان قالىپتى.
نەكەگە تۇرار بولساڭ, تەكسەرۋدەن ءوت!
تۇرىكمەنستاندا وسىنداي ميزام كۇن تارتىبىنە ەندى. بۇدان بىلاي ۇيلەنگىسى كەلەتىن ءاربىر جاس نەكەگە وتىرار الدىندا دەنساۋلىعى جاعدايىن مۇقيات تەكسەرۋدەن وتكىزىپ, ءوزىنىڭ الدەقانداي ءبىر جۇقپالى اۋرۋمەن اۋىرمايتىنىن دالەلدەپ شىعۋى ءتيىس.
اتالعان ءتارتىپ ەلدە «ادام يممۋنودەفيتسيتى ۆيرۋسىن (ۆيچ-ينسپەكتسيا) شاقىراتىن اۋرۋدى تاراتۋعا قارسى كۇرەس تۋرالى» زاڭ كۇشىنە ەنگەننەن كەيىن قولعا الىندى. ول شاڭىراق قۇرىپ, وتاۋ تىككىسى كەلەتىن جاستاردىڭ نەگىزىنەن سپيد اتتى ناۋقاسقا قانشالىقتى قاتىسى بار ەكەنىن انىقتايتىن بولادى. ودان تازا شىققان تالاپكەرلەرگە عانا ۇيلەنۋگە رۇقسات ەتىلەدى.
اقپارات اگەنتتىكتەرىنىڭ ماتەريالدارى نەگىزىندە دايىندالدى.