قازاق وپەراسىنا قىزىققان

جەرار دەپاردەنىڭ ءان سالعىسى كەلەدى فرانتسۋزدىڭ اتاقتى اكتەرى جەرار دەپاردە ەلىمىزدەگى وپەرا ساحناسىندا ءان سالعىسى كەلەدى. مادەنيەت جانە سپورت ءمينيسترى ارىستانبەك مۇحامەدي ۇلىمەن كەزدەسۋ بارىسىندا ول قازاقستاننىڭ كيەلى ساحناسىنا قىزىعاتىنىن جانە كلاسسيكالىق اندەر شىرقاعىسى كەلەتىنىن جاسىرمادى. – مەن اكتەر ءارى مۋزىكانتپىن. ءتىپتى, بىرنەشە وپەرادا ءوزىم ورىنداۋشى بولدىم. قازىر كوپتەگەن كلاسسيكالىق تۋىن­دىنى وقىپ جاتىرمىن. مۇنداعى حالىق كلاسسيكالىق مۋزىكانى جوعارى باعالايدى. ماعان, نەگىزى, شىعارماشىلىق ءۇشىن كەڭىستىك كەرەك. ال, مەن سول وزىمە كەرەكتىنى وسى ەلدەن تابامىن, – دەدى ول. سونداي-اق, دەپاردە مينيسترمەن ديدارلاسقان ساتىندە فرانتسيا مەن قا­زاقستان اراسىنداعى مادەني باي­لانىستىڭ بۇگىنگى جاي-كۇيىن جان-جاقتى تالقىلادى. ونىڭ ايتۋىنشا, ەكى ەلدىڭ اراسىنداعى ونەر مەن مادەنيەت قارقىندى دامىعان. «سوندىقتان دا, – دەدى ول, – مەن وسى قا­رىم-قاتىناستى ناقتىلاي تۇسكىم كەلەدى. ماعان قازاقستان ۇنايدى. ەندىگى ماقساتىم – وپەرادا ءان سالىپ, حالىقتىڭ قوشەمەتىنە بولەنۋ». ايتا كەتەيىك, 67 جاستاعى اكتەر كەزدەسۋدە ءوزىنىڭ الداعى جوسپارلارىنا دا توقتالىپ ءوتتى. ول ءوزىنىڭ باستى ماقساتى قازاقستاننىڭ وپەرا ساحناسىندا وزىندىك ءىز قالدىرۋ ەكەنىن اشىپ ايتتى. تالعات رايىمبەك, «ەگەمەن قازاقستان».