16 جىل ىشىندە قوستانايداعى الەۋمەتتىك جاعىنان از قامتىلعان جاندارعا 86 ملن. تەڭگەنىڭ كومەگىن كورسەتتى
قوستانايلىقتار جىل سايىن مەتسەناتتار كلۋبىنىڭ سىيلىعىن تاپسىرۋ سالتاناتىن كۇتەدى. «ميراس» وبلىستىق مادەنيەت ءۇيىنىڭ كەڭ زالى كورەرمەنگە لىق تولادى. بۇل سالتاناتتا عىلىم, ونەر مەن ادەبيەت, ءبىلىم سالاسىندا جۇرگەن مايتالماندار, دارىندار ماراپاتتالادى, ماداقتالادى. كورەرمەندەر كوركەمدىك كەڭەس پەن كوميسسيانىڭ تالانتتار مەن ونەر مايتالماندارى اراسىنان كىمدەردى ىرىكتەگەنىن دە بىلۋگە اسىعادى.
مەتسەناتتار كلۋبى جاس ەرەكشەلىكتەرىنە قاراي 12 اتالىم بويىنشا سىيلىق تاعايىندايدى. ونىڭ 36 جاسقا دەيىنگىلەر ءۇشىن بەلگىلەنگەن «شابىت» سىيلىعى – 500 مىڭ, 36 جاستان جوعارىلار ءۇشىن بەكىتىلگەن «قازىنا» سىيلىعى 1 ميلليون تەڭگە كولەمىندە. سونىمەن قاتار, كلۋب مۇشەلەرى ساحناعا شىعادى, كوپتىڭ قوشەمەتىنە بولەنەدى, سىيلىقتاردى قوستانايلىق تالانتتارعا تاپسىرۋ قۇرمەتىنە يە بولادى. مۇنىڭ بارلىعى دا ءان-كۇيمەن, بيمەن ورنەكتەلەدى.
بيىل قوستانايلىق تالانتتار «قولدانبالى ونەر», «مۋزىكا ونەرى», «ۆوكال ونەرى», «تەاتر ونەرى», «حورەوگرافيا», «ادەبيەت», «جۋرناليستيكا», «ءبىلىم», «شىعارماشىلىق ۇجىم جەتەكشىسى», «اۋىل جاناشىرى» اتالىمدارى بويىنشا ىرىكتەلگەن دارىندار «شابىت» جانە «قازىنا» سىيلىقتارىنىڭ لاۋرەاتتارى اتاندى. ولاردىڭ اراسىندا ازامات مۇقاتوۆ سەكىلدى بەلگىلى ءداستۇرلى ءانشى, ايتىسكەر اقىن ايبەك قاليەۆ, «اقجەلەڭ» فولكلورلىق ءانسامبلى, سەرگەي حارچەنكو, ماريا شيلو, جۇماتاي كاكىمجانوۆ سەكىلدى جۋرناليستەر دە بار.
ايتا كەتەيىك, 2000 جىلدان باستاپ, بۇگىنگە دەيىن كاسىپكەرلەردەن قۇرالعان كلۋب ادەبيەت پەن ونەردى, عىلىمدى الەۋمەتتىك قولداۋ ماقساتىندا – 399 ادامعا, 35 ونەر ۇجىمىنا 186 ميلليون تەڭگە كولەمىندە اقشالاي سىيلىقتار بەرگەن ەكەن. 16 جىل بويى تاپسىرىلىپ كەلە جاتقان بەدەلدى سىيلىققا بيىل وبلىستاعى 97 ادام ءوز ەڭبەگىن ۇسىنعان بولاتىن, كوركەمدىك كەڭەس ىرىكتەپ, 34 ەڭبەكتى تاڭداپ الدى. وسىنداي كومەكتىڭ ارقاسىندا ايماقتاعى سۋرەتشىلەر شەبەرحانالارىن دۇرىستادى, اقىندار مەن عالىمدار, جۋرناليستەر كىتاپتارىن شىعارۋعا ءمۇمكىندىك الدى. ەڭ باستىسى, سىيلىق تالانتتار مەن ونەرلىلەردى قاناتتاندىرادى.
ءنازيرا جارىمبەتوۆا,
«ەگەمەن قازاستان».
قوستاناي.