بۇگىندە الەمنىڭ الپەتى ابىگەرلەنىپ تۇر. ءار جەردە مىلتىق داۋىسى ەستىلىپ, حالىقتىڭ باسىنا قايعى ورناپ, تۋعان جەرىن تاستاپ, وزگە ەلدەرگە بوسىپ, بەيبىت ءومىردى اڭساپ, «قارا سۋ ىشسەم دە, تىنىش جەردە وتىرسام ەكەن» دەيتىن ارماننىڭ جەتەگىندە جۇرگەن ادامدار كوپ. جەر-جاھان ءتۇرلى سىناقپەن, قاۋىپ-قاتەرمەن بەتپە-بەت كەلۋدە. كۇنى كەشە اقش-تىڭ استاناسى – ۆاشينگتوندا اياقتالعان يادرولىق قاۋىپسىزدىك جونىندەگى
ءىV سامميتتە ەلباسى نۇرسۇلتان نازارباەۆ «الەم. ءححى عاسىر» مانيفەسىن جاريالاپ, جاھاندىق سىن-قاتەرلەردىڭ ىقتيمال سالدارىن بارشا ادامزاتقا اشىق ايتتى. ءوزىنىڭ ۇستانىمىن رەسمي حابارلامالار مەن جاريالانىمدار اياسىنان تىس قالعان جەكە كەزدەسۋلەرىندە دە اتاپ كورسەتۋدەن تانعان جوق.
وسى ورايدا, پرەزيدەنتتىڭ ءباسپاسوز حاتشىسى داۋرەن اباەۆ بىلاي دەيدى: «نۇرسۇلتان ءابىش ۇلى رەسمي حابارلامالار مەن جاريالانىمدار شەڭبەرىنەن تىس قالعان كەزدەسۋلەردە دە ماڭىزى جاعىنان نەگىزگى پىكىرتالاستاردان ەش كەم سوقپايتىنىن اركەز ايتىپ كەلەدى». وسىعان بايلانىستى وقىرماندار نازارىنا مەملەكەتتەر باسشىلارىنىڭ ۆاشينگتونداعى يادرولىق قاۋىپسىزدىك جونىندەگى سامميت «الاڭدارىندا» ءوتىپ, رەسمي شارالاردىڭ «كولەڭكەسىندە» قالعان كەلىسسوزدەرىنەن سۋرەتتەر ۇسىنىلىپ وتىر.
«ەلباسى نۇرسۇلتان نازارباەۆ, – دەيدى وسى ورايدا د.اباەۆ, – فينليانديا, قىتاي, تۇركيا, ازەربايجان, يوردانيا, ۋكراينا, ارمەنيا, ليتۆا, مەكسيكا, چيلي باسشىلارىمەن, ماجارستان, ءۇندىستان, سينگاپۋر, جاپونيا, جاڭا زەلانديا ۇكىمەتتەرى باسشىلارىمەن, سونداي-اق, اقش-تىڭ مەملەكەتتىك حاتشىسىمەن شاعىن جەكە پىشىمدەگى كەزدەسۋلەرىندە حالىقارالىق قاۋىپسىزدىك, ءوزارا ساۋدا اينالىمى, ناقتى ينۆەستيتسيالىق جوبالاردى جۇزەگە اسىرۋ, اۋىل شارۋاشىلىعىنداعى ىنتىماقتاستىق ماسەلەلەرىن تالقىلادى».
قازاقستان دەلەگاتسياسىنا وسىنشالىقتى جوعارى قىزىعۋشىلىق كەزدەيسوق ەمەس ەكەنى ايتپاسا دا تۇسىنىكتى. سامميتتە قازاقستان پرەزيدەنتى ەڭ ءبىر قۇرمەتتى دە قالاۋلى مەيمانداردىڭ ءبىرى بولدى. بۇعان, ءتىپتى, ەلباسىنىڭ كەلىسسوز ۇستەلى باسىنداعى ورنىنىڭ اقش جانە جاپونيا ەلدەرىمەن قاتار ورتا تۇستا بولۋى نەمەسە جالپى سۋرەتكە ءتۇسۋ كەزىندە ءبىرىنشى قاتاردان ورىن بەرىلۋى سياقتى «حاتتامالىق نيۋانستار» دا ايقىن ايعاق بولا الادى.