اتالمىش شارا كۇندىز ءال-كۋۆەيت قالاسىنىڭ سيمۆولىنا اينالعان, شەتەل قوناقتارىنىڭ ەڭ باستى نازار اۋداراتىن جەرى, استاناداعى «بايتەرەك» مونۋمەنتىمەن تەڭەسەتىن «كۋۆەيت-تاۋەرس» ماڭىندا باستالادى. بۇل ەرەكشە مۇنارانىڭ كىشىگىرىم كوشىرمەسى قازىر استانا قالاسىنىڭ كەنەسارى كوشەسىندە ورنالاسقان اۋىل شارۋاشىلىعى مينيسترلىگىنىڭ عيماراتىندا ورىن الىپ وتىر. وسى عيمارات كۋۆەيت قورىنىڭ قاراجاتىنا سالىنعان.
ازيادا الاۋىنىڭ تۇتاناتىن جەرى بولىپ كۋۆەيتتىڭ تاڭدالۋى كەزدەيسوق ەمەس. ويتكەنى, مۇندا ازيا وليمپيالىق كەڭەسىنىڭ شتاب-پاتەرى ورنالاسقان. الاۋدىڭ تۇتاناتىن ءراسىمى قىزىقتى جانە تارتىمدى بولادى دەپ كۇتىلۋدە. ال وتانداستارىمىز ونىڭ ءاربىر ءساتى مەن كەزەڭدەرىن «حابار» تەلەارناسىنان بەرىلەتىن ەستافەتا كۇندەلىگىنەن كورە الادى.
الاۋدى تۇتاندىرۋ سالتاناتىندا ازيا ويىندارىن العاش رەت وتكىزگەلى جاتقان ەلىمىزدى تۋريزم جانە سپورت ءمينيسترى, استانا جانە الماتى قالالارىنىڭ اكىمدەرى مەن باسقا دا رەسمي لاۋازىم يەلەرى تانىستىرادى. وندا الاۋدى ءبىرىنشى بولىپ اوك پرەزيدەنتى شەيح احماد ءال-فاحاد ءال-ساباح ۇستاپ, ەلىمىزدىڭ تۋريزم جانە سپورت ءمينيسترى تەمىرحان دوسمۇحامبەتوۆكە تابىس ەتەدى. وسىدان كەيىن كىشىگىرىم كەزەڭ اياسىندا ازيا قۇرلىعىنىڭ ءىرى سپورت دەرجاۆالارى سانالاتىن قىتاي, جاپونيا, وڭتۇستىك كورەيا مەن قازاقستاننىڭ وكىلدەرى الاۋدى ءبىر-بىرىنە بەرە وتىرىپ, ءال-كۋۆەيت قالاسىنىڭ كوشەلەرىمەن الىپ جۇرەدى. ودان ءارى الاۋگەرلەر الاۋدى مۇناراعا, سودان كەيىن اۋەجايعا جەتكىزەدى. ءبىزدىڭ ەلگە الاۋ چارتەرلىك رەيسپەن ارنايى تاسىمالدانبالى قۇتى-قۇمىرادا الماتىعا جەتكىزىلەدى. وسى جەردە الاۋ ەستافەتاسىنىڭ ەل ىشىندەگى ساياحاتى باستالادى.
وسى وقيعاعا بايلانىستى جاقىندا ازيا ويىندارى الاۋ ەستافەتاسىنىڭ الاۋگەرلەرىن ىرىكتەۋ بويىنشا رەسپۋبليكالىق كوميسسيانىڭ قورىتىندى وتىرىسى وتكەنىن اتاپ ءوتۋ ءجون. تۋريزم جانە سپورت ءمينيسترى تەمىرحان دوسمۇحامبەتوۆ ءتوراعالىق ەتكەن وتىرىستا قۇرامىنا تانىمال سپورت, ساياسات جانە مادەنيەت وكىلدەرى كىرەتىن كوميسسيانىڭ ءمۇشەلەرى 11 قاڭتاردا ءال-كۋۆەيتتە باستاۋ الاتىن ەستافەتا الاۋگەرلەرىنىڭ ءتىزىمىن بەكىتتى. ونىڭ كونكۋرسى بىلتىر الاۋدى ءوڭىرلەردە ۇستاپ جۇرۋگە نيەت ەتكەن ازاماتتاردىڭ انكەتالارىن جيناۋدان باستالعان بولاتىن. ىرىكتەۋ بارىسىندا ۇمىتكەرلەردىڭ پاتريوتتىعىنا, ومىرلىك ۇستانىمىنىڭ بەلسەندىلىگىنە, وليمپيادا يدەالدارىن ارداقتايتىندىعىنا باستى نازار اۋدارىلدى. ءسويتىپ, الدىمەن كسرو سپورت شەبەرى, 1972 جىلى ميۋنحەن قالاسىندا وتكەن وليمپيادادا كەڭەس وداعى مەن اقش اراسىنداعى باسكەتبول ءتۋرنيرىنىڭ فينالدىق ماتچىنا قاتىسۋشى, قازاق ەلى تاريحىندا تۇڭعىش وليمپيادا چەمپيونى اتانعان قانداسىمىز ءالجان جارمۇحامەدوۆتىڭ الاۋدى قىزىلوردا وبلىسىندا ۇستاپ جۇرەتىنى شەشىلدى. سونىمەن بىرگە, روزا رىمباەۆانىڭ تۋعان جەرى شىعىس قازاقستان وبلىسىندا, قىدىرالى بولمانوۆتىڭ قاراعاندى وبلىسىندا الاۋمەن جۇگىرىپ وتەتىنى بەلگىلى بولدى. الاۋ ەستافەتاسى تەك قانا اتاقتى سپورتشىلاردى العى شەپكە قويماي, ولاردان باسقا ءتارتىپ ساقشىسى, ءورت ءسوندىرۋشى, قۇتقارۋشى قىزمەتكەرلەرىنىڭ باتىلدىق تانىتقاندارى الاۋدى ۇستاپ ءجۇرۋ قۇقىعىنا يە بولادى. مىسالى, وجەتتىگىمەن كوزگە تۇسكەن 20 جاستاعى دەنە تاربيەسى ءپانىنىڭ مۇعالىمى ارتەم كولەسنيچەنكو سۋعا باتىپ بارا جاتقان قىزدى قۇتقارىپ, ەرلىك جاساعان. ول قوستاناي وبلىسىنىڭ اتىنان استانالىق كەزەڭىندە الاۋدى ۇستاپ جۇرەدى. الاۋ ەستافەتاسى ديرەكتسياسى باسشىسىنىڭ ورىنباسارى سارسەن قۇرانبەكتىڭ ايتۋىنشا, ەستافەتادا سپورتتىڭ ارقاسىندا ءوز ومىرلەرىن جاقسارتقان ادامدارعا كوپ كوڭىل بولىنەدى. قازاقستان جاستارى وسى الاۋگەرلەردى كورىپ, ولاردىڭ جەتىستىكتەرىن ەستىپ, سپورتقا دەگەن قۇشتارلىقتارىن ارتتىرىپ, جەڭىستەرگە تالپىنادى. ياعني, ءبىزدىڭ جوبانىڭ ەڭ باستى ماقساتى – ەلىمىزدەگى بۇقارالىق سپورتتى دامىتۋ سەرپىلىسىن تۋدىرۋ.
وسى كەزگە دەيىن ەلىمىزدىڭ اتاقتى سپورتشىلارى وليمپيادا چەمپيوندارى, الەم جانە ازيا ويىندارىنىڭ چەمپيوندارى دا شاقىرتۋ الدى. ولاردىڭ اراسىندا داۋلەت تۇرلىحانوۆ, جاقسىلىق ۇشكەمپىروۆ, ولگا شيشيگينا سياقتى ساڭلاقتار بار. ال ەڭ ءبىرىنشى بولىپ الاۋ ەستافەتاسىنا قاتىسۋعا قۇقىق بەرەتىن سەرتيفيكاتقا گرەكيانىڭ قازاقستانداعى توتەنشە جانە وكىلەتتى ەلشىسى ەۆاگەلوس دەناكساس يە بولدى. گرەكيا – وليمپيادا قوزعالىسىنىڭ وتانى, سوندىقتان گرەكيا ەلشىسىنە ەستافەتاعا قاتىسۋعا رۇقسات بەرىلگەنى ءجون بولدى دەپ ويلايمىز. ونىڭ الاۋ ەستافەتاسىنا قاتىسۋى دۇنيە جۇزىنە وليمپيادا مەن ازيا ويىندارىنىڭ ءبىر-بىرىمەن تىعىز تۋىسقاندىق بايلانىستا ەكەنىن كورسەتەدى.
سونىمەن بىرگە, ەستافەتانىڭ بەلگىلى نىسانداردا وتەتىنىن اتاپ ءوتۋ ءجون. ءاربىر كەزەڭنىڭ باعىتتارى قازاقستاننىڭ اسا نازار اۋدارارلىق جەرلەرىن تەلەارنا كۇندەلىكتەرىندە كورسەتۋ جوسپارلانۋدا. استانالىق كەزەڭ «قازاق ەلى» مونۋمەنتىنەن باستالىپ, ەسىل وزەنىنىڭ سول جاق جاعالاۋىنداعى اسا كورنەكتى ارحيتەكتۋرالىق نىساندارىنىڭ, سونىڭ ىشىندە استانانىڭ سيمۆولىنا اينالعان «بايتەرەك», «قازاقستان تەمىر جولى» ۇلتتىق كومپانياسىنىڭ عيماراتى, ەلىمىزدىڭ ەڭ ۇلكەن مەشىتى «نۇر استانا» جانىمەن وتەدى. ال الماتىدا ەستافەتا شاڭعىمەن تۇعىردان سەكىرۋ كەشەنىنەن باستالسا, ورالدا ەۋروپا مەن ازيانى قوساتىن كوپىردە, اقمولا وبلىسىندا ولكە ىنجۋىنە اينالعان بۋرابايمەن ءجۇرىپ وتەدى. جالپى, كونكۋرس ناتيجەسىندە 1020 الاۋگەر ىرىكتەلىپ الىندى. ونىڭ 100-ءى استانالىق كەزەڭىندە, 80-ءى الماتى كوشەلەرىمەن جانە تاعى 60-ى ءاربىر وڭىردە الىپ جۇرەدى.
الاۋ ەستافەتاسى بۇگىن, جوعارىدا ايتقانىمىزداي, ءال-كۋۆەيت قالاسىندا الاۋ وتىنىڭ تۇتانۋ سالتاناتىندا باستالىپ, ەرتەڭ الماتىعا كەلەدى دە, ەلىمىزدىڭ بارلىق وڭىرلەرىن ارالاپ شىعىپ, 30 قاڭتاردا استانا قالاسىندا «استانا-ارەنا» ستاديونىندا ازيادانىڭ اشىلۋ سالتاناتىنىڭ شارىقتاۋ شەگىندە اياقتالادى.
داستان كەنجالين.