روجدەستۆو – سۇيىسپەنشىلىك پەن راقىمشىلىق مەرەكەسى

كەشە ەلباسى نۇرسۇلتان نازارباەۆ استانانىڭ ۋسپەن كافەدرالدى سوبورىندا بولىپ, شىركەۋگە كەلگەندەردى جانە بارلىق قازاقستاندىق پراۆوسلاۆيە ءدىنىن ۇستانۋشى حريستيانداردى روجدەستۆو مەرەكەسىمەن قۇتتىقتادى. قاڭتاردىڭ 6-نان 7-نە قاراعان ءتۇنى حريستيان ءدىنىنىڭ پرا­ۆوسلاۆيە تارماعىن ۇستانۋ­شى­لار ايسا پايعامباردىڭ تۋعان كۇنىن تويلايدى. بۇل – حريستيان جۇرتىنىڭ باستى مەرەكەلەرىنىڭ ءبىرى. ىنجىلدەگى اڭىزعا قاراعاندا, ءدال وسى كۇنى پالەستيناداعى ۆيفلەەم قالاسىندا ايسا پاي­عام­بار دۇنيەگە كەلگەن. حريستياندار ونى «قۇدايدىڭ ۇلى» دەپ تانيدى. ال كەشەگى كۇندى «تۋعان كۇن», ياعني «روجدەستۆو» مەرەكەسى دەپ تويلاپ كەلەدى. وسى كۇننىڭ الدىنداعى ءتۇندى كۇزەتىپ, حريستيان حرامدارىندا «سوچەلنيك» دەپ اتالعان قۇلشىلىق ءراسىمى جاسا­لا­دى. ال ەرتەسىنە ول مەرەكەلىك داس­تار­قانعا ۇلاسادى. قازاقستان پرە­زيدەنتى نۇرسۇلتان نازار­باەۆ­تىڭ جارلىعىمەن 2005 جىل­دان باستاپ بۇل كۇن ءبىزدىڭ ەلىمىزدە دە رەسمي تۇردە اتالىپ, مەرەكەلىك داتالار­دىڭ بىرىنە اينالعانى بەلگىلى. كافەدرالىق سوبورعا كەلگەن ەلباسى ن.نازارباەۆتى ميتروپوليت وكرۋگىنىڭ ءىس باسقارۋشىسى ەپيسكوپ گەننادي قارسى الدى. ال استانا جانە قازاقستان ءميتروپوليتى الەكساندردىڭ ءوزى تاڭ­عى التىداعى ۇشاقپەن ماسكەۋدەن كەلگەن شۇعىل حابار بويىنشا قاي­تىس بولعان شىركەۋ يەرارح­تارى­نىڭ ءبىرىن جەرلەۋگە قاتىسۋ ءۇشىن سوندا ۇشىپ كەتكەن ەكەن. ەلباسى نۇرسۇلتان نازارباەۆ ءوزىنىڭ سوزىندە پراۆوسلاۆيەنى ۇس­تانۋشى بارلىق وتانداستارى­مىز­دى سۇيىسپەنشىلىك پەن بەيبىتشىلىك جانە راقىمشىلىقتى ۋاعىز­دايتىن روجدەستۆو مەرەكەسىمەن قۇتتىقتاپ, دەنساۋلىق, وتباسى­لىق باقىت پەن ەلگە اماندىق تىلەدى. ودان ءارى بيىلعى روجدەس­تۆو­نىڭ ۋسپەن كافەدرالى سوبورى سياقتى وتە كورىكتى, ساۋلەتتى جانە ورتالىق ازياداعى ەڭ ۇلكەن حريستيان سوبورىندا قارسى الى­نىپ وتىرعانىن اتاپ ءوتتى. – بۇل حرام ءبىزدىڭ جاس ەلور­دامىزعا ءوزىنىڭ ارحيتەكتۋرالىق اسەم ساۋلەتىمەن جاڭا كورىك بەرىپ تۇر, – دەدى ەلباسى. – وتكەن جىل قازاقستاندىق پراۆوسلاۆيەلىكتەر ءۇشىن ەستە قالارلىق وقيعالارعا تولى بولدى. سونىڭ ىشىندە وسى سوبور اشىلىپ, ونىڭ اشىلۋىنا مەن ماسكەۋ جانە بۇكىل رەسەي پاتريارحى كيريللدى شاقىردىم. ونىڭ ساپارى ءبىزدىڭ ەلىمىزدەگى ەڭ ۇلكەن كونفەسسيالار – يسلام مەن پراۆوسلاۆيە دىندەرىن ۇستانۋشى­لار­دىڭ اراسىنداعى قارىم-قا­تى­ناستى نىعايتۋدا ىزگىلىكتى قادامعا اينالدى. ءبىز بارلىق ءداستۇرلى جانە الەمدىك دىندەردى تۇتىنۋ­شى­لاردى سىيلاۋ جانە ءوزارا ءتو­زىمدىلىك ساقتاۋ ساياساتىن جۇرگىزۋ­دەمىز. سونىڭ ارقاسىندا ءبىزدىڭ ەلى­مىزدە كەلىسىم, دوستىق, تىنىش­تىق پەن بەيبىتشىلىك ساقتالۋدا. ال ولار قازاقستاننىڭ كۇننەن كۇنگە دامىپ, حالقىمىزدىڭ تۇر­مىس دارەجەسىنىڭ جىلدان جىلعا جاقسارۋىنا سەپتىگىن تيگىزىپ وتىر. ءتىپتى وسى ساياساتىمىزدىڭ ار­قاسىندا ءبىزدى دۇنيە ءجۇزى دە سىيلاپ, قۇرمەت كورسەتۋدە. ءبىز وسى قۇندىلىقتارىمىزدى كوزدىڭ قاراشىعىنداي ساقتاۋىمىز كەرەك جانە ونى بولاشاق ۇرپاققا اماناتتاۋىمىز كەرەك. جاۋاپ سوزىندە ەپيسكوپ گەننادي نۇرسۇلتان نازارباەۆقا ءدىندارلار اتىنان ۇلكەن العىسىن ءبىلدىرىپ, ەلباسىنىڭ ىسىنە تا­بىستار تىلەدى. ءسىز ەۋرازيا كەڭىس­تىگىندە ورىستىڭ وزىق ويشىل­دارى مەن فيلوسوفتارى ارمان­دا­عان ەڭ ۇزدىك مەملەكەت قۇرا ءبىل­دىڭىز, ءبىز ارقاشاندا ءسىزدىڭ جو­لىڭىزدىڭ بولۋىن قۇدايدان تىلەيتىن بولامىز, دەدى ەپيسكوپ گەننادي. جاقسىباي سامرات. ----------------------------------------- سۋرەتتى تۇسىرگەندەر س.بوندارەنكو, ب.وتارباەۆ.