بۇرىنعى مينيستر – اپپارات جەتەكشىسى
اقش پرەزيدەنتى باراك وباما بۇرىنعى ساۋدا ءمينيسترى, بۇگىندە ەلدەگى بانكتەردىڭ بىرىندە باسشىلىق قىزمەت اتقاراتىن ۋيليام دەيليدى ءوز اپپپاراتىنىڭ باسشىسى ەتىپ تاعايىندايتىنى تۋرالى حابارلادى.
مۇنداي شەشىم كونگرەستە پوزيتسيالارى نىعايا تۇسكەن رەسپۋبليكاشىلارمەن بولاتىن شايقاس كەزەڭىندە قابىلدانىپ وتىر. پرەزيدەنت اكىمشىلىگى ءبىرىنشى كەزەكتە اقش-تاعى كاسىپكەرلىك توپتارمەن اراداعى قارىم-قاتىناستاردى جاقسارتا تۇسپەك نيەتتە.
چيكاگولىق ىقپالدى ساياساتكەرلەر وتباسىنىڭ مۇشەسى بولىپ تابىلاتىن ۋيليام دەيلي بۇرىنعى دەموكرات-پرەزيدەنت بيلل كلينتوننىڭ تۇسىندا ساۋدا ءمينيسترى لاۋازىمىندا بولىپ, كەيىن, ياعني, 2000 جىلى بۇرىنعى ۆيتسە-پرەزيدەنت البەرت گوردىڭ سايلاۋالدى ناۋقانىنا باسشىلىق جاساعان.
ول اق ۇيدە زور ىقپالعا يە بولىپ, اكىمشىلىكتىڭ كونگرەسستەگى ارالىق سايلاۋدان كەيىنگى تاكتيكاسىنا وزگەرىستەر ەنگىزەتىن بولادى دەپ كۇتىلۋدە.
يران امەريكالىق شپيوندى ەلگە كىرگىزبەدى
يران وكىمەتى شپيوندىقپەن اينالىستى دەگەن كۇدىكپەن 55 جاستاعى امەريكالىق ايەلدى شەكارادان وتكىزبەي تاستادى.
ءسويتىپ, ول ارمەنيا شەكاراسى ارقىلى يرانعا وتپەك بولعان جەرىنەن كەرى قايتارىلدى, دەپ حابارلايدى «فرانس-پرەسس» اگەنتتىگى «ال-الام» تەلەارناسىنا سىلتەمە جاساي وتىرىپ.
ءسال بۇرىنىراق يراننىڭ «فارس» اگەنتتىگى حول تالايان ەسىمدى امەريكا ازاماتشاسىنىڭ قاماۋعا الىنعانى تۋرالى حابارلاعان بولاتىن. بۇل وقيعا شامامەن ءبىر اپتاداي بۇرىن شىعىس ءازىربايجان پروۆينتسياسىنداعى نوردۋز اۋدانىندا ورىن العان. اگەنتتىك كەلتىرگەن مالىمەتتەرگە قاراعاندا تالاياننىڭ يرانعا بارۋىنا رۇقسات بەرەتىن ۆيزاسى بولماعان, سونىمەن بىرگە ونىڭ تىسىنەن الدەبىر شپيوندىق جابدىقتار دا تابىلعان.
ازىرگە بۇل وقيعا رەسمي بيلىك تاراپىنان راستالماي وتىر.
سوعىسقا ازىرلىك دەڭگەيى تومەندەتىلدى
سولتۇستىككورەيالىقتاردىڭ وڭتۇستىك كورەيانىڭ ەنپحەندو ارالىن اتقىلاۋىنىڭ سالدارىنان تۋىنداعان اسكەري شيەلەنىستەن كەيىن كحدر سارى تەڭىزدىڭ شەكارالاس اۋدانىنداعى سوعىس دايارلىعى دەڭگەيىن تومەندەتتى.
سولتۇستىك كورەيانىڭ قارۋلى كۇشتەرى سارى تەڭىزدىڭ شەكارالاس اۋداندارى ءۇشىن ەنگىزىلگەن سوعىسقا دايارلىقتىڭ ارنايى دەڭگەيىن تومەندەتتى, دەپ حابارلادى وڭتۇستىككورەيالىق «رەنحال» اقپارات اگەنتتىگى اتى اتالماعان كوزدەرگە سىلتەمە جاساي وتىرىپ.
سوعان سايكەس وڭتۇستىك كورەيانىڭ قارۋلى كۇشتەرى مەن وسى ەل اۋماعىندا ورنالاسقان امەريكالىق اسكەرلەر دە وزدەرىنىڭ سوعىسقا ازىرلىكتەرى مەن سولتۇستىك كورەيانىڭ ءىس-قيمىلدارىن باقىلاۋ دارەجەسىن ۇشىنشىدەن ەكىنشى دەڭگەيگە دەيىن تومەندەتتى
ال وتكەن سارسەنبى كۇنى پحەنيان «الدىن-الا قويىلاتىن ەشقانداي تالاپتارسىز-اق» وڭتۇستىكپەن كەلىسسوزدەردى ودان ءارى جالعاستىرۋدى ۇسىنعان بولاتىن. دەگەنمەن, رەسمي سەۋل ونى شىن جۇرەكتەن شىققان نيەت ەمەس دەپ باعالاپ, جاساعان ارەكەتتەرى ءۇشىن كەشىرىم سۇراۋعا شاقىرىپ وتىر.
مۇنايدىڭ مەكسيكا شىعاناعىنا توگىلۋىنە «ۇنەم» سەبەپ بولعان
اقش-تا سوڭعى جىلدارداعى ەڭ ءىرى ەكولوگيالىق اپاتقا سوقتىرعان مەكسيكا شىعاناعىنا مۇنايدىڭ جايىلۋ سەبەپتەرىن انىقتاۋ جونىندەگى پرەزيدەنتتىك كوميسسيانىڭ بايانداماسى جاريالاندى.
وسىعان بايلانىستى بريتاندىق بي-بي-سي تەلەراديو حابارلارىن تاراتۋ كومپانياسى كوميسسيا بايانداماسىنان ۇزىندىلەر كەلتىرەدى. «قاساقانا جاسالدى ما, الدە جوق پا, ۆر, Halliburton جانە Transokean قابىلداعان كوپتەگەن شەشىمدەر, وسى ارقىلى كومپانيا ءۇشىن قىرۋار ۋاقىتتار مەن اقشا ۇنەمدەي وتىرىپ, Macondo ۇڭعىسىنىڭ جارىلۋ تاۋەكەلدەرىن ۇلعايتا تۇسكەن», دەلىنگەن ول قۇجاتتا. ماسەلەن, ۆر-عا قاراستى پلاتفورماداعى جۇمىسشىلار اپاتتىڭ بولارىن ۋاقىتىندا انىقتاي دا الماي قالعان. كومپانيا مۇنداي بۇرمالاۋشىلىقتارعا ۇنەمى جول بەرىپ وتىرعان كورىنەدى.
كوميسسيا ەگەر اقش ۇكىمەتى مۇناي-گاز سالاسىنداعى رەفورمالاردى شۇعىل تۇردە باستاماسا مۇنداي اپاتتاردىڭ قايتالانۋى ءمۇمكىن دەگەن قورىتىندى شىعارعان.
قۇس ەتىن ساتۋعا تىيىم سالىندى
گەرمانيادا مىڭنان استام قۇس فەرمالارىنا وزدەرىنىڭ ونىمدەرىن ساتۋلارىنا تىيىم سالىندى.
بۇل جاعدايعا قۇستارعا ارنالعان ازىقتىق جەمنەن ديوكسين ۋىنىڭ تابىلۋى سەبەپكەر بولىپ وتىر, دەپ حابارلادى «اسسوشەيتەد پرەسس» اگەنتتىگى. مۇنداي تىيىم سالۋ گەرمانيانىڭ باتىسىندا ورنالاسقان تومەنگى ساكسونيا, سولتۇستىك رەين-ۆەستفاليا جانە شلەزۆيگ-گولشتەين جەرلەرىندەگى قۇس فەرمالارىنىڭ جابىلۋىنا اكەلىپ سوقتىردى.
سولتۇستىك رەين-ۆەستفاليا جەرىندەگى زوست قالاسىندا جەرگىلىكتى قۇس فابريكاسىنا 8 مىڭنان استام تاۋىقتىڭ كوزىن جويۋعا تۋرا كەلگەن. جەرگىلىكتى بيلىكتىڭ مالىمەتتەرىنە قاراعاندا, گەرمانيانىڭ باتىسىندا ورنالاسقان فەرمالاردا قۇستارعا بەرىلگەن 55 توننا ازىقتىق جەمدە ادام ءومىرى ءۇشىن قاۋىپتى ۋلاردىڭ بولۋى مۇمكىن.
الەۋمەتتىك كومەك الدەنە ءتۇستى
ۋكراينا پرەزيدەنتى ۆيكتور يانۋكوۆيچ از قامتاماسىز ەتىلگەن وتباسىلارىنا بەرىلەتىن الەۋمەتتىك كومەكتى ۇلعايتۋ ءجونىندەگى زاڭعا قول قويدى.
قۇجات 2011 جىلدىڭ 1 قاڭتارىنان باستاپ كۇشىنە ەندى. زاڭدا مەملەكەتتىك الەۋمەتتىك كومەكتىڭ مولشەرى 3-تەن 13 جاسقا دەيىنگى ءاربىر بالاعا 2011 جىلى – 60, 2012 جىلى – 120, 2013 جىلى – 180, ال 2014 جىلى 250 گريۆناعا ۇلعاياتىندىعى اتاپ كورسەتىلگەن.
ونىڭ سىرتىندا 13-تەن 18 جاسقا دەيىنگى بالالارعا بەرىلەتىن كومەكتىڭ مولشەرى 2011 جىلى – 100, 2012 جىلى – 230, 2013 جىلى – 360, ال 2014 جىلى 500 گريۆناعا كوبەيەتىن بولادى. وسى رەتتە ۋكراين ۆاليۋتاسىنىڭ اقش دوللارىنا شاققانداعى باعامىنىڭ 38,0929 گريۆنانى قۇرايتىنىن دا ايتا كەتۋ قاجەت.
بۇل تۋرالى مەملەكەت باسشىسىنىڭ رەسمي سايتىندا حابارلانعان.
ينتەرنەت ماتەريالدارى نەگىزىندە ازىرلەندى.