جاڭا جىلدىڭ الدىندا ەكىباستۇزداعى بولات نۇرجانوۆ اتىنداعى گرەس-1 ستانساسىنا 30 جىل تولدى. ەنەرگەتيكتەردى مەرەكەلەرىمەن قۇتتىقتاۋعا وبلىس اكىمى باقىتجان ساعىنتاەۆ جانە كاسىپورىن اكتسيونەرلەرى – «قازاقمىس كورپوراتسياسى» جشس باسقارما توراعاسى ۆلاديمير كيم, «سامۇرىق-قازىنا» ۇلتتىق ءال-اۋقات قورى» اق-تىڭ اتقارۋشى ديرەكتورى باقىتجان جاقساليەۆتار كەلىپ, سالتاناتتى جيىنعا قاتىستى. ەنەرگەتيكالىق قاۋىپسىزدىك – ەل قاۋىپسىزدىگى. بۇعان دەيىن شەتەلدىك ينۆەستورلاردىڭ قولىندا بولىپ كەلگەن ستانسا بۇل كۇندەرى مەملەكەت يەلىگىندە ەكەنى دە بەلگىلى. وتكەن جىلى گرەس-1 ستانساسىنا ەلىمىزدىڭ جانە تمد ەلدەرى ەلەكتر ەنەرگەتيكاسى سالاسىنىڭ ارداگەرى, كەزىندە كاسىپورىننىڭ اياققا نىق تۇرىپ, دامۋىنا زور ۇلەس قوسقان بولات نۇرجانوۆتىڭ ەسىمى بەرىلدى. ال, ستانسانىڭ مەرەيتويىنا وراي №5 ەنەرگوبلوكتا قورشاعان ورتانى لاستانۋدان قورعايتىن ەلەكترلى سۇزگى ىسكە قوسىلدى. ستانسانىڭ باس ديرەكتورى رىسقان سىبامباەۆتىڭ ايتۋىنشا, كاسىپورىننىڭ الداعى ونجىلدىققا ارنالعان دامۋ باعدارلاماسى تالقىلانىپ, بەكىتىلدى. ال ونى جۇزەگە اسىرۋعا باعىتتالعان ينۆەستيتسيا كولەمى 1 ملرد. اقش دوللارىن قۇراپ وتىر. جوعارىدا اتالعان ەلەكترلى سۇزگى وسى ينۆەستيتسيالىق باعدارلامانىڭ العاشقى باستاماسى دەۋگە بولادى. جاڭا قۇرىلعى اۋاعا تارالاتىن زياندى كۇلدىڭ ءمولشەرىن جىلىنا 17,5 مىڭ تونناعا دەيىن تومەندەتە الادى. بۇعان دەيىن ەكولوگياعا زالال كەلتىرەتىن قالدىقتاردىڭ اۋاعا تارالۋ مولشەرى جىلىنا 20,5 مىڭ توننانى قۇراسا, ەندى ول كورسەتكىش 3 مىڭ تونناعا دەيىن ازايادى. بۇل كاسىپورىننىڭ قارجى ۇنەمدەۋىنە دە اسەر ەتەدى. مىسالى, ەكولوگيالىق زارداپتار ءۇشىن جىلىنا تولەنەتىن قاراجات كولەمى 70,6 ميلليون تەڭگەگە قىسقارادى.
ستانساداعى № 2-ءشى جانە № 8-ءشى ەنەرگوبلوكتاردى قايتا قالپىنا كەلتىرۋ جۇمىستارىنا قۇيىلاتىن ينۆەستيتسيا كولەمى 53,4 ملرد. تەڭگە بولادى. جوبانىڭ ىسكە قوسىلۋ مەرزىمى – 2014 جىل. ءيا, ەنەرگەتيكا – ەل ەكونوميكاسىنىڭ قوزعاۋشى كۇشى. قازىرگى كەزدە ەلىمىزدە قولعا الىنىپ جاتقان ۇدەمەلى يندۋستريالىق-يننوۆاتسيالىق دامۋ جوبالارى دا ەنەرگەتيكا سالاسىمەن تىعىز بايلانىستى. بۇل رەتتە, ەكىباستۇزدىڭ گرەس-1 ستانساسىنىڭ ورنى ارينە, ەرەكشە. جالپى, ەكىباستۇزداعى ستانسالاردا جۇزەگە اسىرىلىپ جاتقان يننوۆاتسيالىق جوبالار ەلباسى نازارىندا. ويتكەنى, ەلىمىز ءۇشىن كومىرلى قالا, ءوندىرىستەرى قاپتاعان ەكىباستۇزدىڭ ورنى بولەك. وسى وتىز جىلدا ستانسانىڭ دامۋىنا كوپتەگەن ماماندار ۇلەس قوستى. جالىنداعان جاستار ەنەرگەتيكا سالاسىنىڭ قىر-سىرىن وسى ستانسا باسىندا ءجۇرىپ يگەرىپ شىقتى. ستانسا تەك قازاقستاندىق مامانداردىڭ عانا ەمەس, كەڭەستىك ەلدەردىڭ ەنەرگەتيكتەرىنىڭ ناعىز شىڭدالۋ, شەبەرلىك مەكەنىنە اينالدى, دەپ اتاپ ءوتتى ەلىمىزدىڭ ەنەرگەتيكتەرى ارداگەرلەر كەڭەسىنىڭ توراعاسى سوۆەتحان نۇرپەيىسوۆ ءوز سوزىندە. بۇل كۇندەرى ستانسادا 5 ەنەرگوبلوك جۇمىس ىستەپ تۇر. ال, الداعى جىلدارى جۇمىسى توقتاپ تۇرعان تاعى ءۇش ەنەرگوبلوك قايتا قالپىنا كەلتىرىلەدى. ءسويتىپ, وسى ارقىلى ستانسا 2016 جىلى 4000 مۆت ەلەكتر ەنەرگياسىن وندىرە الادى. ءارى كاسىپورىننىڭ يننوۆاتسيالىق باعدارلاماسى اياسىندا بارلىق ەنەرگوبلوكتارعا ەلەكترلى سۇزگى قۇرىلعىلارى ورناتىلادى دەپ جوسپارلانىپ وتىر.
– ءبىزدىڭ وندىرگەن ەلەكتر ەنەرگيامىز كۇن سايىن جۇزدەگەن پاتەرلەردى جىلۋمەن, جارىقپەن قامتاماسىز ەتىپ وتىر. بولاشاقتا ستانسانىڭ وندىرىستىك قۋاتى ودان دا ارتادى, بۇكىل قۇرال-جابدىقتاردى جاڭارتۋدا ينۆەستيتسيا تارتۋعا كوپ كۇش جۇمسالۋدا, – دەيدى «قازاقمىس» كورپوراتسياسىنىڭ باسقارما توراعاسى ۆلاديمير كيم.
فاريدا بىقاي.
پاۆلودار وبلىسى.