مەملەكەت باسشىسى نۇرسۇلتان نازارباەۆ ەلىمىزدىڭ پراۆوسلاۆيەلىك حريستياندارىن جانە بارشا قازاقستاندىقتاردى جارقىن مەيرام – روجدەستۆو مەرەكەسىمەن قۇتتىقتادى. روجدەستۆو – ىزگى ۇمىتتەر مەن جاقسىلىقتاردىڭ مەرەكەسى. ول ادامداردى يگى ىستەر جاساۋعا, قۇدايدىڭ وسيەتىمەن بەيبىتشىلىك پەن كەلىسىمدە ءومىر سۇرۋگە ۇمتىلۋدا باستارىن بىرىكتىرەدى, دەلىنگەن ەلباسىنىڭ قۇتتىقتاۋىندا.
وسى ماڭگىلىك قۇندىلىقتار, اسىرەسە, ءتۇرلى سەنىمدەگى جانە ەتنوستاعى ادامدار دوستىق اۋانىندا ءومىر سۇرەتىن قازاقستاندا ەرەكشە قۇرمەتتەلەدى.
ءبىزدىڭ بىرلىگىمىز بەن ىنتىماعىمىزدىڭ ارقاسىندا قازاقستان ىرعاقتى دامۋىن جالعاستىرۋدا. ەلىمىزدىڭ حالىقارالىق ارەناداعى بەدەلى نىعايا تۇسۋدە.
قازاقستان ۇيىمعا مۇشە ەلدەر مەملەكەت جانە ۇكىمەت باسشىلارىنىڭ تاريحي مانگە يە استانا ءسامميتى زاڭدى قورىتىندىسى بولعان ەقىۇ-داعى توراعالىعىن تابىستى جۇزەگە اسىردى.
وتكەن جىل قازاقستانداعى ورىس پراۆوسلاۆيە شىركەۋى ءۇشىن ەستە قالارلىق وقيعامەن ەرەكشەلەندى. استانادا ماسكەۋ جانە بۇكىل رەسەي پاتريارحى كيريلل بولىپ قايتتى. ول ەلوردادا ورتالىق ازياداعى اسا ءىرى ۋسپەن كافەدرالدى سوبورىن ساۋلەلەندىردى. بۇل ساپار ءبىزدىڭ ەلىمىزدەگى پراۆوسلاۆيە جانە يسلام قاۋىمى اراسىنداعى ىزگىلىكتى قارىم-قاتىناستى نىعايتۋدا ماڭىزدى قادام بولدى.
روجدەستۆو جارقىن مەرەكەسىندە ىزگىلىكتى ىستەرى مەن وي-نيەتتەرى وتانىمىزدىڭ دامۋى مەن وركەندەۋىنە ۇلەس قوسىپ كەلە جاتقان رەسپۋبليكانىڭ بارلىق پراۆوسلاۆيە ازاماتتارىنا ريزاشىلىق ءسوزىمدى ايتقىم كەلەدى, دەيدى پرەزيدەنت.
ەلباسى قۇتتىقتاۋىنىڭ سوڭىندا بارلىق قازاقستاندىقتارعا مىقتى دەنساۋلىق, بەيبىتشىلىك پەن يگىلىك تىلەي كەلىپ, ءار وتباسىندا باقىت, سۇيىسپەنشىلىك پەن ءوزارا تۇسىنىستىك سالتانات قۇرعانىن قالايتىنىن جەتكىزەدى.