جابىق ءجۇزۋ باسسەينى قۇرىلىسىنا بۇۇ دامۋ باعدارلاماسى بويىنشا 19 ميلليون, جەرگىلىكتى بيۋدجەتتەن 33 ميلليون تەڭگە قارجى ءبولىندى

تاياۋدا زايسان قالاسىنىڭ تۇرعىندارى تايلى-تۇياعىمەن سپورت ءمودۋلى جانىنان بوي كوتەرگەن ەڭسەلى, الىستان كوز تارتاتىن كورىكتى ءجۇزۋ باسسەينى جانىنا جينالدى. شىڭىلتىر ايازدى ساعىنىپ قالعان زايساندىقتار 24 گرادۋس سۋىقتى ەلەر ەمەس, اسپاندا قالىقتاعان سازدى اۋەن ىرعاعىنا ەلىكتەپ, ورىندارىندا تۇرىپ تەر­بەلەدى. جينالعانداردىڭ جۇزىندە قۋانىش, ويتكەنى, ولار بۇل كۇندى اسىعا كۇتكەن. اۋدان اكىمى الماس وڭداقانوۆتىڭ باستاماسى بو­يىنشا جابىق ءجۇزۋ باسسەينىن سالۋ جونىندەگى يگى ويدى قالا جۇرتشىلىعى, اۋداندىق ءماسليحات دەپۋتاتتارى قولدادى. بۇۇ دب قۇرىلىسقا 19 ميلليون قارجى بولسە, وبلىستىق, جەرگىلىكتى بيۋدجەتتەن 33 ميلليون تەڭگە قارجى تابىلدى. بۇدان ءبىر جىل بۇرىن عيماراتتى سالۋدى بىلىكتى دە ءبىلىمدى ازامات, «نۇر-سەرۆيس» جشس باسشىسى ەربول كەلگەنباەۆ باستاعان جىگىتتەر قولعا الدى. ەندى, مىنە, ءبىر جىلعا جەتەر-جەتپەس ۋاقىتتا ءجۇزۋ باسسەينى ىسكە قوسىلدى. جابىق ءجۇزۋ باسسەينى كەندى التايدىڭ اۋداندارىن بىلاي قويىپ, وسكەمەننەن باسقا ءىرى قالالاردا جوق. سالتاناتتى جي­ىنعا بۇۇ جاۋاپتى قىزمەت­كەر­ل­ەرى, اۋداننىڭ بەلگىلى ازامات­تارى, وبلىس ورتالىعىنان سپورت سالاسىنىڭ مايتالماندارى, قول كۇرەسىنەن الەمنىڭ كۇمىس ءجۇل­دەگەرى, ازيانىڭ بىرنەشە دۇركىن چەمپيونى نۇرلان قاسىمجانوۆ, سپورت شەبەرلەرى, اۋدان نامىسىن رەسپۋبليكالىق, وبلىستىق جا­رىستاردا ابىرويمەن قورعاپ ءجۇر­گەن مۇرات بىتىمباەۆ, ءادىل ار­تىعاليەۆ, فايزولدا قوي­شى­ما­نوۆ, اقىلباي ەلەۋوۆ, ورالبەك جيەن­باەۆ, تاعى باسقالار كەلگەن ەكەن. – بۇگىن ءبىز ءۇشىن قۋانىشتى كۇن. ەلباسى قازاقستان حالقىنا جولداۋىندا سالاماتتى ءومىر سالتىن ساقتاۋ, ادامداردىڭ بوس ۋاقىتتارىن كوڭىلدى وتكىزۋ, سپورتپەن شۇعىلدانۋ جونىندە ايتقان. ءجۇزۋ باسسەينىن سالۋعا بۇۇ دامۋ باعدارلاماسى دەمەۋشىلىك جاسادى. دەمەك, بالالار مەن جاستاردىڭ دەنە تاربيەسىمەن شۇعىلدانۋى, ەل ازاماتتارىنىڭ دەنساۋلىعى مىقتى بولۋى نازاردا دەگەن ءسوز. سىزدەردى قۋانىشتارىڭىزبەن قۇتتىقتايمىن, – دەدى اۋدان اكىمى. بۇدان كەيىن بۇۇ وكىلى ءما­ليكە ورالقىزى, وسى ۇيىم في­ليا­لىنىڭ سەمەيدەگى كەڭەسشىسى ءاسيما سەرىكبايقىزى, اۋداننىڭ قۇرمەتتى ازاماتى, بەلگىلى جۋرناليست بەكەن جاپاروۆ, تاعى باسقالار قۇتتىقتاۋ ءسوز الدى. قۇرىلىستى سالىپ بەرگەن «نۇر-سەرۆيس» جشس-ءىنىڭ باسشىسى ەربول كەلگەنباەۆ ءجۇزۋ باس­سەي­نى­نىڭ جاتتىقتىرۋشىسى بەكزات نۇر­تازوۆقا سيمۆولدىق كىلتتى تاپ­سىردى. اۋدان سپورتىن ۇزاق جىلدار باسقارعان, «سايحان» سپورت كلۋبىنىڭ تۇڭعىش ديرەكتورى زايسانبەك قاجانوۆ اق باتاسىن بەرىپ, جەتكىنشەكتەرگە تابىس تىلەدى. قول كۇرەسىنىڭ شەبەرى ن.قاسىمجانوۆ جەرلەستەرىن قۇتتىقتاپ, وسكەمەن قالاسىنىڭ اكىمى تەمىربەك قاسىمجانوۆتىڭ قۇتتىقتاۋ حاتىن وقىپ بەردى. لەنتا قيۋ قۇرمەتىنە وبلىستىق دەنە شىنىقتىرۋ جانە سپورت باسقارماسىنىڭ باسشىسى, وسى ءوڭىردىڭ تۋماسى ەلدوس چيكەنوۆ, جازۋشى-جۋرناليست بەكەن جاپاروۆ, سپورت ارداگەرى شورمان مازاقوۆ يە بولدى. ءجۇزۋ باسسەينىن ءوز بالانسىنا العان «سايحان» بالالار جانە جاسوسپىرىمدەر سپورت مەكتەبىنىڭ ديرەكتورى دارحان ابىلحانوۆ قازىر اتالمىش كلۋبتا 700-دەن استام بالانىڭ جاتتىعىپ جۇرگەنىن, ەندى سۋ سپورتىندا دا تاماشا جەتىستىكتەرگە جەتەتىنىن ايتىپ, قۋانىشىمەن ءبولىستى. ۇزىندىعى – 25, ەنى 12 مەتر­لىك ءجۇزۋ باسسەينىندە 15 بالا سۋدا جارىسىپ, ونەر كورسەتتى. كىرە­­­­بە­رىستەگى كەڭ ءدالىز, جۋىناتىن, كيىم كيەتىن, باسقا دا بولمەلەردى ەربول كەلگەنباەۆ «تۋعان جەرگە –تاعزىم!» اكتسياسى بويىنشا ءوز قارجىسىنا سالىپ, سىيعا تارتتى. وڭداسىن ەلۋباي. شىعىس قازاقستان وبلىسى, زايسان اۋدانى. ––––––––––––– سۋرەتتى تۇسىرگەن م.سالبانوۆ.