باتىس قازاقستان وبلىستىق كاسىپكەرلىك جانە يندۋستريالىق-يننوۆاتسيالىق دامۋ باسقارماسى باستاماشى بولعان سايلاۋالدى ۇيىمداستىرۋ شارالارى سونى سيپات الىپ وتىر. ونىڭ اۋقىمى وڭىردەگى كاسىپكەرلەر مەن شاعىن بيزنەس وكىلدەرىنىڭ قالىڭ توپتارىن قۇرايدى. سونىمەن بىرگە, «دامۋ» كاسىپكەرلىكتى قولداۋ قورىنىڭ ايماقتىق فيليالى مەن وبلىستىق كاسىپكەرلەر پالاتاسىنىڭ ىنتالى توپتارى دا الداعى 20 ناۋرىز كۇنى وتكىزىلەتىن پارلامەنت ءماجىلىسى مەن بارلىق دەڭگەيدەگى ءماسليحاتتار سايلاۋلارىنىڭ ماڭىزدىلىعىنا ەرەكشە ءمان بەرۋدە.
ولار سايلاۋ وتەتىن كۇننىڭ وزەكتىلىگىن جالاڭ تۇردە ەمەس, ونى بۇگىنگى قارجى داعدارىسىنىڭ الدىن الۋ شارالارىمەن بايلانىستىرا قاراستىرۋدا. وتكەن سارسەنبى كۇنى «دامۋ» قورى فيليالىنىڭ عيماراتىندا وتكىزىلگەن وبلىس كاسىپكەرلەرىنىڭ باسقوسۋى كەزىندە دە ولاردىڭ الداعى سايلاۋدىڭ ماڭىزى مەن ەرەكشەلىگىنە ايرىقشا دەن قويىپ وتىرعانى بەلگىلى بولدى. ءارى بۇل اراداعى باستى پارىز كىمنىڭ كىمگە, نەمەسە قاي پارتياعا داۋىس بەرۋىندە ەمەس, ازاماتتىق بەلسەندىلىك تانىتىپ, سايلاۋ كۇنىنە ءوڭىر كاسىپكەرلەرىنىڭ ءبىر كىسىدەي تەگىس قاتىسۋىندا ەكەندىگى جان-جاقتى ءسوز بولدى.
بۇل تۇرعىدا وبلىس كاسىپكەرلەرى ەلباسى نۇرسۇلتان نازارباەۆتىڭ سايلاۋ وتكىزەتىن كۇندى بەكىتىپ بەرگەن قازاقستان حالقىنا ۇندەۋىنە قولداۋ كورسەتتى. الدىمىزداعى سايلاۋ قازاقستان حالقىنىڭ بىرلىگى مەن ىنتىماعى ءارى ءوزارا جاراستىعى تاعى ءبىر سىننان وتەتىن تاريحي كۇنگە اينالا الاتىنىنا سەنىم ءبىلدىردى. ءبىز تومەندە وسى ايتىلعان ورامدى وي-پىكىرلەردىڭ بىرقاتارىن گازەت وقىرماندارىنىڭ نازارىنا ۇسىنعاندى ءجون كوردىك.
شولپان ماحمۇدوۆا,
شاعىن بيزنەس ورتالىعىنىڭ ديرەكتورى:
– كەزەكتەن تىس پارلامەنت ءماجىلىسى جانە كەزەكتى بارلىق دەڭگەيدەگى ءماسليحاتتار سايلاۋلارىن وتكىزۋ جونىندەگى ەلباسى ۇندەۋىن تولىعىمەن قولدايمىن. بۇل بۇگىنگى كۇردەلى الەمدىك ەكونوميكالىق احۋال جاعدايىندا وتە دۇرىس, وڭ شەشىم بولدى دەپ ەسەپتەيمىن. قازىر ەتەكتى كەڭگە جايىپ, ىرعالىپ-جىرعالاتىن كەز ەمەس. بۇگىنگى كۇنى ءبىز ءبارىمىز ۋاقىتتىڭ ءادىل تورەشى ەكەنىن تەرەڭ تۇيسىنە باستاعاندايمىز. ۋاقىتتان ۇتىلعاندار كوپ نارسەدەن ۇتىلادى. بۇل ورايدا دا كەزەكتەن تىس سايلاۋ بەلگىلەۋدىڭ ورنى ايرىقشا.
الەمدە مۇناي باعاسى ءتۇسىپ كەتتى دەگەن تىركەستى ءبىز ءبارىمىز بۇگىندە ءجيى قايتالايتىن بولدىق. وسى تۇرعىدا شيكىزاتتىق ەمەس سەكتوردى دامىتۋدىڭ پايداسى مول. وڭىردەگى شاعىن بيزنەس وكىلدەرى ونىڭ ماڭىزدىلىعىن ايرىقشا سەزىنۋدە, ءارى ءىس پەن ءسوزدىڭ بىرلىگىنە جەتۋگە ۇمتىلۋدا. سايلاۋ كۇنى بۇگىنگى جانە الداعى ۋاقىتتارعا بەلگىلەنگەن ءىس-جوسپارلارىمىزدان تىس تۇرا المايدى. سايلاۋعا ءبىراۋىزدان ءۇن قوسۋدىڭ قاجەتتىلىگى دە وسىندا. وعان تەگىستەي قاتىسايىق دەمەكپىن.
بوريس لاۆرەنتەۆ,
«اق جول» شاعىن جانە ورتا بيزنەس قاۋىمداستىعىنىڭ ديرەكتورى:
– ءار قازاقستاندىقتىڭ الداعى 20 ناۋرىز كۇنى بەرەتىن داۋىسى داعدارىستى اۋىزدىقتاۋعا جانە العا قاراي دامۋىمىزعا قوسىلاتىن ءبىر تامشى ۇلەس دەسەم, قاتەلەسپەيتىن شىعارمىن. وسى ورايدا, ارىپتەستەرىمنىڭ سايلاۋعا تەگىس قاتىسۋ جونىندەگى باستاماسىن تولىقتاي قولدايمىن. رەسپۋبليكادا كاسىپكەرلىكتىڭ جان-جاقتى ورىستەپ, ىرگەسى بەكي تۇسۋىنە مەملەكەت باسشىسىنىڭ كورسەتكەن قولداۋىنا ەشقانداي باعا جەتپەيدى. بۇعان ىسپەن جاۋاپ بەرۋ, وتاندىق ءوندىرىستىڭ ءورىسىن كەڭەيتۋ ەندىگى كەزەكتە بىزدەردىڭ ۇلەسىمىزدەگى ءىس بولماق.
سونداي-اق, ەلباسى ءوز ۇندەۋىندە جوعارى زاڭ شىعارۋشى ورگانعا كەزەكتەن تىس سايلاۋ وتكىزۋدىڭ قاجەتتىلىگىن تايعا تاڭبا باسقانداي ەتىپ اتاپ كورسەتتى. ونى قايتالاپ جاتپاي-اق قويايىن. بۇل سايلاۋدىڭ ورنى بولەك. سايلاۋ كۇنى ءبارىمىزدىڭ سايلاۋ ۋچاسكەلەرىنەن تابىلعانىمىز الداعى وركەندى ىستەرگە باستايتىن ىرگەلى قادام بولا الادى دەگەن ويدامىن.
تەمىر قۇسايىن,
«ەگەمەن قازاقستان».
ورال.