سوڭعى جىلدارى اتىراۋدا «نۇر وتان» پارتياسىنىڭ مۇشەلەرى ەسەلەپ ءوستى. قازىر وڭىرلىك فيليال قۇرامىندا 32023 بەلسەندى مۇشە بار. ولاردىڭ ءبارى دە پارتيا باعدارلاماسىنىڭ ءساتتى ىسكە اسۋىنا اتسالىسىپ كەلەدى.
كەشە وبلىستىق فيليالدىڭ كەزەكتەن تىس ءححى كونفەرەنتسياسىندا قالالىق جانە اۋداندارداعى فيليالداردان سايلانعان 180 دەلەگات باس قوستى. ولاردىڭ اراسىندا بارلىق سالانىڭ, سونىڭ ىشىندە ەكونوميكا, ونەركاسىپ, اۋىل شارۋاشىلىعى مەن ءبىلىم, دەنساۋلىق ساقتاۋ, مادەنيەت, سپورت, سونىمەن بىرگە, شاعىن جانە ورتا بيزنەس, مەملەكەتتىك باسقارۋ مەن قوعامدىق ۇيىمداردىڭ وكىلدەرى بار. دەلەگاتتاردىڭ باسىم بولىگىن, ياعني 98 پايىزىن جوعارى ءبىلىمدى ماماندار قۇرادى. ءتىپتى, 6 عىلىم دوكتورى مەن كانديداتىنىڭ بولۋى پارتيا مۇشەلەرىنىڭ ينتەللەكتۋالدىق دەڭگەيى مەن الەۋەتىنىڭ جوعارىلاي تۇسكەنىن بايقاتادى.
كونفەرەنتسيادا الدىمەن فيليال توراعاسى, وبلىس اكىمى باقتىقوجا ىزمۇحامبەتوۆ ءسوز الىپ, ءوڭىردىڭ الەۋمەتتىك-ەكونوميكالىق دامۋ قارقىنى جونىندە اڭگىمەلەدى. ونىڭ پىكىرىنشە, وڭىردە ۇدەمەلى يندۋستريالىق-يننوۆاتسيالىق جوبالاردىڭ ىسكە اسۋىمەن جۇمىس ورىندارى دا اشىلىپ جاتىر. قازىر اتىراۋ وبلىسىنىڭ الەۋمەتتىك-ەكونوميكالىق ءوركەندەۋ قارقىنى تۇراقتى. ءىرى ينۆەستيتسيالىق جوبالار ىسكە اسىرىلىپ, جاڭا ءوندىرىس ورىندارىن اشۋ, مۇناي-گاز ءوندىرۋ كولەمىن ارتتىرۋ باعىتىنداعى جۇمىستار اتقارىلۋدا. قۇرىلىس يندۋسترياسى مەن وڭدەۋ ونەركاسىبىن, اۋىل شارۋاشىلىعى, ينفراقۇرىلىم, الەۋمەتتىك سالانى دامىتۋعا باسا كوڭىل بولىنۋدە. اسىرەسە, اۋىل شارۋاشىلىعى سالاسىنا باسىمدىق بەرىلىپ وتىر. اۋىلداردىڭ ينفراقۇرىلىمدارى دا جاقسارا ءتۇستى. سونىڭ ىشىندە اۋىلدارعا تازا اۋىز سۋ, جول تارتىلۋدا. ەندى اتىراۋ قالاسىنىڭ ىرگەسىندەگى ەلدى مەكەندەردە جول سالۋ ءىسى قولعا الىنباق. بىلتىر وڭىردە «جۇمىسپەن قامتۋ جول كارتاسى-2020» باعدارلاماسى شەڭبەرىندە رەسپۋبليكالىق بيۋدجەتتەن 1,2 ملرد. تەڭگە ءبولىنىپ, 2 343 ادام جۇمىسپەن قامتىلدى. سونىمەن بىرگە, گەولوگيالىق بارلاۋ جۇمىستارىن بەلسەندى جۇرگىزۋ, مۇناي مەن مۇناي ونىمدەرى نارىعىن ىرىقتاندىرۋ, تاسىمالداۋ باعىتىن ءارتاراپتاندىرۋ ارقىلى مۇناي-گاز سەكتورىنىڭ باسەكەگە قابىلەتتىلىگىن ارتتىرۋ كوزدەلگەن. بۇل سالاداعى جەتىستىكتەر دە از ەمەس. ءوڭىر مۇنايشىلارى وتكەن جىلى 32,4 ملن. توننا مۇناي جانە 15,2 ملرد. تەكشە مەتر ىلەسپە مۇناي گازى ءوندىرىلدى.
بۇدان سوڭ دەلەگاتتار اتىنان باقىتگۇل حامەنوۆا, قايىرلى عيلمانوۆ, اقتولقىن احمەتجانوۆا پىكىر ءبىلدىردى. ماسەلەن, قايىرلى عيلمانوۆ جوعارى وقۋ ورنىن بىتىرگەن سوڭ «ديپلوممەن – اۋىلعا!» باعدارلاماسىمەن يندەر اۋدانىنا جۇمىس جاساۋعا كەلىپتى. قازىر وسىنداعى م.اۋەزوۆ اتىنداعى مەكتەپتە وقۋشىلارعا ءدارىس بەرەدى. وعان جاس مامان رەتىندە الاڭسىز جۇمىس جاساۋىنا قولايلى جاعداي جاسالىپتى. «ءبىز ەلىمىزدىڭ ودان ءارى وركەندەۋىنە ۇلەسىمىزدى قوسا بەرەمىز», دەدى ول.
بۇل كونفەرەنتسيا دەلەگاتتارىنا 27 سايلاۋ وكرۋگى بويىنشا وبلىستىق ءماسليحات دەپۋتاتتىعىنا كانديداتتار دا تانىستىرىلدى. پارتيانىڭ وڭىرلىك فيليالى ءار سايلاۋ وكرۋگىنە ءبىر كانديداتتان ۇسىنىپتى. كانديداتتار قۇرامىندا دارىگەر مەن زاڭگەر دە, كاسىپكەر مەن مۇنايشى دا, ءتىپتى, كاسىپوداق ۇيىمىنىڭ وكىلى مەن اۋىل شارۋاشىلىعى سالاسىنىڭ بىلگىر مامانى دا بار. ايتقانداي, ەتنومادەني بىرلەستىكتىڭ 4 وكىلىنە دە سەنىم ءبىلدىرىلىپ وتىر. سايلاۋ دوداسىنا ءماسليحاتتىڭ بۇرىنعى دەپۋتاتتارى دا تۇسەدى. دەگەنمەن, قاي كانديداتتىڭ قاي سايلاۋ وكرۋگىنەن كوپ داۋىس جيناپ, باعى جانارىن ۋاقىت كورسەتەدى.
جولداسبەك شوپەعۇل,
«ەگەمەن قازاقستان».
اتىراۋ.