تاياۋ شىعىستان ەۋروپاعا بوسقىندار تاسىمالداپ, كونتراباندامەن اينالىسقاندار وتكەن جىلى رەكوردتىق دەڭگەيدە تابىس تاپقان. اتاپ ايتقاندا, زاڭسىز جولمەن ادام تاسىمالداۋشىلار 3 ملرد. دوللاردان 6 ملرد. دوللارعا دەيىن پايداعا كەنەلگەن.
ەۋروپول باسشىسى روب ۋەينرايتتىڭ ايتۋىنشا, مۇنداي دەرەك ءبىر جارىم مىڭ بوسقىن مەن ەكونوميكالىق ميگرانتتار قاتىسقان ساۋالداما بارىسىندا بەلگىلى بولعان. ولاردىڭ 90 پايىزى ەۋروپاعا كەلۋ ءۇشىن قىلمىستىق توپتارعا اقشا تولەگەنىن ايتقان ەكەن. ورتاشا ەسەپپەن ءار بوسقىن 3 مىڭنان 6 مىڭ دوللارعا دەيىن تولەگەن.
سونداي-اق, ەۋروپول باسشىسى وسى ىسپەن اينالىسۋشىلاردىڭ قىلمىستىق جەلىسىندە ادامدار مىڭداپ سانالاتىنىن ايتتى. تەك 2015 جىلدىڭ وزىندە وسى ىسكە قاتىسى بولۋى مۇمكىن 11 مىڭ كۇدىكتى انىقتالعان.
ايتا كەتەيىك, كوشى-قون ماسەلەسى جونىندەگى حالىقارالىق ۇيىمنىڭ مالىمەتتەرىنە قاراعاندا, جاڭا جىلدىڭ العاشقى ەكى اپتاسىندا عانا ەۋروپاعا زاڭسىز جولمەن تاياۋ شىعىستان شىققان 24 مىڭ بوسقىن كەلگەن. بۇل وتكەن جىلدىڭ وسى كەزەڭىمەن سالىستىرعاندا, ءۇش ەسەگە كوپ.
ەرنار مۇحامبەت.