اتىراۋ. 25 مامىر. اتىراۋداعى نازارباەۆ زياتكەرلىك مەكتەبىن بىتىرەتىن العاشقى 176 تۇلەك سوڭعى قوڭىراۋ سالتاناتىنا قاتىستى. بۇل تۋرالى egemen.kz ءتىلشىسى حابارلادى.
بۇدان ەكى جىل بۇرىن, ياعني, 2013 جىلدىڭ قىركۇيەگىندە اشىلعان ەرەكشە ءبىلىم ورداسى حيميا-بيولوگيا باعىتىندا ءبىلىم بەرەدى. ەرەكشە دەۋىمىزدىڭ بىرنەشە سەبەبى بار. الدىمەن ايتارىمىز, مۇندا «مىڭنان تۇلپار, جۇزدەن جۇيرىك» دەگەندەي, ەڭ تالانتتى شاكىرتتەر وقيدى. وسى وقۋ ورداسىنا قابىلدانۋعا ءوتىنىش بەرگەن 2 978 وقۋشىنىڭ ارقايسىسى اۋەلى ەكى كەزەڭنەن تۇراتىن پاندىك تەستىلەۋ سىناعىن تاپسىردى. سول سىننان جوعارى بالل جيناعان وقۋشىلار اراسىندا كونكۋرستىق ىرىكتەۋ وتكىزىلدى. ءسويتىپ, ەلباسى نۇرسۇلتان نازارباەۆتىڭ «وركەن» گرانتى بارلىق سىننان سۇرىنبەي وتكەن 697 وقۋشىعا بەرىلدى.
ەكىنشىدەن, بۇل ءبىلىم ورداسىندا ءدارىس بەرەتىن ۇستازدار دا كونكۋرستىق ىرىكتەۋدەن وتكىزىلدى. مۇعالىمدەردىڭ بىلىكتىلىگىن جەتە زەردەلەگەن كونكۋرستىق كوميسسيا ۇيعارىمىمەن 74 ۇستاز ەرەكشە مەكتەپتىڭ دارىندى شاكىرتتەرىنە ءدارىس بەرۋ قۇقىعىن يەلەندى. ولاردىڭ اراسىنان 33 مۇعالىم ءۇش دەڭگەيلى ءبىلىم جەتىلدىرۋ كۋرسىنان ءوتتى. ال «بولاشاق» باعدارلاماسىنىڭ ءتورت تۇلەگى نازارباەۆ ۋنيۆەرسيتەتىنىڭ بازاسىندا ءبىر جىلدىق كۋرستا ءبىلىمىن ودان ءارى شىڭداپتى.
ۇشىنشىدەن, مۇنداعى پاندىك دارىستەر تەك قازاق جانە ورىس تىلىندە عانا ەمەس, سونىمەن بىرگە, اعىلشىن تىلىندە دە جۇرگىزىلەدى. سول سەبەپتەن, ءار ۇستازدىڭ اعىلشىن ءتىلىن بىلۋىنە باسا كوڭىل ءبولىنىپ, ءتىپتى, اقش, ۇلىبريتانيا, رۋمىنيا, يرلانديا جانە وڭتۇستىك افريكا رەسپۋبليكاسى سەكىلدى شەت مەملەكەتتەردەن جوعارى ساناتتى بىرنەشە ۇستاز شاقىرتىلعان. سونداي شەتەلدىك ماماننىڭ ءبىرى حاسان سابيگ شاكىرتتەرگە بيولوگيا پانىنەن اعىلشىن تىلىندە ءدارىس جۇرگىزەدى.
نازارباەۆ زياتكەرلىك مەكتەبىنىڭ ماتەريالدىق-تەحنيكالىق بازاسىنىڭ جاراقتاندىرىلۋىنا توقتالساق, وزگە مەكتەپتەردەن وق بويى وزىق تۇراتىندىعىمەن ەرەكشەلەنەدى. سەبەبى, مۇندا ءبىر مەزگىلدە 720 شاكىرتتىڭ وقيتىندىعى ءوز الدىنا, ءبىلىم ورداسىنداعى 60 كابينەتتىڭ بارلىعى دا كومپيۋتەر جانە ينتەراكتيۆتى تاقتامەن قامتىلعان. بۇدان وزگە, وقۋشىلاردىڭ دەربەس جۇمىس جاساۋى ءۇشىن 650 نوۋتبۋك ورناتىلىپ, 15 تىلدىك كابينەتتىڭ ارقايسىسىندا ون وقۋشىدان وتىرۋعا لايىقتالعان. بۇل مەكتەپ حيميا-بيولوگيا باعىتىندا بولعاندىقتان, اسىرەسە, نانوتەحنولوگيا, بيوتەحنولوگيا كابينەتتەرى وقۋشىلاردىڭ عىلىممەن تەرەڭىرەك اينالىسۋىنا مول مۇمكىندىك بەرەدى. سونىمەن بىرگە, روبوت تەحنيكاسى كابينەتى دە دارىندى ورەندەردىڭ وي ۇشقىرلىعىن جەتىلدىرە تۇسۋىنە سەپتىگىن تيگىزەتىنى داۋسىز.
ءبىلىم ورداسىنىڭ كىتاپحاناسى باي, سپورتتىق الاڭدارىنا وقۋشىلاردىڭ قاۋىپسىزدىگىن ساقتايتىن ارنايى گەتەروگەندىك جابىن توسەلىپ, مۇندا سپورتتىڭ بىرنەشە تۇرىمەن شۇعىلدانۋىنا جول اشىلىپ وتىر. ال الىس اۋىلداردان كەلگەن شاكىرتتەر ءۇشىن اشىلعان جاتاقحانانىڭ دا جابدىقتالۋى كورگەن جاننىڭ كوڭىلىنە قۋانىش ۇيالاتادى.
ايتا بەرسە, نازارباەۆ زياتكەرلىك مەكتەبىنىڭ ەرەكشەلىگى كوپ. وسى ورايدا, مۇندا سىنىپ جەتەكشىسى بولمايدى ەكەن. ءار سىنىپتىڭ ءوز كۋراتورى بار. «ءبىلىم – ينەمەن قۇدىق قازعانداي» ەكەنىن تەرەڭ سەزىنىپ, بىلىكتىلىكپەن, بىلىمدىلىكپەن الدان كورىنۋگە ۇمتىلعان نازارباەۆ زياتكەرلىك مەكتەبىنىڭ ۇستازدارى مەن شاكىرتتەرى ەرەكشە ۇلگىدەگى ءبىلىم ورداسىن ماقتان تۇتادى.
اتىراۋداعى نازارباەۆ زياتكەرلىك مەكتەبىنىڭ ديرەكتورى ايداربەك ايتپۋكەشوۆتىڭ ايتۋىنشا, بيىل ءبىلىم ورداسىن العاشقى 176 تۇلەك بىتىرگەلى وتىر. بۇگىن ولار وزدەرى ءبىلىم العان التىن ۇياسىنداعى سوڭعى قوڭىراۋ سالتاناتىنا قاتىستى. ولاردىڭ اراسىندا 16 وقۋشى «التىن بەلگى», ال 4 تۇلەك «ۇزدىك اتتەستات» الۋعا ۇمىتكەر بولىپ وتىر.
جولداسبەك شوپەعۇل.
دەرەك, سۋرەت:egemen.kz.