بۇگىن وتاندىق فۋتبول جانكۇيەرلەرىن تاعى ءبىر ۇيقىسىز ءتۇن كۇتىپ تۇر. سەبەبى, «استانا» كومانداسى ەۋروپا چەمپيوندار ليگاسىنىڭ توپتىق سايىسى شەڭبەرىندە ءوزىنىڭ ءۇشىنشى كەزدەسۋىن وتكىزەدى. بۇل جولى ەلوردالىق كلۋب يسپانيا استاناسى – مادريد قالاسىندا جەرگىلىكتى «اتلەتيكومەن» سىنعا تۇسەدى. تاريحى عاسىردان اساتىن «اتلەتيكونىڭ» اتان تۇيەگە جۇك بولاتىن اتاعى بار. سونىڭ ىشىندە 10 دۇركىن يسپانيا چەمپيونى اتانعانىن جانە 10 رەت ەل كۋبوگىن يەمدەنگەنىن ەسكە الساق, كوماندانىڭ شاما-شارقى قاي دەڭگەيدە ەكەنىن اڭعارۋ قيىنعا سوقپايدى. سەبەبى, الەم فۋتبولىنىڭ الپاۋىتتارى – «رەال مادريد» پەن «بارسەلونانىڭ» دا يسپاندىق كوماندالار ەكەنىن بىلەمىز. ال سول ەكى كلۋبتى بىردەي ارتتا قالدىرىپ, اتويلاپ توسكە ورلەۋ شىن مىقتىنىڭ عانا قولىنان كەلەدى.
«اتلەتيكونىڭ» نەگىزى حح عاسىردىڭ باسىندا, 1903 جىلى قالاندى. الايدا, ول كەزدە دەربەس فۋتبول كومانداسى دەگەن ءمارتەبەسى بولعان جوق. سەبەبى, ول بيلباونىڭ «اتلەتيك» كومانداسىنىڭ مادريدتەگى فيليالى رەتىندە قۇرىلعان بولاتىن. نەگىزىن قالاۋشىلار رەتىندە يسپانيا استاناسىندا وقىعان ءۇش باسك ستۋدەنتىنىڭ ەسىمدەرى اتالادى. ءوزدەرىنىڭ سۇيىكتى كوماندالارىنا دەگەن ساعىنىشتان شاعىن عانا ۇجىم قۇرۋدى كوزدەگەن سول ستۋدەنتتەر ول كەزدە سان تاراۋدان تۇراتىن جاڭا ءبىر تاريحتىڭ العاشقى پاراقتارىن جازىپ جاتقانىن بىلمەگەن ەدى.
ال 1907 جىلدىڭ 20 اقپانىنان باستاپ كوماندانىڭ تىلەۋىن ءتىلەيتىن مادريدتىكتەردىڭ سانى ەسەلەپ ارتتى. ەندى وعان ات توبەلىندەي بولعان باسكتەردەن بولەك, يسپاندار مەن ءمادريدتى مەكەن ەتكەن وزگە دە حالىقتار جانكۇيەرلىك ەتە باستادى. سەبەبى, ءدال وسى كۇنى «اتلەتيكو» «اتلەتيك كلاب دە مادريد» دەگەن اتاۋمەن يسپانيا فۋتبول فەدەراتسياسىنا رەسمي تۇردە تىركەلدى. سوعان بايلانىستى اتالعان فەدەراتسيا ۇيىمداستىرعان كەز كەلگەن دوداعا قاتىسۋعا مۇمكىندىك الدى.
كوماندا 1926 جىلى تاريحىنداعى العاشقى جەڭىسىنە سىنىق سۇيەم قالعان كەزدە ءسۇرىندى. اتاپ ايتقاندا, سول جىلى يسپانيا كۋبوگىنىڭ فينالىنا دەيىن جەتكەن «اتلەتيكونى» شەشۋشى ويىندا 3:2 ەسەبىمەن جەڭگەن «بارسەلونا» توقتاتتى. ال ارادا ەكى جىل وتكەندە, «اتلەتيك كلاب دە مادريد» يسپانيا چەمپيوناتىنىڭ ەڭ جوعارى ديۆيزيونىنا شاقىرتۋ الدى. تۇساۋكەسەر ماۋسىمدى التىنشى ورىنمەن اياقتاعان جاساق كەلەسى جىلى كوشتىڭ سوڭىندا قالىپ, ەليتالىق ليگادان شىعىپ قالدى. مىقتىلار ساناتىنا 1934 جىلى قايتا قوسىلعان كلۋب جانكۇيەرلەرىنىڭ قۋانىشى ۇزاققا سوزىلمادى. بۇل جولعى ساتسىزدىككە ەلدەگى ازامات سوعىسى سەبەپ بولدى. سەگىز ويىنشىسى ۇرىس دالاسىندا قازا تاپقاندىقتان جاساق اسكەري-اۋە جاۋىنگەرلەرىنىڭ كومانداسىمەن بىرىگۋگە ءماجبۇر بولدى. ءناتيجەسىندە, 1939 جىلى «اتلەتيك اۆياسون دە مادريد» دەگەن جاڭا اتاۋمەن جوعارى ليگاعا قايتا قوسىلدى. سالعان جەردەن قارسىلاس بىتكەندى قوعاداي جاپىرىپ, ەل چەمپيونى اتاندى. بۇل اتاعىن كەلەسى 1940-1941 جىلعى ماۋسىمدا قورعاپ قالىپ, از ۋاقىتتىڭ ىشىندە يسپانيانىڭ ەكى دۇركىن چەمپيونى دەگەن اتاققا قول جەتكىزدى.
گەنەراليسسيمۋس فرانكونىڭ 1941 جىلعى جارلىعىنا بايلانىستى ەلدەگى شەتەلدىك اتاۋلاردىڭ بارلىعى مەملەكەتتىك تىلگە اۋىستىرىلدى. سوعان وراي كوماندانىڭ اتاۋى دا «اتلەتيكو اۆياسون دە مادريد» دەپ وزگەرتىلدى. ال سوعىس اياقتالىپ, ەلدەگى جاعداي تۇراقتالعان 1947 جىلى كلۋب باسشىلىعى اتاۋداعى اسكەري ءسوزدى الىپ تاستاپ, كوماندانىڭ اتىن «اتلەتيكو دە مادريد» دەپ بەكىتتى. بۇل اتاۋ بۇگىنگە دەيىن ساقتالىپ كەلەدى.
«اتلەتيكو» ەۋروكۋبوكتىق ءباسەكەلەردە ءۇش مارتە توپ جاردى. العاشقىسى 1961-1962 جىلعى ماۋسىمدا كۋبوك يەلەرىنىڭ كۋبوگى تۋرنيرىندە تىركەلدى. سونداي-اق, ەكى رەت وسى ءتۋرنيردىڭ فينالىندا ويناعانىن اتاپ وتكەن ءجون (1962-1963, 1985-1986). ال كەيىنگى ەكى جەڭىسكە ەۋروپا ليگاسىنىڭ 2009-2010 جانە 2011-2012 جىلدارعى ماۋسىمدارىندا قول جەتكىزدى. ودان بولەك, 1973-1974 جانە 2013-2014 جىلدارعى ماۋسىمداردا ەۋروپا چەمپيوندار ليگاسىنىڭ (بۇرىنعى ەۋروپا چەمپيوندارىنىڭ كۋبوگى) فينالىنا دەيىن جەتتى.
وسى رەتتە, اتالعان ەكى فينالدىق كەزدەسۋلەرگە از-كەم توقتالىپ وتەيىك. وتكەن عاسىردىڭ ەنشىسىندە قالعان العاشقى فينالدا مادريدتىكتەر ميۋنحەننىڭ «باۆارياسىمەن» كەزدەستى. بۇل سىندا كوماندالار جەڭىمپازدى انىقتاۋ ءۇشىن ەكى رەت ويناۋعا ءماجبۇر بولدى. ءبىرىنشى كەزدەسۋ 1:1 ەسەبىمەن تەڭ اياقتالسا, ەكىنشى ايقاستا نەمىستەر 4:0 ەسەبىمەن تاس-تالقان ەتىپ جەڭدى. العاشقى ويىندا سوڭعى مينۋتقا دەيىن يسپاندار الدا بولعانىن ايتا كەتەيىك. ال ءتۋرنيردىڭ وتكەن جىلعى فينالىندا «اتلەتيكونىڭ» قارسىلاسى ونىڭ «اتاجاۋى» سانالاتىن مادريدتىڭ «رەالى» بولدى. كلۋب جانكۇيەرلەرىنىڭ وكىنىشىنە قاراي, بۇل ماتچتا دا سوڭعى مينۋتقا دەيىن باسىم بولىپ, ناتيجەسىندە, جەڭىلىسكە ۇشىرادى. سول سىندا «كورولدىك كلۋبتىڭ» پايداسىنا 4:1 ەسەبى تىركەلىپ, «رەال» تاريحىندا 10-شى رەت چەمپيوندار ليگاسىن جەڭگەن ەدى.
ءبىر قالانىڭ نامىسىن قورعايتىن قوس كوماندا بۇگىنگە دەيىن 165 رەت كەزدەسكەن. سونىڭ 40-ىندا «اتلەتيكو» جەڭىسكە جەتسە, 36 كەزدەسۋ تەڭ اياقتالدى. قالعان 89 ويىندا «رەال» ويىنشىلارىنىڭ مەرەيى ۇستەم بولدى.
جالپى, كوماندانىڭ التىن ءداۋىرى 1964 جىلى كلۋب باسشىلىعىنا ۆيسەنتە كالدەروننىڭ كەلۋىمەن باستالدى. ونىڭ تۇسىندا «اتلەتيكو» ءتورت رەت يسپانيا چەمپيونى اتانىپ, ەلدەگى ەڭ بەدەلدى ءۇش كوماندانىڭ بىرىنە اينالدى. سونداي-اق, كالدەروننىڭ كەزىندە قاتارعا كوپتەگەن ارگەنتينالىق لەگيونەرلەر قوسىلدى. ولاردىڭ اراسىندا رۋبەن ايالا, رامون ەرەدي, رۋبەن دياس سىندى بەلگىلى فۋتبولشىلار بار. بۇل ويىنشىلاردىڭ ارعى تەگى ۇندىستەر بولعاندىقتان, جانكۇيەرلەر كومانداعا «ءۇندىستەر» («indios») دەگەن جاڭا لاقاپ ات قويدى.
سودان بەرى «ۇندىستەر» ەۋروپا فۋتبولىنداعى بەلدى ۇجىمداردىڭ قاتارىنان ءتۇسىپ كورگەن ەمەس. تالاي ۇزدىكتىڭ توماعاسىن سىپىرعان كوماندا الەم فۋتبولىنا لۋيس اراگونەس, ديەگو سيمەونە, ديەگو فورلان, داۆيد ۆيليا, فەرناندو توررەس سىندى ساڭلاقتاردى سىيلادى. بۇگىندە سيمەونە كلۋبتىڭ باس جاتتىقتىرۋشىسى بولسا, توررەس ونىڭ كوشباسشى ويىنشىسى. قازىرگى كۇنگە دەيىن بيىلعى ماۋسىمداعى يسپانيا پريمەراسىنىڭ 8 تۋرى ءوتتى. ازىرگە 16 ۇپايى بار «اتلەتيكو» 4-ورىندا كەلەدى. كلۋب قول جەتكىزگەن جەڭىستەردىڭ قاتارىندا 1985 جانە 2014 جىلعى يسپانيا سۋپەركۋبوگى, 1974 جىلعى قۇرلىقارالىق كۋبوك, 2010 جانە 2012 جىلعى ۋەفا سۋپەركۋبوگى بار.
بيىلعى چەمپيوندار ليگاسىنىڭ العاشقى ەكى تۋرىنان كەيىن «اتلەتيكو» توپتا ەكىنشى ورىندا كەلەدى. ءبىرىنشى ويىندا قوناقتا ءتۇركيانىڭ «گالاتاسارايىن» 2:0 ەسەبىمەن جەڭگەنىمەن, ەكىنشى تۋردا ءوز الاڭىندا پورتۋگاليانىڭ «بەنفيكاسىنا» 1:2 ەسەبىمەن ەسە جىبەردى. سوندىقتان سيمەونەنىڭ شاكىرتتەرى قازاقستاندىق كومانداعا قارسى تىستەرىن قايراپ وتىر. دەگەنمەن, قازاقستان فۋتبول تاريحىنىڭ جاڭا تاراۋىن باستاعان «استانا» دا بۇگىنگى ويىندا جىگەر كورسەتەدى دەپ ۇمىتتەنەمىز. ءازىرگە ءبىزدىڭ كوماندا ەكى تۋردان 1 ۇپاي جيىپ, ءوز توبىندا «گالاتاسارايمەن» بىرگە ءۇشىنشى جانە ءتورتىنشى ورىنداردى ءبولىسىپ تۇر.
«اتلەتيكو» – «استانا» ماتچى مادريدتەگى 55 مىڭ ورىندىق «ۆيسەنتو كالدەرون» ستاديونىندا وتەدى. ايقاس استانا ۋاقىتىمەن ساعات 00:45-تە باستالادى. ويىندى وتاندىق «تاڭ» تەلەارناسى تىكەلەي ەفيردە كورسەتەدى.
ەلامان قوڭىر,
«ەگەمەن قازاقستان».