سولتۇستىكقازاقستاندىقتار وراق ناۋقانىن ۇيىمشىلدىقپەن اياقتاپ, ەرەن ەڭبەكتىڭ ۇلگىسىن كورسەتتى. بۇل تۋرالى وبلىس باسشىسىنىڭ ءبىرىنشى ورىنباسارى ايداربەك ساپاروۆ ماكارون ونىمدەرىن شىعاراتىن «سۇلتان» زممك اكتسيونەرلىك قوعامىندا باق وكىلدەرىمەن وتكەن بريفينگتە مالىمدەدى.
– 3,2 ميلليون گەكتار ەگىستىك القاپتارىنان 5 ميلليون 425 مىڭ توننا استىق جينالىپ, ورتاشا ءتۇسىم 16,9 تسەنتنەر بولدى. جاۋاپتى ناۋقانعا 4 مىڭعا جۋىق سەرىكتەستىك پەن فەرمەرلىك شارۋاشىلىق بەلسەنە اتسالىستى. جامبىل, ايىرتاۋ, قىزىلجار, ەسىل اۋداندارىندا شىعىمدىلىق 20 تسەنتنەردەن اينالدى. وتان قامباسىنا جونەلتىلگەن التىن ءداننىڭ 40 پايىزدان استامى 3-ءشى, قالعاندارى 4-5-ءشى سىنىپتاردى قۇرايدى. اۋا رايىنىڭ قۇبىلمالى بولعانىن ەسكەرسەك, بۇل – جاقسى كورسەتكىش. كەلەر جىل تۇقىممەن تولىق قامتاماسىز ەتىلدى.
مەملەكەتتىڭ قۋاتتى قولداۋى ارقاسىندا بىتىك ەگىن ءوسكەنىن ايتا كەتكىم كەلەدى. بيىل اگروقۇرىلىمدار 17,5 ميلليارد تەڭگە مولشەرىندە جەڭىلدىكتى دەمەۋقارجى الدى. كوكتەمگى-دالا جۇمىستارىنا 73 مىڭ توننا ارزانداتىلعان ديزەل وتىنى الىنىپ, ءار ءليترى 84 تەڭگەدەن بوساتىلدى. تاناپتارعا 45 مىڭ توننا مينەرالدىق تىڭايتقىش ءسىڭىرىلىپ, 3 ميلليون گەكتار جەر گەربيتسيدپەن وڭدەلدى,–دەدى ايداربەك سەيپىل ۇلى.
ول جۋرناليستەردىڭ بيدايدىڭ ساتۋ باعاسى قانداي بولماق دەگەن ساۋالىنا بىلاي جاۋاپ بەردى. ءبىر توننا 3-ءشى سىنىپتى بيداي باعاسى 38-42 مىڭ تەڭگە توڭىرەگىندە. ازىق-ت ۇلىك كەلىسىمشارت كورپوراتسياسىنىڭ جەرگىلىكتى فيليالى 42 مىڭ تەڭگەدەن ساتىپ الۋدا. بۇگىندە بەرىلگەن نەسيەنىڭ ۇشتەن ءبىرى قايتارىلدى. بۇل باعىتتا جۇمىس جان-جاقتى جۇرگىزىلىپ جاتقاندىقتان, ەشقانداي پروبلەما تۋىنداماۋى ءتيىس.
ول قازىرگى كەزەڭدە جاڭا استىقتىڭ ونىمدەرىن قابىلداۋمەن سىيىمدىلىعى 3,4 ميلليون توننالىق 54 ەلەۆاتور اينالىساتىنىن, بۇدان تىسقارى اگروقۇرىلىمداردا سىيىمدىلىعى 3,1 ميلليون توننانى قۇرايتىن قويمالار ورنالاسقانىن, ەكسپورتقا 2-2,5 ميلليون توننادايى شىعارىلاتىنىن جەتكىزدى.
بۇدان كەيىن باق وكىلدەرى ەل تاۋەلسىزدىگىنىڭ العاشقى جىلدارىندا بوي كوتەرگەن «سۇلتان» ەلەۆاتور-ديىرمەن-ماكارون فابريكاسىندا كەڭ ءورىس العان قىزۋ ەڭبەك بارىسىمەن تانىستى. لابوراتوريا مەڭگەرۋشىسى اننا حلاموۆانىڭ ايتۋىنشا, مۇندا كۇنىنە 1500-1700 توننا ەل ريزىعى قابىلدانىپ, 50-گە جۋىق ماكارون ونىمدەرى دايىندالادى ەكەن. ول ءۇشىن استىقتىڭ اقۋىزى, قۇرعاقتىعى سەكىلدى ساپالىق قاسيەتتەرى قاتتى قاداعالانادى. وسىندا استىق وتكىزۋگە كەلگەن «نوۆوميحايلوۆكا-2003» جشس-ءنىڭ ديرەكتورى گەننادي ششەگولەۆ گەكتار بەرەكەلىلىگىن 23,3 تسەنتنەرگە جەتكىزگەن قۋانىشىن باق وكىلدەرىمەن ءبولىستى. وراققا 14 كومباين جۇمىلدىرىلىپ, قىسقا مەرزىمدە ەڭسەرىپ شىعىپتى.
وسىلايشا, استىقتى ولكەنىڭ ديقان-مەحانيزاتورلارى بەرگەن سەرتتەن كورىنىپ, ابىروي بيىگىنەن سۇرىنبەي ءوتتى.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى.