اقتوبە. 25 مامىر. اقتوبەدەگى «قازحروم» ترانسۇلتتىق كومپانياسىنىڭ» فيليالى – اقتوبە فەرروقورىتپا زاۋىتىنىڭ جاس ماماندارى ۇلى وتان سوعىسىنىڭ ارداگەرى يۆان شەۆچەنكونىڭ وتباسىنا بارىپ, ءۇي شارۋاسىنا قول ۇشىن بەردى. سونداي-اق, قارت جاۋىنگەردىڭ ەرلىككە تولى اڭگىمەلەرىن تىڭداپ, ومىرلىك ونەگە الىپ قايتتى. بۇل تۋرالى زاۋىتتىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى.
جاس ماماندار كەڭەسىنىڭ توراعاسى جاسۇلان جۇماي باستاعان كاسىپورىن جاستارى ارداگەرلەر كەڭەسىمەن تىعىز قارىم-قاتىناس ورناتقان. ولار قاريالاردىڭ ءوتىنىش-تىلەكتەرىن ءاردايىم ەسكەرىپ, ءۇي شارۋاسىنا قولعابىستارىن تيگىزىپ وتىرادى.
«مەن سوعىستان امان-ەسەن ورالىپ, 31 جىل اقتوبە فەرروقورىتپا زاۋىتىنىڭ №1 بالقىتۋ تسەحىندا سلەسار-جوندەۋشىلەردىڭ بريگاديرى بولىپ ەڭبەك ەتتىم. قارتتارىن ەشقاشان ۇمىتپايتىن وسىنداي كومپانيادا ەڭبەك ەتكەنىمدى ءاردايىم ماقتان ەتىپ وتىرامىن. جىلدىڭ قاي مەزگىلى بولسىن وزدەرىنىڭ كومەكتەرىن ايامايتىن, قارتتارىن قازىناسىنداي سىيلاپ, ءاردايىم قاسىمىزدان تابىلاتىن زاۋىتتىقتارعا العىسىم شەكسىز. قيىندىعى مەن قىزىعى قاتار جۇرەتىن مەتاللۋرگتەرگە ءبىزدىڭ سالىپ كەتكەن سارا جولىمىزدا ايانباي ەڭبەك ەتىپ, ەلىمىزدىڭ ەكونوميكاسىنا قارا مەتاللۋرگيا سالاسى بويىنشا ءوز ۇلەستەرىن قوسىپ, تەك بيىكتەردەن كورىنە بەرسىن دەپ باتامدى بەرەمىن», – دەدى سوعىس ارداگەرى يۆان شەۆچەنكو.
ساتىبالدى ءساۋىرباي.
دەرەك, سۋرەت: egemen.kz.