ەلباسى نۇرسۇلتان نازارباەۆتىڭ باستاماسىمەن بەسىنشى مارتە ۇيىمداستىرىلعان الەمدىك جانە ءداستۇرلى دىندەر ليدەرلەرىنىڭ سەزدەرى بۇرىن-سوڭدى الەمدە بولماعان تاريحي جيىن ەكەنىنە ەشكىمنىڭ تالاسى جوق. داستۇرگە اينالعان قۇرىلتاي بۇعان دەيىن ءبىر ۇستەلدىڭ باسىنا بىرىكتىرۋ مۇمكىن بولماي كەلگەن ءدىن وكىلدەرىن ورتاق مۇددە, ورتاق قۇندىلىقتار جولىندا قايتا-قايتا قاۋىشتىرۋدا.
وسىلايشا سەزد, ەڭ الدىمەن, باتىس پەن شىعىستىڭ اراسىن ءبىر-بىرىمەن جاقىنداستىرۋ, ورتاق مۇددەگە جۇمىلدىرۋ مۇمكىن ەكەندىگىن, ولاردىڭ ءوزارا تۇسىنىسە الاتىنىن دالەلدەدى. كەزەكتى بەسىنشى سەزد الەمدە بەيبىتشىلىكتى قالىپتاستىرۋدا ءدىني تۇلعالار مەن ساياسي كوشباسشىلاردىڭ ءرولىن ايقىنداۋعا ءوز ۇلەسىن قوستى. وسىنداي قايراتكەرلەردىڭ الەۋەتىن بىرىكتىرە وتىرىپ, الەمدە بەيبىت ءومىردى قالىپتاستىرۋعا جانە جان-جاقتى دامۋ ماسەلەلەرىن شەشۋگە بولاتىنىن كورسەتتى دەپ سانايمىن. بۇگىندە الەمدە گەوساياسي جاعدايلار شيەلەنىسىپ تۇرعان قيىن كەزەڭ ەكەنى بارشاعا بەلگىلى. ويتكەنى, الەمدىك گەوساياسات كارتاسىندا قالىپتاسقان بۇگىنگى احۋال كۇردەلى. ءدىني ۇعىمداردى بۇرمالاعان ءتۇرلى توپتار, اعىمدار پايدا بولدى. ولاردىڭ اگرەسسيالىق پىكىرلەرى قۇرامىنداعى مۇشەلەرىن لاڭكەستىك ارەكەتتەرگە يتەرمەلەۋدە. وسى پروبلەمالاردى قايتكەندە بىرلەسىپ شەشە الامىز؟ الەم ەلدەرىنىڭ «يسلام مەملەكەتى» دەگەنگە قاتىناسى قالاي بولۋى كەرەك؟ اتالعان ۇيىم جاساپ وتىرعان لاڭكەستىك ارەكەتتەرگە قايتسەك قارسى تۇرا الامىز؟ راديكالدىق ارەكەتتەردىڭ الدىن قالاي الامىز؟ ءارتۇرلى ءدىن وكىلدەرى بۇل ماسەلەلەرمەن قايتكەندە بىرلەسىپ كۇرەسە الادى؟ قۇرىلتاي بارىسىندا وسى ماسەلەلەر توڭىرەگىندە جەتەرلىكتەي پىكىرلەر ايتىلىپ, باعىت-باعدارلار مەن ورتاق ۇستانىمداردى ناقتىلاۋعا جاعدايلار جاسالدى دەپ ايتۋعا بولادى.
ەركىنبەك شوحاەۆ,
اتىراۋ وبلىسى ءدىن ىستەرى باسقارماسىنىڭ باسشىسى.