استانا. 24 مامىر. ەلىمىزدىڭ ايبىندى اسكەرى قاتارىن وسى جىلى سىر وڭىرىنەن اتتاناتىن 700 اسا ازامات تولىقتىرماق. سولاردىڭ ءبىر لەگىن ايماق باسشىسى قىرىمبەك كوشەرباەۆ شىعارىپ سالىپ, ءسات-ساپار تىلەدى. بۇل تۋرالى قىزىلوردا وبلىسى اكىمدىگىنىڭ ءباسپاسوز قىزمەتى حابارلادى.
ەلىمىزدە اسكەرگە الىناتىن ازاماتتارعا قويىلار تالاپ كۇشەيىپ كەلەدى. ەڭ الدىمەن جاستاردىڭ دەنساۋلىعى قۇرىشتاي بەرىك, ءبىلىمدى بولۋى شارت. سوندا عانا قازاقستاننىڭ ساربازدارى جوعارعى اسكەري دايىندىقتان وتكەن, ەلىن سۇيەتىن, وتانىن قورعايتىن مىقتى ازامات بولىپ شىعادى.
جاس ساربازداردى اسكەرگە شىعارىپ سالۋ سالتاناتىندا قىرىمبەك كوشەرباەۆ: «سىزدەر ەر جەتىپ, بۇگىن اسكەر قاتارىنا اتتانعالى وتىرسىزدار. ەل تىنىشتىعىن كۇزەتۋ – ازاماتتىق بورىش. قازىر زامان تىنىش. الايدا, بۇل وتان كۇزەتىندەگى جاۋىنگەردىڭ جاۋاپكەرشىلىگىن جەڭىلدەتپەيدى. الاشتىڭ اناسى – سىر ەلىنىڭ بۇگىنگى جاستارى العان ءتالىم-تاربيەسى, ءبىلىمى مەن ومىرلىك تاجىريبەسىنىڭ ارقاسىندا مەرزىمدى اسكەري قىزمەتىن جوعارى جاۋىنگەرلىك دەڭگەيدە اتقاراتىنىنا سەنىمىمىز مول. وسىعان وراي مەن سىزدەرگە ۇلكەن سەنىم ارتىپ «امانات» جولداپ وتىرمىن», – دەدى.
ايتا كەتەيىك, اسكەري بورىشىن وتەۋشىلەردىڭ بارلىعىنا وبلىس اكىمىنىڭ اتىنان قادىر مىرزا ءالىنىڭ «الماس جەردە قالماس» كىتابى تابىس ەتىلدى. ال وبلىستىق ارداگەرلەر كەڭەسىنىڭ توراعاسى اق باتاسىن بەرىپ, ءسات-ساپار تىلەدى.
تالعات رايىمبەك.
دەرەك, سۋرەت: قىزىلوردا وبلىسى اكىمدىگىنىڭ ءباسپاسوز قىزمەتى.