پرەزيدەنتتىڭ ءباسپاسوز قىزمەتى ەلباسى نۇرسۇلتان نازارباەۆتىڭ اتىنا قىزىلوردا وبلىسىنىڭ اگرارلىق سالا وكىلدەرىنەن حات كەلگەنىن حابارلادى.
اۆتورلار ءوز حاتىندا اگروبيزنەسكە جاسالعان قولداۋ شارالارىنىڭ ارقاسىندا ەلدىڭ اگروونەركاسىپ كەشەنى قارقىندى دامىپ كەلە جاتقانى ءۇشىن مەملەكەت باسشىسىنا العىس ايتقان. وسىنداي قولداۋ ناتيجەسىندە كۇرىش ءوندىرىسىنىڭ كولەمى مەن مال باسى ايتارلىقتاي وسكەن. سونداي-اق, سوڭعى ەكى جىلدا اۋىل شارۋاشىلىعى سەكتورىنا سالىنعان ينۆەستيتسيا كولەمى 7,7 ەسەگە ۇلعايعان.
اگرارلىقتار كۇرىش ورۋ ناۋقانى تاياۋدا اياقتالعانىن, ونىڭ بارىسىندا 84 مىڭ گەكتار القاپتىڭ ءار گەكتارىنان 50,5 تسەنتنەردەن ءونىم الىنعانىن اتاپ وتكەن.
«ەل قامباسىنا 423 مىڭ توننا كۇرىش قۇيىلدى. تاۋەلسىزدىك تاريحىنداعى وسى رەكوردتىق كورسەتكىشكە سوڭعى ءۇش جىل بويى قول جەتكىزىلىپ كەلەدى», – دەلىنگەن حاتتا.
سوڭىندا اۆتورلار مەملەكەت باسشىسىنىڭ باستامالارىن جۇزەگە اسىرۋ ىسىنە بەلسەنە قاتىسۋعا جانە ەلدى ودان ءارى دامىتۋ ءۇشىن بار كۇش-جىگەرلەرىن جۇمىلدىرۋعا ءازىر ەكەنىن ايتقان.