قوستاناي. 24 مامىر. قوستانايدا ورمان شارۋاشىلىعى جانە جانۋارلار دۇنيەسى وبلىستىق-اۋماقتىق ينسپەكتسياسىنىڭ ەكى بىردەي لاۋازىم قىزمەتكەرى ورىنتاعىن بوساتتى. بۇل تۋرالى egemen.kz ءتىلشىسى حابارلادى.
ەكى شەنەۋنىكتىڭ قىزمەتتەن كەتۋى كيىكتىڭ قىرىلۋ وقيعاسىنا سايكەس كەلدى. سوندىقتان كوپشىلىك ولاردىڭ كيىكتىڭ ناۋبەتىنە قانداي قاتىسى بار دەگەن ويدا قالعان ەدى. وبلىستىق پروكۋراتۋرانىڭ 1-باسقارماسىنىڭ باستىعى اسقار سىزدىقوۆتىڭ جۋرناليستەرمەن وتكىزگەن بريفينگىندە شەنەۋنىكتەردىڭ قىزمەتتەن كەتۋ سەبەبى دە قوزعالدى. پروكۋرور ينسپەكتسيانىڭ بۇرىنعى باستىعى مارات بەگىمبەتوۆتىڭ قىزمەتتەن كەتۋ سەبەبى تۋرالى اشىپ ەشتەڭە ايتقان جوق. ونى قر مەملەكەتىتك قىزمەت جانە سىبايلاس جەمقورلىققا قارسى ءىس-قيمىل اگەنتتىگى وبلىستىق دەپارتامەنتىنىڭ ءباسپاسوز حاتشىسى ءمولدىر شەريەۆا حابارلادى.
ءمولدىر شەريەۆا: «2015 جىلى ساۋىردە وسى اتالعان وبىلستىق-اۋماقتىق يرنسپەكتسياعا تەكسەرۋ جۇرگىزىلگەن بولاتىن. وندا بىرقاتار كەمشىلىكتەر, زاڭ بۇزۋشىلىقتار انىقتالدى. ينسپەكتسيا باستىعى مارات بەگىمبەتوۆ 3 جىل باس بوستاندىعىنان ايىرىلعان جانە 5 جىلعا دەيىن مەملەكەتتىك قىزمەتكە كىرۋگە قۇقىعى جوق ميحايل سولومونوۆتى جۇمىسقا العان» دەدى. مەملەكەتتىك قىزمەت تۋرالى زاڭعا سايكەس سىبايلاس جەمقورلىققا قاتىستى قىلمىس جاساعان ادام مەملەكەتتىك قىزمەتكە قابىلدانباۋى ءتيىس. ينسپەكتسيا باستىعى زاڭ تالاپتارىن ورىنداماعان, ميحايل سولومونوۆتى ورمان شارۋاشىلىعى جانە جانۋارلار دۇنيەسى وبلىستىق-اۋماقتىق ينسپەكتسياسىنىڭ ءبولىم باستىعى ەتىپ قابىلداعان.
مەملەكەتتىك قىزمەت جانە سىبايلاس جەمقورلىققا قارسى ءىس-قيمىل دەپارتمامەنتى بۇل تۋرالى اكىمشىلىك ماتەريال دايىندادى. ول بويىنشا مارات بەگىمبەتوۆ قىزمەتتەن كەتتى جانە 100 ايلىق كورسەتكىش كولەمىندە ايىپ تولەيدى. مارات بەگىمبەتوۆ مۇنداي شەشىمگە نارازىلىعىن ءبىلدىرىپ, ءىستى سوتقا بەرگەن بولاتىن. بىراق سوت ساتىلارى ونىڭ ارىزىن قاناعاتتاندىرعان جوق. ول قىزمەتىنەن كەتتى. سونىمەن قاتار, ميحايل سولومونوۆ تا قىزمەتىنەن كەتتى. قازىر ينسپەكتسيانىڭ باستىعى قىزمەتىنىڭ مىندەتىن باسقا اۋماقتىق-وبلىستىق ينسپەتسيا باستىعىنىڭ ورىنباسارى نۇرقان سارسەنوۆ ورىنداپ وتىر.
ءنازيرا جارىمبەتوۆا.
دەرەك, سۋرەت: egemen.kz