قازاقستاننىڭ گەرمانياداعى ەلشىسى بولات ءنۇسىپوۆ بۋندەستاگ سىرتقى ىستەر, قورعانىس جانە قاۋىپسىزدىك كوميتەتىنىڭ توراعاسى نوربەرت رەتتگەنمەن كەزدەسۋ وتكىزدى. كەزدەسۋ بارىسىندا حالىقارالىق كۇن تارتىبىندەگى ماسەلەلەر, بۇۇ شەڭبەرىندە كوپجاقتى ىنتىماقتاستىقتى كەڭەيتۋ جانە ەكى ەلدىڭ پارلامەنتتىك ديپلوماتياسىن ءارى قاراي دامىتۋ ماسەلەلەرى تالقىلاندى.
قازاقستاندىق ديپلومات نەمىس دەپۋتاتىن قازاقستاننىڭ 2017-2018 جىلدارى بۇۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە وتىنىمىنە نەگىز بولعان ماسەلەلەر مەن بۇۇ باس اسسامبلەياسىنىڭ 70-ءشى مەرەيتويلىق سەسسياسى شەڭبەرىندە ەلباسى نۇرسۇلتان نازارباەۆ سويلەگەن سىرتقى ساياسات باستامالارىنان حاباردار ەتىپ, «100 ناقتى قادام» ۇلت جوسپارىنىڭ, «نۇرلى جول – بولاشاققا باستار جول» جاڭا ەكونوميكالىق ساياساتىنىڭ نەگىزگى ماقساتتارى جانە مىندەتتەرىمەن تانىستىردى.
نەمىس تاراپى بۇۇ شەڭبەرىندە قازاقستاننىڭ حالىقارالىق باستامالارىنا, ونىڭ ىشىندە ەلباسىنىڭ «جاڭا بولاشاق» تۇجىرىمداماسىن جاساۋمەن قوسا, «جاھاندىق ستراتەگيالىق باستاما-2045» جوسپارىن ازىرلەۋ, بىرىككەن ۇلتتار ۇيىمىنىڭ ەكونوميكالىق جانە الەۋمەتتىك كەڭەسىن جاھاندىق دامۋ كەڭەسىنە اينالدىرۋ, سونداي-اق, بۇۇ-نىڭ يادرولىق قارۋدان ازات الەمگە قول جەتكىزۋ جونىندەگى جالپىعا ورتاق دەكلاراتسياسىن قابىلداۋ جونىندەگى ۇسىنىستارىنا جوعارى باعا بەردى.
وسى كۇنى ەكى ەلدىڭ پارلامەنتتىك ديپلوماتياسىن ءارى قاراي دامىتۋ ماقساتىندا قازاقستان ەلشىسى بۋندەستاگ دەپۋتاتتارى – «گەرمانيا-ورتالىق ازيا» پارلامەتتىك توبىنىڭ مۇشەلەرىمەن كەزدەسۋ وتكىزدى. كەزدەسۋ بارىسىندا نەمىس پارلامەنتاريلەرى ەكىجاقتى پارلامەنتارالىق ىنتىماقتاستىقتىڭ جوعارى دەڭگەيىن, ەكى ەل باسشىلىقتارى ساپارلارى مەن قازاقستان جانە گفر پارلامەنتتىك توبى قىزمەتىنىڭ ەلەۋلى ىرعاعىن اتاپ ءوتتى. نەمىس دەپۋتاتتارى كەلەسى جىلدىڭ كوكتەمىندە قازاقستانعا بارۋ جونىندەگى وزدەرىنىڭ جوسپارلارى جونىندە ءمالىم ەتتى.
«ەگەمەن-اقپارات».