وتكەن اپتادا مادەنيەت جانە سپورت مينيسترلىگى مەن قاراعاندى وبلىسى اكىمدىگى مەملەكەتتىك-كونفەسسيالىق قاتىناستاردى رەتتەۋ سالاسىنداعى ءوزارا ارەكەتتەستىك تۋرالى مەموراندۋمعا قول قويدى.
بۇل مەموراندۋم مادەنيەت جانە سپورت ءمينيسترى ا.مۇحامەدي ۇلى مەن قاراعاندى وبلىسىنىڭ اكىمى ن.ابدىبەكوۆ اراسىندا بولىپ, قۇجاتتى بەكىتۋ ءراسىمى ءوتتى. وندا قامتىلعان باستى باعىت: ءدىن سالاسىنداعى تۇراقتىلىقتى قامتاماسىز ەتۋ جانە ەلدىڭ دامۋىنداعى زايىرلىلىق قاعيداتتاردى ىلگەرىلەتۋ بويىنشا ورتالىق جانە جەرگىلىكتى اتقارۋشى ورگانداردىڭ كۇشتەرىن بىرىكتىرۋ كوزدەلگەن.
تاراپتار مەموراندۋمدى بەكىتۋ بارىسىندا قازاقستاننىڭ كوپەتنيكالىق جانە كوپكونفەسسيالىق سانالۋاندىعىمەن ەرەكشەلەنەتىن ساناۋلى ەلدەردىڭ قاتارىنا ەنەتىنىن اتاپ كورسەتتى. ولار وسى تۇرعىدا ەلباسى نۇرسۇلتان نازارباەۆتىڭ وتانىمىزداعى ەتنوسارالىق جانە كونفەسسياارالىق كەلىسىمنىڭ قازاقستاندىق مودەلىن ودان ءارى نىعايتۋ ماقساتىندا جۇرگىزىپ وتىرعان ساياساتىن ىسكە اسىرا بەرەتىندەرىن جەتكىزدى.
ەكى جاق تا وزدەرىنىڭ ءدىني سالاداعى نەگىزگى باعىتتارى بويىنشا ۇزاق مەرزىمگە ىنتىماقتاساتىنى تۋرالى ۋاعدالاستى. بۇل جۇمىستاعى نەگىزگى باسىمدىق وبلىستاردىڭ, استانا جانە الماتى قالالارىنىڭ اكىمدىكتەرىنە ادىستەمەلىك كورسەتۋگە, راديكالدىق ءدىني اعىمداردىڭ ۇستانۋشىلارى اراسىندا وڭالتۋ جۇمىستارىن وتكىزۋگە, سول سەكىلدى قازاقستان ۇكىمەتىنىڭ جانە جەرگىلىكتى دەڭگەيدەگى وبلىس, قالا, اۋدان اكىمدىكتەرى جانىنداعى ءدىني بىرلەستىكتەرمەن بايلانىستار جونىندەگى كەڭەستەردىڭ ءىس پارمەندىلىگىن كوتەرۋگە باعىتتالاتىن بولادى.
سۇلەيمەن مامەت,
«ەگەمەن قازاقستان».