قازاقستان پرەزيدەنتى نۇرسۇلتان نازارباەۆ قىرعىز رەسپۋبليكاسىنىڭ پرەزيدەنتى المازبەك اتامباەۆپەن كەزدەستى, دەپ حابارلادى قازاقستان پرەزيدەنتىنىڭ ءباسپاسوز قىزمەتى.
مەملەكەتتەر باسشىلارى نەگىزگى سالالارداعى ەكىجاقتى ىنتىماقتاستىقتى ودان ءارى دامىتۋ ماسەلەلەرىن, سونداي-اق, ءوڭىرلىك جانە حالىقارالىق قۇرىلىمدار اياسىنداعى ءوزارا ىقپالداستىقتىڭ جولدارىن تالقىلادى. سونىمەن قاتار, حالىقارالىق كۇن تارتىبىندەگى مەيلىنشە ماڭىزدى جايتتار جونىندە اڭگىمە ءوربىدى.
نۇرسۇلتان نازارباەۆ ەكى ەل حالقىنىڭ تاريحي, تىلدىك جانە ءمادەني جاقىندىعىنا نازار اۋداردى.
– قىرعىزستاندا تۇراقتىلىق پەن تىنىشتىقتىڭ ساقتالۋى, ەلدىڭ دامۋىنىڭ جالعاسۋى, مىقتى مەملەكەت بولۋى – بارلىق قازاقستاندىقتاردىڭ ويى وسى, – دەدى قازاقستان پرەزيدەنتى.
المازبەك اتامباەۆ ەكى ەل اراسىنداعى دوستىق پەن تاتۋ كورشىلەستىك قارىم-قاتىناستى نىعايتۋعا قوسقان ەلەۋلى ۇلەسى ءۇشىن قىرعىزستان حالقى اتىنان نۇرسۇلتان نازارباەۆقا I دارەجەلى «ماناس» وردەنىن تاپسىردى.
قازاقستان پرەزيدەنتى جوعارى ناگرادا ءۇشىن العىسىن ءبىلدىرىپ, ءوزارا ىقپالداستىقتى ودان ءارى دامىتۋدىڭ ماڭىزدىلىعىن اتاپ ءوتتى.
– بۇل ناگراداعا لايىق بولۋعا, ەلدەرىمىز اراسىنداعى دوستىق پەن باۋىرلاستىقتى نىعايتۋعا, قارىم-قاتىناسىمىزدىڭ دەڭگەيىن ودان ءارى ارتتىرۋعا تىرىسامىن, – دەدى نۇرسۇلتان نازارباەۆ.
سۋرەتتەردى تۇسىرگەندەر
س.بوندارەنكو, ب.وتارباەۆ.