استانا. 1 قىركۇيەك. مەملەكەت باسشىسى قىتايدا قازاقستاننىڭ بۇقارالىق اقپارات قۇرالدارى وكىلدەرىنە ارنالعان بريفينگ وتكىزدى. بۇل تۋرالى akorda.kz حابارلادى.
بريفينگ بارىسىندا ەلباسى قحر-عا مەملەكەتتىك ساپاردىڭ ماڭىزى جوعارى ەكەنىن اتاپ ءوتتى.
«الەمدىك ەكونوميكا داعدارىستى باستان وتكەرىپ جاتقان بۇگىنگى ۋاقىتتا الەمدىك قارجى ينستيتۋتتارىنىڭ ينۆەستيتسيالىق مۇمكىندىكتەرى ايتارلىقتاي ازايدى. وسىنداي جاعدايدا قىتايمەن ءوزارا ءىس-قيمىل ءبىز ءۇشىن كۇردەلى كەزەڭدى ەڭسەرۋدىڭ قولايلى مۇمكىندىگى بولىپ سانالادى», – دەدى قازاقستان پرەزيدەنتى.
نۇرسۇلتان نازارباەۆ سونداي-اق جۋرناليستەرگە قحر توراعاسى سي تسزينپينمەن كەزدەسۋ بارىسىندا جاسالعان ەكىجاقتى كەلىسىمدەر تۋرالى ايتىپ بەردى. سولاردىڭ ىشىندەگى ەڭ ءىرى جوبالاردا پاۆلودار اليۋميني زاۋىتىنىڭ ءوندىرىس قۋاتىن 150 مىڭ تونناعا جەتكىزۋ, ماڭعىستاۋ وبلىسىندا مۇناي-گاز جابدىقتارىن شىعاراتىن زاۋىت قۇرىلىسىن سالۋ قاراستىرىلادى.
پرەزيدەنت ساپاردىڭ وزگە دە قىرلارىنا توقتالا كەلىپ, ەكىنشى دۇنيەجۇزىلىك سوعىستىڭ نۇكتەسى ناق وسى قىتايدا قويىلعانىن اتاپ كورسەتتى.
نۇرسۇلتان نازارباەۆ قازاقستانداعى ماڭىزدى وقيعاعا دا توقتالىپ, دەپۋتاتتاردى پارلامەنت سەسسياسىنىڭ اشىلۋىمەن قۇتتىقتادى.
«مەن ءبىزدىڭ پارلامەنتشىلەرگە تابىس تىلەيمىن, ولارعا بەس ينستيتۋتسيونالدىق رەفورمانى زاڭنامالىق تۇرعىدان قامتاماسىز ەتۋ ءۇشىن بەلسەنە جۇمىس ىستەۋگە تۋرا كەلەدى. جىل اياعىنا دەيىن 57 زاڭنامالىق اكت قابىلداۋ جوسپارلانۋدا. ءبىزدىڭ پارلامەنتتىك فراكتسيالار بۇل مىندەتكە زور جاۋاپكەرشىلىكپەن قاراپ, ەلدەگى ماڭىزدى جاڭعىرتۋ ىسىنە ءوز ۇلەسىن قوسادى دەپ ويلايمىن», – دەدى قازاقستان پرەزيدەنتى.
سونىمەن قاتار, مەملەكەت باسشىسى قازاقستاندىقتاردى ءبىلىم كۇنىمەن قۇتتىقتادى.
«بۇگىن 7,5 مىڭ مەكتەپ 2,6 ميلليون بالاعا ەسىگىن اشتى, سونىڭ 300 مىڭى – ءبىرىنشى سىنىپ وقۋشىلارى. ءبىز ءاربىر ءبىرىنشى سىنىپ وقۋشىسىنا مەنىڭ جەكە قۇتتىقتاۋىممەن بىرگە وتانىمىز تۋرالى كىتاپ سىيلادىق», – دەدى نۇرسۇلتان نازارباەۆ.
ايدار ورىسباەۆ.
دەرەك, سۋرەت: akorda.kz.