بيىلعى جازدا جامبىل وبلىسى تۇرعىندارىنىڭ دەنساۋلىعىن جاقسارتۋ جانە دەنساۋلىق ساقتاۋ جۇيەسىن مەديتسينالىق كادرلارمەن قامتاماسىز ەتۋ ماقساتىندا جامبىل وبلىسىنىڭ اكىمدىگى مەن س.اسفەندياروۆ اتىنداعى قازاق ۇلتتىق مەديتسينالىق ۋنيۆەرسيتەتى ءوزارا ىنتىماقتاستىق تۋرالى ەكىجاقتى مەموراندۋمعا قول قويعان بولاتىن. مىنە, سونىڭ ارقاسىندا جاقىندا تاراز قالاسىنداعى مەديتسينالىق كوللەدجى جانىنان س.اسفەندياروۆ اتىنداعى قازاق ۇلتتىق مەديتسينالىق ۋنيۆەرسيتەتىنىڭ فيليالى اشىلدى.
ىنتىماقتاستىق تۋرالى بۇل ەكىجاقتى مەموراندۋمنىڭ نەگىزگى باعىتى – مەديتسينا قىزمەتكەرلەرىنىڭ الەۋەتىن جەتىلدىرۋ, الەۋمەتتىك مەديتسينانى دامىتۋ. ياعني, تاراز قالاسىندا اتالمىش ۋنيۆەرسيتەتتىڭ فيليالىن اشا وتىرىپ, قاشىقتىقتان وقىتۋ مەن تەلەمەديتسينانى ەنگىزۋ, الەمدىك دەڭگەيدەگى شەتەلدىك مامانداردى شاقىرۋ. باستاپقى مەديتسينالىق-سانيتارلىق كومەك دەڭگەيىندە دياگنوستيكالاۋ ءجانە ەمدەۋدىڭ جاڭا تەحنولوگيالارى مەن مامانداندىرىلعان كومەكتى ەنگىزۋ. سونداي-اق, 2015-2016 جىلدار ارالىعىندا تاراز قالاسى مەن جۋالى اۋدانىندا مەديتسينالىق جانە الەۋمەتتىك كومەك كورسەتۋدى, جامبىل اۋدانى قىزىلتاڭ اۋىلىندا ورنالاسقان «ايشا ءبيبى» شيپاجايى بازاسىندا وڭالتۋ كومەگىن كورسەتۋدى دامىتۋ بولىپ تابىلادى. سوندىقتان جامبىل وبلىسى اكىمدىگىنىڭ قولداۋىمەن اشىلىپ وتىرعان ۋنيۆەرسيتەت فيليالى ايماقتا رەزيدەنتتەر دايىنداۋ جانە وقۋ ورنىنىڭ ستۋدەنتتەرىن ەمدەۋ مەكەمەلەرىندە ينتەرناتۋرادان وتكىزۋ, جوعارى كۋرس ستۋدەنتتەرىن دايىنداۋ جانە مەديتسينا ماماندارىنىڭ كاسىپتىك بىلىكتىلىكتەرىن ارتتىرۋمەن اينالىسادى. ارينە, وسىدان كەيىن ايماقتىق فيليالدىڭ بازاسىندا ۋنيۆەرسيتەتتىڭ پروفەسسورلىق-وقىتۋشىلىق قۇرامى جۇمىس ىستەپ, ولار ءوز كەزەگىندە تەك وقۋ ورنىنىڭ ستۋدەنتتەرىن عانا ەمەس, ەمدەۋ-الدىن الۋ مەكەمەلەرىنىڭ قىزمەتكەرلەرىنىڭ دە بىلىكتىلىكتەرىن ارتتىرۋمەن اينالىساتىن بولادى.
سوڭعى جىلدارى جامبىل وبلىسىنىڭ مەديتسينا سالاسى دامىپ كەلەدى. بيىل تاراز قالاسىندا 300 ورىندىق كوپسالالى اۋرۋحانا, 200 ورىندىق پەريناتالدىق ورتالىق, بايزاق اۋدانىندا 60 ورىندىق تۋبەركۋلەزگە قارسى ديسپانسەرى ىسكە قوسىلماق. مەركى اۋدانى مەن قاراتاۋ قالاسىندا 150 كەلۋشىگە ارنالعان ەمحانالاردىڭ قۇرىلىس جۇمىستارى جۇرگىزىلىپ جاتىر.
ورالحان ءداۋىت,
«ەگەمەن قازاقستان».
جامبىل وبلىسى.