استانا. 6 شىلدە. ءتارتىپ ساقشىلارى شىمكەنتتە ايەلدى تاسپەن ۇرىپ ءولتىردى دەگەن كۇدىكپەن ەر كىسىنى قولعا ءتۇسىردى. بۇل تۋرالى tvk تەلەارناسى حابارلادى.
قالالىق ىشكى ىستەر باسقارماسىنىڭ باسشىسى دانيار مەيىرحاننىڭ حابارلاۋىنشا, كۇدىكتىنى شۇعىل ارەكەت ەتۋ توبى جامبىل وبلىسىندا قولعا تۇسىرگەن. جاسى 34-تە. ال قازا تاپقان ايەلدىڭ جاسى 26-دا بولعان.
ايتا كەتەيىك, اتالعان تەلەارنا 4 شىلدە كۇنى قالانىڭ 11-شاعىن اۋدانىندا ايەل ادامنىڭ دەنەسى تابىلعانى جايىندا حابارلاعان بولاتىن. وندا ازاماتشانىڭ باسىن بىرەۋ تاسپەن ۇرىپ, جانشىپ كەتكەنى ايتىلعان. اۋىر سوققىدان جابىرلەنۋشى وقيعا ورنىندا قازا تاپقان. الايدا, جاقىن ماڭداعى ءۇيدىڭ تۇرعىندارى ەشقانداي كۇدىكتى داۋىستى ەستىمەگەن.
تالعات رايىمبەك.
دەرەك: tvk.
سۋرەت: tengrinews.kz.