استانا. 23 مامىر. ايفون ۇلىبريتانيا ازاماتىن وقتان امان ساقتاپ قالدى. بۇل تۋرالى vesti.ru حابارلادى.
دەنيەل كەننەدي ەسىمدى 25 جاستاعى ۇلىبريتانيا ازاماتى بۇزاقىلاردىڭ قولىنان جاپا شەگە جازدادى. ول وزىنە تاپ بەرگەن 19 جاستاعى قاسكويلەردىڭ قارۋلى ەكەنىن بىلمەگەن. قىلمىسكەرلەردىڭ وعىنان جىگىتتى ءتوس قالتاسىنداعى ايفون تەلەفونى امان ساقتاپ قالدى.
وقيعا ۇلىبريتانيانىڭ ۋيدنەس قالاسىندا بولعان. چەشير گرافتىعىنداعى قالا پاركىندە سەرۋەندەپ جۇرگەن دەنيەل كەننەدي سۋ قۇبىرىنىڭ تەتىگىن بۇراپ, بۇكىل اۋداندى تىرشىلىك كوزىنەن اجىراتىپ تاستاماق بولعان ەكى ءجاسوسپىرىمدى بايقاپ قالادى. كەننەدي بۇزاقىلارعا ەسكەرتۋ جاسايدى. الايدا, سوتقارلار جىگىتتىڭ سوزىنە اشۋلانىپ, وعان تارپا باس سالعان.
«جاس جىگىتتەردىڭ ءبىرى مەنىڭ ءسوزىمدى تىڭداپ بولماستان قالتاسىنان جىلتىراعان ءبىر زات الىپ شىقتى. بىرەر سەكۋندتان كەيىن جارق ەتكەن وتتان كوزىم شاعىلىسىپ كەتتى. الدەبىر كۇش كەۋدەمدى قاتتى كەپ سوقتى دا مەن قۇلاپ قالدىم. ەسىمدى جيناعاندا عانا بۇزاقىلاردىڭ ماعان قاراتا وق اتقانىن ءتۇسىندىم», – دەيدى بولعان وقيعا جايىندا دەنيەل كەننەدي.
ەكى بالانىڭ اكەسى كەننەديدى ءتوس قالتاسىندا تۇرعان تەلەفونى اجالدان الىپ قالعان. وق تۋرا ايفونعا بارىپ تيگەن ەكەن. وسىنىڭ ارقاسىندا سمارتفون جىگىتتىڭ ومىرلىك ماڭىزدى دەنە مۇشەلەرىن امان ساقتاپ قالدى.
جىگىتكە وق اتقان ءجاسوسپىرىم كوپ ۇزاماي قولعا ءتۇستى. ماۋسىم ايىندا بۇزاقى سوتقا تارتىلماق. تەرگەۋ-تەكسەرۋ كەزىندە جەرگىلىكتى بيلىك جەلىككەن جاس جىگىتتىڭ ءۇيىنىڭ ارتىنداعى اۋلاسىندا جاسىرىلعان قارۋدى تاپتى.
ەلامان قوڭىر.
دەرەك, سۋرەت: vesti.ru.