قاراعاندى. 1 قىركۇيەك. قاراعاندىدا دەپارتامەنتتەردىڭ بىرىندە باستىقتىڭ ورىنباسارى بولىپ قىزمەت ەتەتىن شەنەۋنىكتىڭ پاتەرىن ۇرىلار ۇپتەپ كەتتى. بۇل تۋرالى وبلىستىق ىشكى ىستەر باسقارماسىنىڭ ءباسپاسوز قىزمەتى حابارلادى.
ۇيدە ەشكىمنىڭ جوقتىعىن بىلگەن ۇرىلار ەكىنشى قاباتتاعى پاتەرگە جەتى قاراڭعى تۇندە بالكون ارقىلى تۇسكەن.
كەيىن بەلگىلى بولعانداي, ۇرىلار نوۋتبۋك, زەرگەرلىك بۇيىمدار, 245 مىڭ تەڭگە اقشا, فوتواپپارات, كيىم-كەشەك سياقتى ماتەريالدىق يگىلىكتەردى الىپ كەتكەن. قولدى بولعان زاتتاردىڭ جالپى قۇنى 984 مىڭ تەڭگە بولدى.
قازىرگى ۋاقىتتا وسى وقيعا بويىنشا قىلمىستىق ءىس قوزعالىپ, كۇدىكتىلەردىڭ كىم ەكەندىگى انىقتالۋ ۇستىندە.
قايرات ءابىلدينوۆ.
دەرەك: قاراعاندى وبلىستىق ىشكى ىستەر باسقارماسىنىڭ ءباسپاسوز قىزمەتى.
سۋرەت: tehnews.kz.