ءماجىلىس سپيكەرى قابيبوللا جاقىپوۆ اۆستريا پارلامەنتى ۇلتتىق كەڭەسى توراعاسىنىڭ ورىنباسارى كارلحاينتس كوپفپەن كەزدەستى. ول ءبىزدىڭ ەلىمىزگە VIII استانا ەكونوميكالىق فورۋمىنا قاتىسۋعا كەلگەن, دەپ حابارلادى ءماجىلىستىڭ ءباسپاسوز قىزمەتى.
مەيمان استانادا كەزەكتى رەت ءتۇرلى ەل وكىلدەرىنىڭ جينالىپ, ساياسي, ەكونوميكالىق ماسەلەلەردى تالقىلاۋ مۇمكىندىگىنە يە بولۋىنىڭ ماڭىزدىلىعىنا ايرىقشا كوڭىل ءبولدى. كەزدەسۋ يەلەرى استانا مەن ۆەنانىڭ سەنىمدى سەرىكتەستەر ەكەنىن اتاپ ءوتتى. ك.كوپفتىڭ پىكىرىنشە, قازاقستان ەۋروپانىڭ ورتالىق ازياداعى دانەكەرى رەتىندە جوعارى دەڭگەيدە قىزمەت اتقارىپ كەلەدى.
قابيبوللا جاقىپوۆتىڭ اتاپ وتكەنىندەي, ءبىزدىڭ ەلىمىز الداعى ۋاقىتتا دا شىعىس پەن باتىس, وڭتۇستىك پەن سولتۇستىك اراسىنداعى دىنارالىق, مادەنيارالىق ۇنقاتىسۋدى دامىتۋعا بارىنشا ىقپال ەتەتىن بولادى. وعان استانادا وتەتىن الەمدىك جانە ءداستۇرلى دىندەر كوشباسشىلارىنىڭ سەزى تولىق دالەل.
ساۋدا-ەكونوميكالىق ىنتىماقتاستىقتى ءسوز ەتكەندە, ءماجىلىس سپيكەرى اۆستريالىق بيزنەسمەندەردى «نۇرلى جول» جاڭا ەكونوميكالىق ساياساتى مەن ءۇيدب اياسىندا قازاقستاندا يندۋستريالىق-يننوۆاتسيالىق جوبالاردى جۇزەگە اسىرۋعا بەلسەنە قاتىسۋعا شاقىردى. مالىمەت بويىنشا, وتكەن جىلى ەكى ەل اراسىنداعى تاۋار اينالىمى 3,1 ملرد. اقش دوللارىن قۇراعان.
ءوز كەزەگىندە كارلحاينتس كوپف ءبىزدىڭ ەلىمىزدىڭ ايقىن جەتىستىكتەرىن ايتىپ, اۆستريالىق كومپانيالاردىڭ قازاقستاندا ىقىلاسپەن جۇمىس ىستەيتىنىن اتاپ ءوتتى. سونداي-اق, ول ەكىجاقتى قارىم-قاتىناستى تەك ۇكىمەتتەر مەن ديپلوماتيالىق بايلانىستار ارقىلى عانا ەمەس, سونىمەن قاتار, پارلامەنتتەر اراسىندا دا دامىتۋ كەرەكتىگىنە توقتالدى.