استانانىڭ تۋعان كۇنى بيىل دا ادەتتەگىدەي شاتتىققا تولى كۇندەر مەن دۋمانعا تولى كەشتەر سىيلايتىن ماڭىزدى ءىس-شارالاردان باستاۋ الدى. ءبىر جەتى بويى ۇلان-اسىر تويعا ۇلاساتىن مەرەكەلىك شارالاردىڭ العاشقى لەگى باستالىپ تا كەتتى. سونىڭ ءبىر ايعاعى, كەشە ەلورداداعى وقۋشىلار سارايىنىڭ ورتالىق الاڭىندا وتكەن «استانام – اسقاق ءانىم!» اتتى شارا. ساحنادا وقۋشىلار سارايىنىڭ تاربيەلەنۋشىلەرى ونەر كورسەتىپ, ءان مەن بيدەن شاشۋ شاشتى. بۇل مەرەكەلىك كونتسەرتتى تاماشالاۋعا بالالار, قالا تۇرعىندارى مەن قوناقتارى جينالدى.
سونداي-اق, شارا اياسىندا ونەرلى بالالاردىڭ قاتىسۋىمەن جاس سۋرەتشىلەر كورمەسى, حيپ-حوپ بي الاڭى, سپورت الاڭى (كاراتە گودزيۋ-ريۋ, توعىزقۇمالاق, شاحمات, تاەكۆوندو, ارقان تارتىس, كوڭىلدى ستارتتار), بي فلەش-موبى ءوتتى. بارلىق شىعارماشىلىق الاڭداردا وقۋشىلار سارايىنىڭ تاربيەلەنۋشىلەرى ونەر كورسەتتى. ىرعاقتى بيلەر مەن سپورتتىق سايىستار قاتىسۋشىلار مەن مەرەكە قوناقتارىن ەرەكشە كوڭىل كۇيگە بولەدى. سونىمەن قاتار, جاس سۋرەتشىلەر ءوز تۋىندىلارىن كورەرمەن نازارىنا ۇسىنسا, جول جيەكتەرىنە سالىنعان سۋرەت سايىسىندا بالالاردىڭ ءوز قابىلەتتەرىن تانىتۋىنا جانە ەلورداعا ءوز تۋىندىلارىنىڭ ءبىر بولىگىن سىيلاۋعا مۇمكىندىك بەردى.
مەرەكەلىك باعدارلامادا وقۋشىلار سارايىنىڭ ونەر ۇجىمدارى: سوليستەر مەن ۆوكالدىق توپتار, شولپان قورعانبەكوۆا جەتەكشىلىك ەتەتىن دومبىرا, قوبىز, فلەيتا انسامبلدەرى ۇجىمى, كايرات شمانوۆ جەتەكشىلىك ەتەتىن حورەوگرافيالىق انسامبل كوپشىلىك الدىنا شىقتى. جاس گيمناسشىلار مەن كاراتيستەردىڭ شارشى الاڭداعى ونەرى كورەرمەن قاۋىمدى بەي-جاي قالدىرمادى. سونىمەن قوسا, وقۋشىلار سارايىنىڭ جاس ءسانگەرلەرىنىڭ قولىنان شىققان «Fashion kz. جاز-2015» جازعى توپتاماسى تانىستىرىلدى. اتالمىش شارا سوڭى اۋەگە ءتۇرلى-ءتۇستى شارلاردى ۇشىرۋمەن جالعاستى.
راۋشان تاۋىرحانقىزى,
جۋرناليست.