ۇلى وتان سوعىسىنداعى جەڭىستىڭ 70 جىلدىق مەرەيتويىنا وراي حەلسينكي قالاسىندا قازاقستان ەلشىسى عالىمجان قويشىباەۆتىڭ فينليانديا ۇلتتىق مۇراعاتىنىڭ باس ديرەكتورى يۋسسي نۋورتەۆامەن كەزدەسۋى ءوتتى. يۋ.نۋورتەۆا مۇراعات ءىسى سالاسىنداعى قارىم-قاتىناس قازاقستان مەن فينليانديا اراسىنداعى مادەني-گۋمانيتارلىق ىنتىماقتاستىقتى دامىتۋ ءۇشىن ماڭىزدى ۇلەس بولىپ تابىلاتىنىن اتاپ ءوتتى. اڭگىمە بارىسىندا فين تاراپى ۇلى وتان سوعىسى كەزىندە قازا تاپقان جانە فينليانديادا جەرلەنگەن قازاقستاندىق 268 اسكەري تۇتقىننىڭ تاعدىرلارى تۋرالى مالىمەتتەردى رەسمي تۇردە تاپسىردى. بۇعان دەيىن اتالعان اقپارات جارتىلاي قاراعاندى, پاۆلودار وبلىستارىنىڭ جانە استانا قالاسىنىڭ مۇراعاتتارىنا بەرىلگەن-ءتىن. سونىمەن قاتار, فين تاراپى فينليانديا اۋماعىندا بولعان (ولاردىڭ اراسىندا قازاقستان تۋمالارى بولۋى مۇمكىن) جانە سوعىستىڭ اياقتالۋىنان كەيىن رەپاترياتسيا كەزىندە كسرو اۋماعىنا ورالعان بۇرىنعى كەڭەستىك اسكەري تۇتقىنداردىڭ تاعدىرى تۋرالى قولدا بار اقپاراتتى بەرۋگە دايىن ەكەنىن ءبىلدىردى. قۇربان بولعان قازاقستاندىق جاۋىنگەرلەردىڭ رۋحىنا فينليانديانىڭ قۇرمەتپەن قاراعانى ءۇشىن ريزاشىلىعىن بىلدىرە وتىرىپ, قازاقستان ەلشىسى ەكى ەلدىڭ جالپى تاريحى تۇرعىسىنان كەڭەستىك اسكەري تۇتقىنداردىڭ, سونىڭ ىشىندە, ءبىزدىڭ ەلىمىزدىڭ تۋمالارىنىڭ تاعدىرلارىن زەرتتەۋدىڭ ماڭىزدىلىعىن اتاپ ءوتتى. قازاقستاندىق ديپلومات مۇراعات ءىسى سالاسىنداعى ەكىجاقتى ىنتىماقتاستىقتىڭ ۇزاق ءداستۇرلەرىن اتاپ ءوتىپ, ونىڭ باستاماسى رەتىندە 2009 جىلى قازاقستان پرەزيدەنتى نۇرسۇلتان نازارباەۆتىڭ فينلياندياعا ساپارى بارىسىندا قازاقستاننىڭ مادەنيەت جانە اقپارات مينيسترلىگى مەن فينليانديانىڭ ۇلتتىق مۇراعاتى اراسىندا قول قويىلعان ىنتىماقتاستىق تۋرالى كەلىسىمدى اتادى. وسى كەلىسىمدەر نەگىزىندە ەكى جاق بىرنەشە رەت ەكى ەلگە قاتىستى قۇجاتتارمەن الماستى. اتاپ ايتقاندا, فينليانديانىڭ ۇلتتىق مۇراعاتى قورىنان 1941-1944 جىلدارداعى جاۋىنگەرلىك ارەكەتتەر كەزىندە قازا تاپقان نەمەسە تۇتقىنعا تۇسكەن قازاقستاندىقتاردىڭ تاعدىرلارى تۋرالى اقپارات بەرىلدى. ءوز كەزەگىندە, فين تاراپى 1941-1944 جىلدارى قاراعاندى لاگەرىندە بولعان فين سوعىسىنىڭ تۇتقىندارى تۋرالى قۇجاتتار الدى. فينليانديا اۋماعىندا 1941-1945 جىلدارداعى ۇلى وتان سوعىسى كەزىندە قازا تاپقان قازاقستاندىق جاۋىنگەرلەردى انىقتاۋ بويىنشا جۇمىس جەڭىستىڭ 70 جىلدىعىن قازاقستاندا دايىنداۋ جانە تويلاۋ جونىندەگى ءىس-شارالار جوسپارى اياسىندا جۇزەگە استى.
ساۋلەبەك ءبىرجان.