قاراعاندى. 19 قازان. استانا قالاسىندا قازاقستان رەسپۋبليكاسىنىڭ مادەنيەت جانە سپورت مينيسترلىگى مەن قاراعاندى وبلىسىنىڭ اكىمدىگى ءدىني سالادا تۇراقتىلىقتى قامتاماسىز ەتۋ جونىندەگى ىنتىماقتاستىق تۋرالى مەموراندۋمعا قول قويدى. بۇل تۋرالى وبلىس اكىمىنىڭ ءباسپاسوز قىزمەتى حابارلادى.
مەموراندۋم ءدىني سالادا تۇراقتىلىقتى قامتاماسىز ەتۋ جانە ەلدىڭ دامۋىنداعى زايىرلى ۇستانىمداردى ىلگەرىلەتۋ بويىنشا ورتالىق جانە جەرگىلىكتى اتقارۋشى ورگانداردىڭ ءىس-قيمىلىن بىرىكتىرۋگە باعىتتالعان. قۇجاتتا وبلىس اكىمدىگىنە ادىستەمەلىك كومەك كورسەتۋ, راديكالدىق ءدىني اعىمدارداعى ادامدار اراسىندا ماقساتتى الدىن الۋ جانە ساۋىقتىرۋ جۇمىستارىن جۇرگىزۋ جانە ۇكىمەت پەن اكىمدىكتەر جانىنداعى ءدىني بىرلەستىكتەرمەن بايلانىس كەڭەستەرى جۇمىسىنىڭ تيىمدىلىگىن ارتتىرۋعا ايرىقشا كوڭىل بولىنگەن.
مەموراندۋمعا مادەنيەت جانە سپورت ءمينيسترى ارىستانبەك مۇحامەدي ۇلى جانە قاراعاندى وبلىسىنىڭ اكىمى نۇرمۇحامبەت ابدىبەكوۆ قول قويدى.
قايرات ءابىلدينوۆ.
دەرەك, سۋرەت: قاراعاندى وبلىس اكىمىنىڭ ءباسپاسوز قىزمەتى.