استانا. 5 شىلدە. كەشە قازاقستان شاحمات فەدەراتسياسىنىڭ كەزەكتەن تىس سەزى ءوتتى. باسقوسۋدا فەدەراتسيانىڭ پرەزيدەنتى بولىپ عالىمجان ەسەنوۆ سايلاندى. بۇل تۋرالى اتالعان ۇيىمنىڭ رەسمي سايتىنا سىلتەمە جاساعان «قازاقپارات» حابارلادى.
حابارلامادا: «سەزدە قازاقستاننىڭ شاحمات فەدەراتسياسىنىڭ جاڭا پرەزيدەنتى بولىپ عالىمجان ەسەنوۆ سايلاندى. ول Shakhmardan Yessenov Foundation عىلىم-ءبىلىم قورىنىڭ قۇرىلتايشىسى, «اتف بانك» اق ديرەكتورلار كەڭەسىنىڭ توراعاسى», – دەلىنگەن.
ايتا كەتەيىك, بۇعان دەيىن بۇل قىزمەتتى ينۆەستيتسيالار جانە دامۋ ءمينيسترى اسەت يسەكەشەۆ اتقارعان ەدى. ول شاحمات فەدەراتسياسىنىڭ قامقورلىق كەڭەسىنىڭ توراعاسى بولىپ سايلاندى.
فەدەراتسيا پرەزيدەنتى قىزمەتىنەن باس تارتۋىن مينيسترلىكتەگى جۇمىس اۋقىمىنىڭ ارتۋىمەن تۇسىندىرگەن مينيستر ءوزىنىڭ قازاقستاندا شاحمات ويىنىنىڭ دامۋىنا ءاردايىم بارىنشا قولداۋ كورسەتەتىنىن جەتكىزدى.
ەلامان قوڭىر.
دەرەك, سۋرەت: «قازاقپارات».