جاقىندا ۇلان-باتىردا قازاقستاننىڭ موڭعولياداعى ەلشىلىگى موڭعوليا عىلىم اكادەمياسىنىڭ جانىنداعى حالىقارالىق قاتىناستار ينستيتۋتىمەن بىرلەسە وتىرىپ, «قازاق حاندىعىنا – 550 جىل: قازاقستان-موڭعوليا تاريحىنىڭ وزەكتى ماسەلەلەرى» تاقىرىبىندا دوڭگەلەك ۇستەل ۇيىمداستىردى.
شارا بارىسىندا قازاق حاندىعىنىڭ قۇرىلۋى تاريحىنىڭ نەگىزگى اسپەكتىلەرى تالقىلانىپ, قازاقستان مەن موڭعوليا مەملەكەتتەرىنىڭ دامۋ تاريحى, سونداي-اق, بولاشاق ۇرپاق ءۇشىن ۇلتتىق بىرلىكتى ساقتاۋ ماسەلەلەرى تۋرالى پىكىر الماسىلدى. دوڭگەلەك ۇستەل جۇمىسىنا ءال-فارابي اتىنداعى قازاق ۇلتتىق ۋنيۆەرسيتەتىنىڭ عالىمدارى, تاريح عىلىمدارىنىڭ دوكتورلارى, پروفەسسورلار توقتامىس جۇماعۇلوۆ پەن گۇلنار مەڭدىقۇلوۆا, موڭعوليانىڭ عىلىمي-زەرتتەۋ مەكەمەلەرى, سونداي-اق, جەرگىلىكتى باق وكىلدەرى قاتىستى.
قازاقستاننىڭ موڭعولياداعى ەلشىسى قالىبەك قوبلاندين شارانىڭ مەملەكەتتەر تاريحىن تەرەڭىرەك زەرتتەۋدەگى الار ورنىنا توقتالىپ, تۇركى-موڭعول يمپەرياسى, التىن وردا, قازاق-موڭعول تاريحي ساباقتاستىعىن تاراتىپ ايتتى.
موڭعوليا عىلىم اكادەمياسىنىڭ جانىنداعى حالىقارالىق قاتىناستار ينستيتۋتىنىڭ ديرەكتورى ج.باياساح اتالعان شارالاردىڭ ۇيىمداستىرىلۋى قازاق تاريحى, جالپى موڭعول-قازاق تاريحىنىڭ دامۋى تۋرالى تۇسىنىكتى كەڭەيتەتىندىگىنە توقتالدى. ونىڭ پىكىرىنشە, بۇل شارالار ەكى ەل اراسىنداعى گۋمانيتارلىق-مادەني سالالارداعى قارىم-قاتىناستاردىڭ ىلگەرىلەۋىنە وڭ ىقپالىن تيگىزبەك.
موڭعوليا مەملەكەتتىك ۇلى حۋرالى (پارلامەنت) دەپۋتاتى اعىپارىن باكەي قازاق حاندىعىنىڭ 550 جىلدىعى اياسىنداعى شارانىڭ ماڭىزدىلىعىنا توقتالا كەلە, تاريحى تەرەڭنەن باستالاتىن موڭعول-قازاق قوعامى قاتىناستارى قازىرگى تاڭدا بەرىك ەكونوميكالىق, عىلىمي, مادەني جانە رۋحاني بايلانىستارىنىڭ تۇراقتى تۇردە دامۋدا ەكەندىگىن جەتكىزدى.
تاريح عىلىمدارىنىڭ دوكتورى ووحنوي باتسايحاننىڭ قازاقتىڭ ءبىرتۋار ۇلى, پارتيا جانە مەملەكەت قايراتكەرى تۇرار رىسقۇلوۆ تۋرالى بىلدىرگەن ءپىكىرى قاتىسۋشىلاردىڭ نازارىن وزىنە اۋداردى. موڭعول عالىمى ت.رىسقۇلوۆتىڭ باستاماسىمەن موڭعوليا استاناسىنىڭ ۇلان-باتىر (اۋدارماسى «قىزىل باتىر») دەپ اتالعانىنا نازار اۋدارا وتىرىپ, موڭعوليا مەملەكەتى تاريحىنداعى ونىڭ الار رولىنە جوعارى باعا بەردى.
دوڭگەلەك ۇستەل ناتيجەسىندە ەكى ەل عىلىمي توپ وكىلدەرى شارانىڭ قازاقستان مەن موڭعوليا تاريحىنىڭ وزەكتى ماسەلەلەرىن تالقىلاۋدا پايدالى الاڭ بولعاندىعى تۋرالى ورتاق پىكىرگە كەلدى. اتالعان سىندارلى جانە جان-جاقتى تالداۋلار مەملەكەتتەر اراسىنداعى دوستىق پەن ءوزارا سەنىم نەگىزىندەگى قارىم-قاتىناستاردىڭ ودان ءارى ىلگەرىلەپ, دامۋىنا يگى ىقپالىن تيگىزەتىندىگى تۋرالى قورىتىندى جاسالدى.
«ەگەمەن-اقپارات».