ەل پرەزيدەنتى نۇرسۇلتان نازارباەۆتىڭ «نۇرلى جول – بولاشاققا باستار جول» اتتى جولداۋىندا اتالىپ وتكەن مەرەكەلەردىڭ ءبىرى – قازاقستان رەسپۋبليكاسى كونستيتۋتسياسىنىڭ 20 جىلدىعى.
اتالمىش مەرەيتويعا ورايلاستىرىپ, س.بايىشەۆ اتىنداعى وبلىستىق امبەباپ-عىلىمي كىتاپحاناسى جاستاردىڭ اتا زاڭنىڭ قالىپتاسۋ تاريحىنىڭ كەزەڭدەرى مەن كونستيتۋتسيانىڭ سيپاتى, ماڭىزى تۋرالى بىلىمدەرىن تەرەڭدەتۋ, زاڭ الدىنداعى جاۋاپكەرشىلىكتەرىن ارتتىرۋ, ولاردى ءوز قۇقىعى مەن مىندەتتەرىن بىلۋگە, اتا زاڭىمىزدى, مەملەكەتتىك رامىزدەرىمىزدى قاستەرلەۋگە ۇيرەتۋ ماقساتىندا «اتا زاڭىم – ايبارىم!» اتتى تۇراقتى كىتاپ كورمەسىن ۇيىمداستىردى.
تاۋەلسىزدىك العانعا دەيىنگى كەزەڭدەردە قازاقتىڭ جازىلماعان دالا زاڭىنا باعىنعانى بەلگىلى. دالا ەرەجەلەرى قاعازعا تۇسپەسە دە بىلىكتى, زەردەلى, بەدەلدى ادامداردىڭ, اقساقالداردىڭ اۋزىنان كوپكە تاراپ, عاسىرلار كوشىنە ىلەسىپ, جالعاسىپ وتىرعان. وسىعان وراي, كورمەگە «مادەني مۇرا» مەملەكەتتىك باعدارلاماسىمەن شىعارىلعان «قازاقتىڭ اتا زاڭدارى» 10 تومدىق قۇجاتتار, دەرەكتەر جانە زەرتتەۋلەر, س.تابانوۆ پەن ا.ورازوۆانىڭ «كۇردەلى زاماننىڭ وتپەلى كەزەڭدەرىندەگى قازاق قوعامى اتا زاڭدارىنىڭ (كونستيتۋتسيالارىنىڭ) تاريحي-قۇقىقتىق ساباقتاستىعى», ءومىرالى قوپاباەۆتىڭ «اتا زاڭ – مەملەكەت دامۋىنىڭ ىرگەتاسى» اتتى ەڭبەكتەرى, قولدانىستاعى كونستيتۋتسيا, ەلباسىنىڭ ءار جىلدارداعى جانە حرونيكالىق قىزمەتتەرى جايىندا كىتاپتارى, قازاقستان حالقىنا ارناعان جولداۋلارى, اسسامبلەيانىڭ 20 جىلدىعىنا ارنالعان كىتاپتار قويىلدى.
وقىرماندار كورمەدە كىتاپحانا قورىندا بار كىتاپتارمەن, فوتوالبومدارمەن, مەرزىمدى باسىلىمداردا جاريالانعان تىڭ دەرەكتەرمەن, ءتۇرلى-ءتۇستى فوتولارمەن تانىسا الادى.
توعىز ءبولىم, توقسان سەگىز باپتان تۇراتىن كونستيتۋتسيا – تاعدىر تالايىندا توقسان تاراۋلى جولدان وتكەن ۇلتىمىزدىڭ باسىن ءبىر ارناعا توعىستىرعان زور ءمان-ماڭىزعا يە قۇجات. بۇل كۇندى مەملەكەتتىك مەرەكە رەتىندە بەلگىلەۋدە ەلباسىمىزدىڭ كوزدەگەنى ەلدىڭ اتا زاڭعا دەگەن قۇرمەتىن ارتتىرۋ بولسا كەرەك. ءاربىر ادامنىڭ, مەملەكەتتىك مەكەمەلەر مەن قوعامدىق ۇيىمداردىڭ ەل كونستيتۋتسياسىنا دەگەن قۇرمەتىن, ىزەتىن ارتتىرۋ بارىمىزگە ورتاق مىندەت. ەندەشە, ورتاق مىندەتتى ورىنداۋدا ءبىر جەڭنەن قول, ءبىر جاعادان باس شىعارا ءبىلۋ بارشامىزعا سەرت. الداعى ۋاقىتتا دا كونستيتۋتسيانىڭ 20 جىلدىعىنا وراي كىتاپحانا قىزمەتىندە قازىرگى اتا زاڭ تۋرالى جاستارعا تولىققاندى اقپارات بەرۋدە ءىس-شارالار ءوز جالعاسىن تابا بەرمەك.
گۇلزادا بەيىسوۆا,
س.بايىشەۆ اتىنداعى اقتوبە وبلىستىق امبەباپ-عىلىمي كىتاپحاناسىنىڭ قىزمەتكەرى.
اقتوبە.