استانادا «بولاشاق» باعدارلاماسىنىڭ (BARCEF-2015) جىل سايىنعى حالىقارالىق كونفەرەنتسياسى بولىپ, ونىڭ جۇمىسىنا قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆا قاتىسىپ, ءسوز سويلەدى.
«ەلباسىمىزدىڭ تىكەلەي قولداۋىمەن ورىستەگەن «بولاشاق» باعدارلاماسىنا 20 جىل تولىپ وتىر. باعدارلاما ارقىلى قازاقستاندىق جاستار الەمنىڭ وزىق جوعارى وقۋ ورىندارىندا ءبىلىم الدى. ال جىل سايىن وسىنداي كونفەرەنتسياعا جينالىپ, وزەكتى ماسەلەلەردى ءسوز ەتۋ داستۇرگە اينالدى. بارىڭىزگە حوش كەلدىڭىزدەر دەي وتىرىپ, وسى جيىنعا ارنايى قاتىسىپ وتىرعان مەملەكەتتىك حاتشى گۇلشارا ابدىقالىقوۆاعا كونفەرەنتسيانى اشىپ بەرىڭىز دەگىم كەلەدى», – دەدى ءبىلىم جانە عىلىم ءمينيسترى اسلان ءسارىنجىپوۆ.
قۇتتىقتاۋ سوزىندە گۇلشارا ءابدىقالىقوۆا: «الەمدىك وركەنيەتتە ءوزىنىڭ مارتەبەلى ورنىن بەلگىلەگەن قازاقستان ءۇشىن ءبىلىم مەن عىلىمنىڭ ءمانى مەن ماڭىزى ايرىقشا. ەلباسى نۇرسۇلتان نازارباەۆ بەلگىلەپ بەرگەن «قازاقستان-2050» ستراتەگيالىق باعدارلاماسىندا باسەكەگە قابىلەتتى دامىعان مەملەكەت بولۋىمىز ءۇشىن ءبىز ءبىلىم-بىلىگى جوعارى ەلگە اينالۋىمىز كەرەكتىگى ناقتى كورسەتىلدى. سوندىقتان الداعى ۋاقىتتا وتاندىق ەكونوميكانى ءارى قاراي وركەندەتۋ ءۇشىن جانە ەلىمىزدىڭ وزىق وتىزدىقتىڭ قاتارىنا ەنۋىندە بىلىكتى دە ءبىلىمدى ادامداردىڭ الاتىن ورنى ەرەكشە ەكەندىگى انىق. «بولاشاق» پرەزيدەنتتىك باعدارلاماسى 1993 جىلدان بەرى جۇمىس ىستەپ كەلەدى. ونى ەلباسى تاۋەلسىز قازاقستان تاريحىنىڭ التىن پاراعىنا تەڭەگەن بولاتىن. باعدارلاما ءبىلىم بەرۋ جۇيەسىنىڭ جوعارى مويىندالعان لوكوموتيۆى بولا وتىرىپ, قازاقستانعا جوعارى بىلىكتى ماماندار دايىنداۋدىڭ الەمدىك جۇيەسىنە قوسىلىپ, ەلىمىزدىڭ ەكونوميكالىق جانە الەۋمەتتىك كەڭىستىگىندە الەمدىك تەحنولوگيالار ترانسفەرىن قۇرۋعا مۇمكىندىك بەردى», – دەگەن گۇلشارا ابدىقالىقوۆا بۇگىنگە دەيىن 8 مىڭنان استام جوعارى بىلىكتى مامان دايارلانعانىن اتاپ ءوتتى.
قازىرگى كەزدە ولاردىڭ ۇلت ەكونوميكانىڭ ءتۇرلى سالالارىندا: 2 000-نان اسا مامان ونەركاسىپتىك جانە اگرارلىق سەكتوردا, 2 000-عا جۋىعى ءبىلىم سالاسىندا, 1 500-گە جۋىعى اقپاراتتىق تەحنولوگيالار مەن كوممۋنيكاتسيالار سالاسىندا, 600-ءى مەديتسينا سالاسىندا, سونداي-اق, 400-دەن استامى مەملەكەتتىك قىزمەتتە, 85-ءى PhD دوكتورى جانە 2,5 مىڭعا جۋىعى الەۋمەتتىك-گۋمانيتارلىق سالادا ماماندار رەتىندە قىزمەت ەتىپ جۇرگەنىن تىلگە تيەك ەتكەن مەملەكەتتىك حاتشى بولاشاقتىق تۇلەكتەردىڭ تورتتەن ءبىر بولىگىنە جۋىعى باسشىلىق لاۋازىمداردا تابىستى ەڭبەك ەتىپ جاتقانىنا توقتالدى. جانە دە «بولاشاق» باعدارلاماسىنىڭ بەس ينستيتۋتتىق رەفورما, «100 ناقتى قادام» – ۇلت جوسپارى, «نۇرلى جول» مەملەكەتتىك باعدارلاماسى اياسىندا دامىپ جاتقانىنا نازار اۋداردى. ءوز سوزىندە مەملەكەتتىك حاتشى ەلدىڭ ادامي كاپيتالىنىڭ ساپاسىن جوعارى بىلىكتى كادرلار ءۇشىن باسەكەلەستىك كۇرەس جاعدايىندا ارتتىرۋ قاجەتتىگىن ايتىپ, وسى تۇستا ستيپەندياتتاردى ساپالى ىرىكتەۋ, نەعۇرلىم دارىندى جاستاردى تارتۋ جانە ۇلتتىق ەكونوميكانى دامىتۋدىڭ باسىمدىعى بار باعىتتار بويىنشا عىلىمي-زەرتتەۋ الەۋەتىن ارتتىرۋ ءىسى باستى نازارعا الىناتىنىن جەتكىزدى.
مەملەكەتتىك حاتشى كونفەرەنتسياعا قاتىسۋشىلاردى «بولاشاق» باعدارلاماسىنىڭ جاڭا بەسجىلدىق دامۋ جوسپارى اياسىندا ۇسىنىلعان باستامالاردى جان-جاقتى تالقىلاۋعا شاقىرىپ, ءاربىر ستيپەندياتقا جۇمسالعان مەملەكەتتىك ينۆەستيتسيا ەل ەكونوميكاسىن دامىتۋ ءۇشىن جانە «قازاقستان-2050» ستراتەگياسىنىڭ باستى ماقساتى – الەمنىڭ نەعۇرلىم دامىعان 30 ەلىنىڭ قاتارىنا قوسىلۋ ءۇشىن جاڭا ءبىلىم ءجانە ماشىقتاردى يگەرۋ ارقىلى ەسەلەنىپ قايتاتىنىنا سەنىم ءبىلدىردى.
مۇنان سوڭ ءسوز العان سەناتور اقان بيجانوۆ جاھاندىق ءباسەكەلەستىك جاعدايىندا مەملەكەت جەتىستىگىنىڭ اسا ماڭىزدى فاكتورلارىنىڭ ءبىرى – ەلىمىزدىڭ ادام كاپيتالىنا ماڭىز بەرىپ, وسى تاعدىرشەشتى سالاعا ەلەۋلى قارجى ءبولۋىن كولدەنەڭ تارتتى. سوڭعى 5 جىلدا ءبىلىم بەرۋ سالاسىنا بولىنەتىن قارجى 5 ەسەگە ءوستى, قازىرگى كۇنى الەمدە الەۋمەتتىك سالالارعا قارجى ءبولۋ مەن بيۋدجەتتىك شىعىستاردى ازايتاتىن امالسىز شارالارعا قاراماستان, ءبىلىم سالاسىنا ارنالعان مەملەكەتتىك قاراجات قىسقارتىلمادى, ال الەمدىك ستاندارتتارعا جاۋاپ بەرەتىن ماماندار دايارلاۋدا ءبىلىم سالاسىن دامىتۋ اسا قاجەتتى ءىس بولىپ تابىلاتىنىن اتاپ ءوتتى.
كونفەرەنتسيادا ءماجىلىس دەپۋتاتى گۇلنار ىقسانوۆا, جوعارى ءبىلىم سالاسىنداعى حالىقارالىق ساراپشى دجاميل سالمي, شىعىس ازيا ۋنيۆەرسيتەتىنىڭ قۇرمەتتى پروفەسسورى دەۆيد سالمي سويلەدى. ماسەلەن, حالىقارالىق ساراپشى دجاميل سالمي نورۆەگيا پرەمەر-ءمينيسترىنىڭ سوزىنەن مىسال كەلتىرىپ, بىلاي دەدى: «ءبىلىم – بولاشاقتىڭ كىلتى. ەندىگى ۋاقىت بۇگىنگى مۇنداي بيلىك ەتكەن زاماننان باسقا بولماق, ول – عىلىم مەن ءبىلىم بيلىك ەتەتىن الەم. سوندىقتان, ءوزىنىڭ بولاشاعىن ويلاعان ەل بىلىمگە ينۆەستيتسيا سالماي, جارقىن بولاشاققا بارا المايدى. ەگەر مەملەكەت حالقى ساۋاتتى, جان-جاقتى ءبىلىم يەسى بولسا, سول ەلدىڭ بولاشاعى كەمەل», دەگەنى بار ەدى. قازاقستاننىڭ ءبىلىمدى بولاشاققا نەگىزدەلگەن ءوز باعدارلاماسى جۇمىس ىستەپ تۇر. ول «100 ناقتى قادامدا» دا قاراستىرىلعان. ال ەگەر سىزدەر, جوعارىدا ايتىلعانداي, ءبىلىم بيلەيتىن زاماندا تولىققاندى ءومىر سۇرۋلەرىڭىز ءۇشىن ءبىلىمنىڭ بارلىق باسپالداقتارىن قاتار دامىتۋلارىڭىز قاجەت. ولار – الدىمەن ورتا مەكتەپتەگى ءبىلىم بەرۋگە قاتىستى رەفورمالار», – دەگەن ويىمەن ءبولىستى.
كونفەرەنتسياعا ۇلىبريتانيا, اقش, قىتاي جانە ت.ب. ەلدەردەن 20-دان استام حالىقارالىق ساراپشى, «بولاشاق» سەرىكتەستەرى – 20 قازاقستاندىق, 40-تان استام شەتەلدىك جوعارى وقۋ ورىندارىنىڭ وكىلدەرى قاتىسىپ, ءوز وي-پىكىرلەرىمەن ءبولىستى.
انار تولەۋحانقىزى,
"ەگەمەن قازاقستان",
سۋرەتتى تۇسىرگەن
ەرلان وماروۆ.